Lífið í Viby

Íslandsferð

2009-10-03T10:43:00.002+02:00

Við erum á leiðinni til Íslands!!!
Það er víst tími til kominn að koma og hitta afana og ömmurnar og frændurna og frænkurnar og vinina og vinkonurnar.....

Hlakka til að sjá ykkur ;-)

Annars er það að frétta að skólinn gengur mjög vel hjá öllum.
Helgi Kristinn er að skrifa ritgerð þessa dagana og hefur nóg að gera í sínum skóla.
Jóel Kristinn les og les og reiknar og reiknar í sínum skóla, er alsæll og mjög glaður með þetta allt saman.
Fannar Ingi er eiginlega bara orðinn "stór". Kominn í elsta hópinn í leikskólanum (turholdet) og æfir sig að skrifa stafi og tölustafi í vinnubækur sem hann á hérna heima ... maður verður nú að fá að gera eins og stóri bróðir :-)
Nú, ég sjálf er mjög ánægð í nýju vinnunni og kennslan gengur bara þokkalega, en það gerist bara með gífurlegri vinnu, ég er sem sagt síðan um 20. ágúst varla búin að gera neitt nema kenna og undirbúa kennslu. Það vill bara svo vel til að þetta er mjög skemmtilegt og ótrúlega lærdómsríkt þannig að ég kvarta alls ekki.

Sjáumst á Íslandi,
Bestu kveðjur

Nóg að gera .... sem er bara gott!

2009-08-31T16:29:00.003+02:00

Best að sinna fjölskyldufréttaflutningnum svona rétt á maður tekur smá pásu!

Nú er gestatímabilinu lokið í bili. Það er að sjálfsögðu búið að vera frábært að sjá framan í fólkið sitt og algerlega nauðsynlegt fyrir drengina sem hlakka alltaf mikið til að fá ömmur og afa og frændur og frænkur frá Íslandi í heimsókn. Það er auðvitað alltaf tilefni til að borða góðan mat og skreppa í göngutúra eða á ströndina með gestunum.

Núna í síðustu gestatörn komu Benta frænka sem reyndar var mest inni í Horsens þar sem amma og afi á Seltjarnarnesi komu á sama tíma og voru hjá okkur. Við náðum nú samt að gefa Bentu smá gott að borða og svona þannig að þetta var í góðu lagi. Afi Jóel og amma Stína komu til okkar eftir heimsókn til Kára frænda (Margrétar og Arnarson og Péturs Orra og Tómasar Atla litla bróður) og fjölskyldu í Stokkhólmi. Þau fengu líka smá gott að borða þess á milli sem við röltum um, skruppum á ströndina, í Bazar Vest að kaupa grænmeti eða niður í bæ. Þau "gömlu" hjónin þurftu reyndar heilmikið að sjá um sig sjálf... hehe.. þar sem við vorum öll komin á fullt í skólum og vinnu.... en þetta er svo sjálfbjarga....

Nú er vinnan komin á fullt hjá mér. Í síðustu viku hitti ég nemendurna og kynnti áætlun vetrarins og reyndi svona aðeins að átta mig á hvernig hópar þetta eru sem ég er að fara að kenna. Í stuttu máli líst mér mjög vel á þetta allt saman, auðvitað erfitt að gera þetta allt á dönsku en þvílík reynsla sem ég er að fá, þetta er sko hörku áskorun....

Helgi er búinn í sumarkúrsinum, tók próf sl. föstudag og þetta gekk bara allt alveg ágætlega, niðurstaðan kemur samt ekki fyrr en eftir nokkrar vikur. Næsta önn byrjar svo á fullu á morgun, 1. september.

Jóel Kristinn er eins og áður sæll og glaður í skólanum og finnst mjög gaman að læra og er alltaf jafn duglegur, að því sem foreldrunum finnst! hehe
Nú er vikulega keppt í fótbolta og í fyrsta sinn keppa þeir í fimm manna liðum og á stærri mörk en áður.
Taekwondo tímabilið var víst stutt að þessu sinni, hann er búinn að ákveða að fara frekar aftur í springgymnastik eins og í fyrra vetur.

Fannar Ingi fer á kostum þessa dagana. Hann fékk senda æfingabók með stöfum og tölum (geitunginn) í pósti frá ömmu og afa á Selfossi og nú er hann búinn að sita tímunum saman og leysa verkefni með stæl. Hann er á þremur dögum búinn að klára 31 blaðsíðu í bókinni. Þar sem hann sýnir þessu svona mikinn áhuga og þurfti auðvitað alltaf að vera fá lánað úr pennaveskinu hans bróður síns fórum við í gær og keyptum handa honum eigið pennaveski. Þannig að nú er hann stoltur 4 ára eigandi 3 hæða pennaveskis!!!

Framundan er svo bara rútína vetrarins, vinna, skóli, keyra og sækja í íþróttir og svo auðvitað allir foreldrafundirnir í skóla, SFO, leikskóla........

Að lokum má segja að það sé nokkuð líklegt að við munum koma heim í haustfríinu sem er ca. 11. - 18 október.

Bestu kveðjur,

Útivinnandi

2009-08-16T22:44:00.002+02:00

Jæja þá er maður orðinn útivinnandi hér í Danmörku! Vinnan fer vel af stað, samstarfsfólkið í VIA University College, Læreruddannelsen í Århus eru greinilega snillingar í að taka vel á móti nýju samstarfsfólki og nú er bara að krossa fingur og vona að nemendurnir geri slíkt hið sama.... úff. Það verður eflaust dálítið skrítið í byrjun að mæta í kennslustofuna og í stað þess að hafa þar ca. 20 - 25 grunnskólabörn þá munu mæta manni í hverjum bekk ca. 30 fullorðnir einstaklingar ... sem tala dönsku!!!! En nú er bara að nota tímann vel þangað til stúdentarnir mæta og undirbúa kennsluna sem allra best! Næstu viku hef ég til undirbúnings og alls konar fundarhalda þannig að það er ennþá smá tími til stefnu.

Það er reyndar ekki það eina sem framundan er í vikunni. Benta "litla" systir er mætt í heimsókn hún verður hér þangað til á þriðjudag en þá fer hún til Horsens og Pabbi og Kristín mæta til okkar eftir nokkra daga í Stokkhólmi. Nóg að gera í gestamóttöku sem er sko bara gaman - sérstaklega eru Fannar Ingi og Jóel Kristinn alltaf jafn ánægðir með svona heimsóknir :-)

Skólinn er nú kominn á fullt hjá Jóel Kristni sem er nú að vinna í námsbókum og á loksins að lesa heima, svona til að æfa sig svolítið. Hann fær lestrarbækur í skólanum með þeim fyrirmælum að lesa 15 - 20 mínútur á dag en það er bara einn galli þarna á, það tekur hann ekki nema ca. 3 - 5 mínútur að lesa bókina. En þetta er nú kannski ekki alvarlegt vandamál, það er víst til nóg af öðrum bókum til að lesa í!!! Jóel fór á fyrstu Taekwondo æfinguna sína í síðustu viku og er voða spenntur. Hann mun því bæði verða í Taekwondo og fótboltanum í vetur.

Fannar Ingi er bara alsæll með sitt eins og venjulega. Hann sýnir mikinn áhuga á stöfunum og tölunum þessa dagana. Telur alla hluti og spyr um stafina alveg stanslaust sem er bara gaman. Ekki ólíklegt að skólaganga stóra bróður hafi þarna einhver áhrif!

Helgi er svo bara á fullu í sumarnáminu sínu. Hann er búinn að skila einu stóru verkefni og nú er bara eftir ein kennsluvika og svo próf viku síðar.

Annars bara bestu kveðjur,

Sumarfríð búið!

2009-08-08T17:45:00.002+02:00

Jæja þá er sumarfríinu hér hjá okkur í DK lokið. Helgi Kristinn byrjaði í skólanum (sumarönn) þann 3. ágúst og tekur eitt fag núna í ágúst. Strákarnir byrjuðu í leikskólanum og SFO-inu á miðvikudaginn og mánudaginn (10. ágúst) byrjar kennslan í skólanum hjá Jóel Kristni sem núna fer í 1.B (2. bekkur á Íslandi heitir jú 1. bekkur hér í Danmörku). Ég (fréttaritarinn) byrja svo formlega í nýju vinnunni minni á mánudaginn þegar ég fer hérna út fyrir Árósa í 2 daga vinnuferð með nýja samstarfsfólkinu mínu í Læreruddannelsen i Århus (VIA University College). Það verður eflaust athyglisvert að mæta þangað, þekkja engan og eiga að byrja á tveggja daga samveru .... úff!!! ... en bara spennandi!

Síðustu vikur erum við bara búin að dunda okkur hér heima, fara í dagsferðir, hjólatúra hingað og þangað og svoleiðis skemmtilegheit. Afi Sæli kom svo hingað á Jótlandið að heimsækja barnabörnin og fjölskyldur þeirra og það var bara frábært! Strákarnir (og við hin) alltaf jafn glöð að fá afana og ömmurnar í heimsókn. Nú getum við bara farið að hlakka til að fá afa Jóel og ömmu Stínu seinna í mánuðinum.

Sem sagt allt gott að frétta

Bestu kveðjur,

Allir í sumarfríi!

2009-07-16T10:08:00.003+02:00

Það er víst orðið dálítið langt síðan síðustu fréttum af fjölskyldunni var skellt inn á bloggið en það er bara búið að vera svooooo mikið um að vera við að vera í fríi!

Strákarnir eru búnir að vera í sumarfríi síðan í lok júní og voru fyrstu vikuna bara úti að leika í góða veðrinu. Við vorum heldur betur með fullt hús af góðu fólki um mánaðamótin því Dalbúarnir okkar sko Jói og börnin fjögur voru hérna hjá okkur í nokkra daga á meðan það var verið að ganga frá húsinu þeirra. Nú eru sem sagt Jói og Þórunn, Sigurður Ragnar, Hildur Brynja og Heiðrún flutt til Íslands og það verða nú viðbrigði fyrir okkur öll þar sem við erum búin að eyða ansi miklum tíma með þeim. Jóel Kristinn átti ansi erfitt með að kveðja Sigurð Ragnar vin sinn men sådan er det bare.

Þegar fjölskyldan góða var svo farin til Íslands fórum við af stað til Svíþjóðar. Mánudaginn 6. júlí keyrðum við til Grenå (ca. 1 klst) og sigldum til Varberg og keyrðum svo þaðan til Vimmerby þar sem við tjölduðum í 2 nætur. Í Vimmerby heimsóttum við Astrid Lindgren heiminn þar sem við hittum Línu langsokk, Emil í Kattholti og alla hans fjölskyldu, Ronju Ræningjadóttur, Kalla á þakinu, Madditt og Betu og fleiri. Þetta er sem sagt ein risastór leiksýning þar sem maður gengur á milli svæða sem tilheyra hverri sögu. Mjög gaman!

Frá Vimmerby var svo keyrt til Stokkhólm þar sem við mættum beint í afmæliskaffi til Péturs Orra sem varð 8 ára þann dag!!! Strákarnir voru sko alsælir að fá að hitta og leika við frændur sína og svo var auðvitað mest spennandi að fá að hitta litla frænda sem er bara 2 mánaða og algjör hnoðri, ótrúlega sætur og góður!!!!! Við fórum og skoðuðum Stokkhólm eins og alvöru túristar, gengum um borgina og svo auðvitað búðirnar þess á milli sem við fundum leikpláss fyrir drengjahópinn.

Eftir vel heppnaða Stokkhólmsferð keyrðum yfir til Vanern þar sem við tjölduðum á ótrúlega flottu tjaldstæði í eina nótt. Daginn eftir héldum við áfram til Gautaborgar þar sem við vorum svo heppin að vera á saman tíma og Gothia Cup sem er stærsta íþróttamót á Norðurlöndunum og borgin því vægast sagt troðin af unglingsfótboltakrökkum. Við þurftum að byrja á því að keyra á milli tjaldstæða þar sem allt var troðfullt en fengum á endanum pláss á góðu tjaldstæði við ströndina. Í Gautaborg fórum við á mjög skemmtilegt vísindasafn, Universeum þar sem strákarnir fengu að prófa alls konar hluti. Síðan fórum við í Liseberg skemmtigarðinn þar sem við vorum fram á kvöld. Mjög skemmtilegt allt saman þrátt fyrir að það væri ansi troðið alls staðar.

Eftir tvær nætur í Gautaborg var tjaldið tekið upp og brunað niður á höfn og um borð í ferjuna til Fredrikshavn sem er hér á norður Jótlandi. Þangað vorum við komin um hádegi í gær (15. júlí) og tókum smá bíltúr á Skagen þar sem við skoðuðum okkur aðeins um með öllum hinum túristunum áður en við brunuðum heim. Á heimleiðinni lentum við reyndar í einu mesta skýfalli sem við höfum nokkurn tíma séð en við neyddumst til að fara út af hraðbrautinni þar sem það var ekkert hægt að sjá fyrir úrhellinu. En eins og í sönnum útlöndum stytti fljótt upp og eftir smá stund var komin sól og blíða og steikjandi hiti þannig að við komumst fljótt heim og gátum grillað kvöldmatinn heima í rólegheitunum eftir 9 daga vel heppnað ferðalag.

Í dag er svo dagurinn hennar Kristínar Hrefnu sem er 25 ára í dag og heldur því upp á stórafmæli án okkar.... jamms þær eru víst orðnar ansi margar veislurnar sem við erum búin að missa af á Íslandi ... en svona er þetta bara! Innilega til hamingju með daginn Kristín Hrefna!

Bestu sumarkveðjur,

Einn kominn í sumarfrí!

2009-06-20T00:31:00.002+02:00

Þá er Helgi loksins kominn í sumarfrí. Það er satt best að segja mikið fagnaðarefni fyrir alla á heimilinu..... hann var auðvitað sjálfur orðinn þreyttur á þessari löngu törn, ég búin að elda miklu miklu oftar en hæfileikarnir í eldhúsinu leyfa og drengirnir þurfa að fara að fá almennilegan mat - hehe! Þetta er kannski er alveg svona slæmt ... en samt!

Strákarnir eiga núna eina viku eftir fram að sumarfríi. Það er búið að vera mjög gaman hjá Jóel mikið af ferðum hingað og þangað með skólanum, fótbolti og svo er sumarmót í boltanum á miðvikudag.

Fannar leikur sér úti allan daginn og er bókstaflega úrvinda á kvöldin þegar hann kemur heim. Hann er líka skemmtilega skítugur upp fyrir haus þegar hann kemur heim af leikskólanum.... allt voooða hollt og gott!

Ég fór á fund með leiðbeinandanum sl. mánudag til Köben auðvitað. Rifjaði upp lestarferðirnar sem voru stundaðar svo reglulega fyrstu þrjár annirnar. Fundurinn gekk vel og ég ætti að geta klárað ritgerðina bara með því að koma mér að verki, ég er sem sagt nokkurn vegin með öll gögn sem ég þarf.... núna er bara að hætta þessu endalausa hangsi á internetinu og skrifa.... og klára svo ég komist í sumarfrí með hinum!

Ég er svo jafnvel komin með vinnu/verkefni í haust sem research assistant í spennandi rannsókn hér við Århus University. Það verður pottþétt góð reynsla ... svona ef allt gengur upp :-)

Við erum aðeins að finna fyrir því að stundum er erfitt að vera ekki heima á Íslandi, svona þegar mikið liggur við. Þessa dagana eru sko tveir stórviðburðir fjölskyldunni en Valdís frænka gifti sig sl. þriðjudag og misstum við víst af miklu og í dag laugardag mun Jóel bróðir útskrifast úr Háskólanum og er þar með formlega orðinn læknir. Það er satt best að segja hundfúllt að geta ekki verið með honum á þessum degi - tekið þátt í veisluhöldunum, partýinu og því öllu. En við fengum jú að skála með honum um daginn....

Annars er bara framundan að njóta veðursins í næstu viku - við erum að tala um sól og jafnvel 25°hita sem er bara dásamlegt!!!!!!! Það verður þá unnið vel í brúnkunni.

Bestu kveðjur,

Úpps... það er kominn júní!!!

2009-06-05T12:30:00.002+02:00

Ég var alveg sannfærð um að ég væri nýbúin að skrifa veðurfréttir og aðrar fréttir hingað á síðuna þegar ég allt í einu komst að því að það er bara langt langt síðan!!!

Ég reyni því snarlega að bæta aðeins úr fréttaskortinum og koma með smá update!

Við fórum í seinni hluta maí á leiksýningu hjá Jóel þar sem hann fór á kostum sem Vampyrmyg hvað sem það nú er og sagði svo snilldarvel "mmm... her lugter menneskeblod! En lækkert lille mundfuld menneskeblod". Jóel er líka búinn að spila á nokkrum litlum fótboltamótum og er alltaf jafn gaman að heimsækja litlu nágrannabæina og spila smá fótbolta í leiðinni. Það nýjasta hjá drengnum er svo tannleysi! Jóel er sem sagt nýbúinn að missa báðar framtennurnar í efri þannig að hann er sko aldeilis glæsilegur þessa dagana!!!

Fannar er hress að vanda. Endalausir frídagar nú í maí og júní. Í dag er t.d. Grundlovsdag og því frí og sl. mánudag var 2. pinsedag (hvítasunnan) því einungis þrír virkir dagar í þessari viku.

Helgi Kristinn er byrjaður í prófum eitt búið og þrjú eftir.

Ritgerðaskrif ganga bara hægt og rólega hjá húsmóður heimilisins. Þetta fikrast áfram. Fer á fund með leiðbeinandanum 15. júní og eftir það get ég vonandi unnið á fullu í síðustu köflunum og svo klárað fyrir sumarfrí í lok júní - vonandi!

Við höfum verið svo heppin að fá góða gesti. Í lok maí kom Jóel bróðir eða Jóel frændi eða bara doktor Jóel og var hjá okkur í nokkra daga - það var snilld! Við afrekuðum meira að segja að ganga alla leið upp á topp hæsta fjalls Danmerkur með gestinn. Litlu frændurnir voruþvílíkt ánægðir með að fá frænda sinn í heimsókn við hin notuðum auðvitað tækifærið til að borða góðan mat og drekka með því eitthvað gott .... og halda upp á að "litli bróðir" er búinn að klára læknisfræðina sem er nú enginn smá árangur! Jóel Kristinn vill reyndar meina að hann sé ekki einu sinni orðinn fullorðinn, bara stór unglingur....

Við fengum svo aðra heimsókn frá Íslandi í fyrradag þegar Erna og Gulli kíktu til okkar í kaffi. Þau komu reyndar færandi hendi með fullan poka af íslensku sælgæti .... mmmmm.... við bara njótum og mætum í ræktina þess á milli :-) Það var auðvitað gaman að hitta þau eins og alltaf ekki síst þar sem Gulli sýndi fjarstýrða dótinu hans Helga mikinn áhuga ..... það þarf nú ekki meira til að gleðja stóra strákinn á heimilinu! Þið vitið það þá ef þið viljið slá í gegn hjá Helga Kristini þá þarf ekki meira til en að hafa áhuga á dótinu hans... hehehe

Jæja þá er það lærdómurinn,

Bestu kveðjur

Námsmannalífið í DK

2009-05-18T11:10:00.003+02:00

Jæja þá er komið að smá uppfærslu veðurfrétta og annarra frétta. Það er líklega helst í veðurfréttum að það var betra veður á Íslandi í gær en hér í DK. Ég ætlaði að fara að kvarta en Helgi minnti mig á að við værum búin að hafa sumar og sól meira og minna síðan í apríl og Íslendingarnir heima ættu þetta bara skilið eftir allt saman. Veðrið í dag er fínt en það er eitthvað úrhelli og jafnvel þrumuveður í kortunum fyrir vikuna..... það er kannski fínt fyrir námsmennina en Fannar Ingi á að fara í spennandi vorferð á miðvikudaginn þegar mesta rigningin er í kortunum - úff!

Það var mikið fjör í afmælinu hjá Jóel Kristni. Við fengum allan bekkinn hans hingað í eldhresst morgunpartý þann 7. maí. Grilluðum pylsur í garðinum og buðum upp á fótboltaköku og saftevand. Það getur verið mjög athyglisvert að fá svona litríkan hóp í afmælisboð þ.s. nokkrir mega ekki borða svínakjöt og svo er einhver með eggjaofnæmi ........ þannig að við auðvitað suðum kjúklingapylsur í eldhúsinu svo þær myndu ekki komast í snertingu við svínakjötið á grillinu og svo var sett eggjalaust deig í muffins-form til að gæta að eggjaofnæminu. Það er eins gott að vera með þetta allt á hreinu!

Kristín Hrefna, Borgar, Breki og Marselía mættu hér um miðja nótt aðfararnótt afmælisdagsins 8. maí og voru því hér með öllum nágrönnum okkar í smá grillafmæli fyrir Jóel á afmælisdaginn. Á laugardaginn hélt prógrammið áfram því við brunuðum í Djurs Sommerland þar sem hlaupið var á milli rússíbana og annarra skemmtitækja fram að lokun með smá nestishléum þó. Síðan var auðvitað farið heim að grilla!

Sunnudagsprógrammið var svo ferð í Ljónagarðinn (Givskud Zoo) sem er alltaf jafn skemmtilegur. Ljónin vöktu að venju mesta lukku!!!! Nú um kvöldið var svo auðvitað farið heim að grilla ..... en ekki hvað... Á mánudeginum var margþætt prógramm Fannar og Jóel fóru í skólann, Borgar og Helgi í golf og við hin í bæinn í H&M ferð, eftir að allir höfðu klárað sitt fórum við öll saman með epli og gulrætur í Bambaskóginn og svo smá á ströndina. Um kvöldið var svo farið út að borða ....mmmm...

Eftir þessa viðburðaríku og góðu daga þurftu allir bara að snúa sér að sínu og takast á við verkefnin sem biðu!

Framundan er í vikunni leiksýning og bekkjarkvöld hjá Jóel Kristni, vorferð og kaffiboð hjá Fannari, próflestur og ritgerðavinna hjá fullorðna fólkinu eeeeeen á föstudagskvöldið er aftur von á góðum gesti - að þessu sinni er von á Jóel bróður eða doktor Jóel sem er núna í útskriftardjammi með læknisfræðinni en kemur til okkar og verður hér í Árósum í nokkra daga. Bara gaman!

Jæja bestu kveðjur,

Hmmmmm.... dropar úr lofti!

2009-05-05T11:38:00.002+02:00

Hér er áframhald á veðurfréttum - hehe - eftir 270 sólarstundir í apríl eru farnir að koma rigningadropar við og við. Sumir segja að þetta sé gott fyrir gróðurinn aðrir fyrir lærdóminn en ég held jafnvel að þetta sé í tilefni þess að Kristín og Borgar og börnin eru að koma um næstu helgi!!!

Kristín og Borgar komu um páskana í fyrra og þá voru köldustu páskar í DK í manna minnum..... það er spurning hvað gerist núna.....

Annars er það að frétta af Fannari Inga 4ra ára að hann er farinn að hjóla um allt hverfið án hjálpardekkja. Drengurinn settist upp á hjól nágrannans í síðustu viku og bara hjólaði af stað þannig að pabbi hans tók hjálpardekkin af litla hjólinu hans og nú hjólar hann bara út um allt með bros á vör!!!

Nú erum við fullorðna fólkið að átta okkur á því að það er kominn maí og nú verður sko aldeilis að taka sig á í náminu. Ótrúlegt að flytja til útlanda til að læra og mega svo eiginlega bara ekkert vera að því að læra.... en þessu verður reddað á næstu dögum og vikum. Fram til ca. 18. júní verða "allar" lausar mínútur notaðar í lærdóm.

Bestu kveðjur

Sól og blíða

2009-04-24T12:29:00.002+02:00

Þar sem lítið sem ekkert er að frétta verður þetta bara stutt fréttayfirlit og veðurfréttir.

Jóel Kristinn leikur sér úti í sólinni þess á milli sem hann er í skólanum.

Fannar Ingi leikur sér úti í sólinni .... líka í leikskólanum.

Helgi Kristinn reynir að sinna náminu en þarf stundum (svolítið oft) að fá langa pásu til að geta verið úti í sólinni.

Lóa Björk reynir stundum að sinna ritgerðarskrifum en vill frekar bara vera úti í sólinni.

Veðurfréttir: Hér er sól alla daga og hitinn á bilinu 15°- 20° (auðvitað heitara þegar maður situr í sólinni). Apríl stefnir skv. dönsku veðurfréttunum í met í fjölda sólskinsstunda sem er bara gott.

Gestafréttir: Eftir brottför afa og ömmu á Selfossi eftir páskana fengum við góðan gest í næturgistingu, mat og drykk. Svenni (hennar Regínu) á leið framhjá og kom við hjá okkur við góðar undirtektir heimilisfólksins. Í næstu viku er von á ömmu Guðlaugu sem ætlar að hitta börn og barnabörn í nokkra daga. Viku síðar er svo von á Kristínu Hrefnu og öllu hennar liði í nokkra daga skemmtiferð og munum við einmitt halda upp á afmæli Jóels 8. maí þegar Kristín og fjölskylda verða hér - voða gaman! Nú þar á eftir síðar í maí er von á doktor Jóel og það verður sko varla leiðinlegt heldur..... Frekari gestakomur hafa ekki verið boðaðar .... sumarið ekki planað hjá fjölskyldunni en það kemur bara í ljós hvernig það verður.

Næst á dagskrá er svo að fagna fæðingu enn eins frændans í Svíaveldi en á allra næstu dögum munu Pétur Orri og Tómas Atli eignast lítinn bróður .... það verður sko fjör á Seltjarnarnesinu og í sveitinni þegar við systurnar mætum með liðið - næst þegar við hittumst 5 strákar!!!!!

Jæja bestu kveðjur

Páskafríið á enda

2009-04-13T16:09:00.002+02:00

Það er víst strax kominn 2. í páskum og gestirnir okkar góðu frá Selfossi bæði komnir og farnir.

Síðustu dagar hafa farið í að borða mikið af góðum mat, undirbúa máltíðir og ganga frá eftir máltíðir - hehe. Við höfum jú reynt þess á milli að ganga smá og smyrja nesti og svo höfum við að sjálfsögðu gefið okkur tíma til að borða íslensku páskaeggin okkar mmmmmmmmmmm......

Reyndar fórum við í Legoland á föstudaginn langa þar sem við þeyttumst á milli tækjanna í 7 og hálfan klukkutíma og skemmtum okkur konunglega að venju. Afinn og amman voru dregin upp í alls konar lestir og rússíbana og stóðu þau sig með mikilli prýði.

Á páskadag var varla hægt að átta sig á því að við vorum ekki á Íslandi. Allir fengu íslensk páskaegg frá Nóa og Síríus og svo var íslenskt lambalæri um kvöldið það eina sem kannski var svolítið ó-íslenskt var veðurfarið en það var auðvitað sólbaðsveður eins og er búið að vera síðustu vikuna og er spáð áfram þá næstu. Við erum að tala um ca. 15 - 19° sem er bara alveg fínt í fyrri hluta apríl mánaðar.

Á morgun tekur svo alvaran aftur við. Strákarnir þrír fara allir í skólana sína - leikskólann - grunnskólann og háskólann og húsmóðirin verður að gjöra svo vel að koma sér aftur á skrið í lokaritgerðinni. Stefnan er að klára ritgerðina í júní til að vera ekki með þetta hangandi yfir sér í allt sumar!

Sem sagt allir vel nærðir eftir gott páskafrí,

bestu kveðjur

Hér er sól og blíða

2009-04-02T12:56:00.002+02:00

Já hér er sem sagt komið alvöru vor! Páskaliljurnar eru byrjaðar að springa út í garðinum og hitastigið er komið vel yfir 10° sem er fínt í byrjun apríl. Spáin gerir meira að segja ráð fyrir allt að 17° á laugardaginn........ jibbý.

Helgi Kristinn átti afmæli í gær og þá var bara frí hjá okkur fullorðna fólkinu! Þegar drengirnir voru komnir í skólana sína brunuðum við með Þórunni og Jóa í golf og spiluðum til hádegis. Eftir það var svo haldið niðrí bæ þar sem við fengum okkur lunch við ána mmmmmmm........ röltum svo um í bænum - völdum sumarjakka á afmælisbarnið og fleira skemmtilegt! Um kvöldið fórum við svo fjölskyldan saman út að borða ............. þannig að þetta var bara hinn besti dagur!

Fyrir utan afmælisveisluna er lítið um að vera hjá okkur í fjölskyldunni .... nema hjá Jóel - þar er allt á fullu!

Sl. fimmtudag var okkur boðið á sirkus í SFO-inu hans Jóels. Þar voru krakkarnir búnir að undirbúa rosa flotta sýningu. Jóel var í hlutverki karate-meistara. Karate-meistaranir voru þrír gríííðarlega sterkir strákar sem fyrst brutu þunna litla spýtu (sem minnti mjög á hrökkbrauð), þá var höggið í sundur prik og að lokum heill múrsteinn!!!! Framlag drengsins var tekið upp á símann hans Helga og má sjá upptöku hér: http://share.ovi.com/users/hkh

Næsta sýning var svo á sunnudaginn þegar við fórum á lokasýningu fimleikanna. Þar sýndu fjölmargir hópar það sem þeir voru búnir að læra í vetur og stóð Jóel Kristinn sig auðvitað einstaklega vel. Hann tekur svona sýningum mjööööög alvarlega, er einstaklega einbeittur á meðan á sýningunum stendur en um leið og sýningarnar eru búnar kemur hann hlaupandi - brosandi út að eyrum - alsæll!

Skemmtiprógrammið átti nú heldur betur að halda áfram hjá Jóel í dag. Í kvöld átti hann að mæta í sínu fínasta pússi í Galaveislu í skólanum þar sem hann átti að borða og dansa og á morgun er önnur veisla í skólanum því það er útiskemmtun frá kl. 12 - 14 með ýmsum þrautum og leikjum eeeeeeeen

Jóel vaknaði upp í nótt bókstaflega hundlasinn! Ég hef reyndar bara einu sinni áður séð hann svona slappann en það var þegar hann fékk einkyrningssóttina þegar hann var 3 ára! Nú liggur hann bara uppi í rúmi með 40° hita og sefur og sefur og sefur.

Hann verður nú vonandi fljótur að hrista þetta af sér ..... amma og afi á Selfossi koma í næstu viku og svo hefur amma Guðlaug líka boðað komu sína en hún kemur um mánaðamótin apríl/maí þannig að það er ýmislegt framundan!

Bestu kveðjur,

Rólegheit

2009-03-21T14:58:00.002+01:00

Allt gott að frétta héðan úr rólegheitunum.

Það er engin spurning að vorið er nánast komið hér í Danmörkunni. Búið að vera upp undir 10° alla síðustu viku og menn hafa sest út í sólina .... í flíspeysunni ... og horft á vorlaukana sem eru komnir í ca. 15 cm hæð. Annars hafa víst fæst orð minnsta ábyrgð því það á víst að kólna aftur í næstu viku en það verður nú vonandi sem minnst úr því. Við erum sko alveg tilbúin að fá almennilegt vor - sem fyrst!

Við höfum bara verið mest hérna heima við og reynt að sinna skyldunum síðustu dagana. Fórum reyndar í tvær góðar afmælisveislur um síðustu helgi þar sem við fengum hressilegan skammt af góðum kökum. Það besta var að veislurnar voru hvor á eftir annarri. Fórum sem sagt fyrst kl. 13 í 5 ára prinsessuafmæli til Völu sem er dóttir eins skólafélaga Helga og svo beint þaðan til Jóns Freys sem var var víst aðeins meira en 5 ára!!! Helgi fékk að velja afmælisgjöfina hans Jóns Freys og auðvitað keypti hann fjarstýrða þyrlu.... en ekki hvað

Annars erum við Helgi bæði í ritgerðarskrifum þessa dagana. Helgi er að skila ritgerð um Heuristic algorithm of truckload bleeeeeeeeeee.... þetta er líklega eitt mest óspennandi ritgerðarefni sem ég hef kynnst og frekar ólíklegt að þetta eigi eftir að nýtast honum í framtíðinni. Í stuttu máli er hann að fjalla um og reikna út leiðarkerfi fyrir flutningabíla ....

Ég er bara að reyna að skrifa gengur hægt ......... en gengur þó!

Fannar Ingi er bara í leikskólanum að leika við íslensku börnin eins og venjulega, kemur svo heim og leikur við íslensku börnin eins og venjulega....

Jóel Kristinn er að undirbúa tvær sýningar. Á fimmtudaginn er sirkus hjá bekknum hans Jóels í SFO-inu og mun hann leika þar listir sínar sem einhvers konar bardagamaður - hann hefur það líklega frá Jóel frænda sínum (móðurbróður). Á sunnudaginn eftir viku er svo lokasýning í fimleikunum eða springgymnastik.

Við eigum svo von á góðum gestum um páskana. Afi og amma á Selfossi munu mæta á svæðið og dekra við barnabörnin eins og venjulega ........... geri ég ráð fyrir :-)

Sem sagt bara allt rólegt og gott hér í Viby,

Bestu kveðjur

Skemmtileg helgi að baki!

2009-03-09T19:07:00.003+01:00

Það er víst komið nokkuð langt síðan fréttir af fjölskyldunni voru skrifaðar hér inn en það er kannski líka bara vegna þess að það hefur ekki verið svo mikið að frétta!

Fastelavn gekk vel fyrir sig, Jóel Kristinn fékk flottan sjóræningjabúning og gekk um sem vöðvastæltur sjónræningi og sló köttinn úr tunnunni og Fannar Ingi var í búningi úr Cars myndinni - og var því flottur kappakstursbílstjóri. Allir borðuðu líka bollur og við fengum meira að segja saltkjöt og baunir á sprengidag - þannig að við fengum allan pakkann þó við séum hér í DK.

Hið daglega líf er í mjög föstum skorðum. Jóel fer í skólann-SFO-springgymnastik-fótbolta og leikur sér við vini sína glaður með þetta allt. Fannar Ingi fer í leikskólann og leikur sér sæll og glaður. Helgi Kristinn mætir í ræktina, skólann og flýgur nýju fjarstýrðu þyrlunni sinni sæll og glaður. Ég mæti í ræktina og reyni að skrifa lokaritgerðina mína sem fer hægt af stað - en mun vonandi hafast fyrir sumarið!

Við reynum svo að brjóta um hversdagleikann með skemmtilegheitum og vorum einmitt að koma úr frábærri sumarbústaðarferð þar sem við eyddum helginni með Þórunni, Jóa, Heiðrúnu Ósk, Sigurði Ragnari og Hildi Brynju á Vesturströnd Jótlands. Börnin fengu sko heldur betur að njóta sín. Við fórum í sund, spiluðum fótbolta, fórum í gönguferðir á ströndina (sem er svo stór að hún minnti næstum á eyðimörk - nema það var sjór ... ) fórum á skemmtilegan róló, spiluðum og umfram allt borðuðum góðan mat aftur og aftur... og aftur og aftur.

Nú fyrir þá sem ekki muna setur Helgi stundum inn myndir úr símanum sínum hér: http://share.ovi.com/browse/mostrecent/member/hkh.

Það eru reyndar engar alveg nýjar myndir núna en mynd af tunnunni sem sett var upp hér á Fastelavns-festinu hér í götunni og keiluferð fjölskyldunnar og eitthvað svona.

Bestu kveðjur,

Allt eins og það á að vera!

2009-02-20T09:38:00.002+01:00

Nú er letilífi og fríi lokið!!!!

Íslandsferðin varð að einni alsherjar matarveislu. Náðum 17 matar-/kaffiveislum á 10 dögum auk nauðsynlegra heimsókna á KFC, Subway og American Style.

Þó svo að humarinn, lambakjötið, hjónabandssælan og allar hinar kræsingarnar hafi alveg verið ferðarinnar virði þá var það nú fólkið sem við náðum að hitta sem skipti mestu máli. Náðum að knúsa flesta .... hefði nú viljað hitta sumar meira en svona er þetta bara þegar maður þeytist á milli staða non-stop í 10 daga þá nær maður því miður ekki öllum og flestum bara einu sinni - en sådan er det bare!

Fyrir strákana var toppurinn að komast í sund, á snjóþotu og í jeppann hans Gumma frænda auk þess að hitta ömmurnar og afana. Jóel Kristinn fékk líka tækifæri til að hitta gömlu vini sína í Snælandsskóla þar sem hann fékk að vera með í 1. R hálfan dag og var mjög ánægður með það. Honum var líka boðið í heimsókn til Benedikts vinar síns sem var alveg frábært því hann er sko ekkert búinn að gleyma vinunum af Grænatúni. Jóel Kristinn fékk líka tækifæri til að leika við hana Anítu sína og það tók ekki nema svona 1 - 2 mínútur áður en þau voru dottinn í leikgírinn eins og þau hefðu hist síðast í gær!

Núna er fríið búið! Helgi Kristinn kominn á fullt í skólann aftur eftir að hafa náð mjög góðum árangri í janúarprófunum og ég er að reyna að koma mér af stað í ritgerðarvinnuna en ég er sem sagt búin að ljúka öllum fögunum og á bara ritgerðina eftir.

Framundan er mikið fjör. Benta Vala gistir á laugardaginn og það er nú ávísun á action (hehe) og á sunnudaginn verður Fastelavn-hátíð í götunni þar sem börnin fara í búninga og slá köttinn úr tunnunni og á eftir verður boðið upp á fastelavns-boller, öl og aðra drykki. Á mánudag verður svo fastelavn bæði á leikskólanum hjá Fannari og í skólanum hjá Jóel þannig að hér sé bara gaman.

Bestu kveðjur,

Letilíf

2009-01-26T21:48:00.002+01:00

Jæja þá er prófatörninni lokið!! Loksins, loksins, loksins....

Við sem sagt kláruðum sl. föstudag og tók letin við alveg um leið! Við vorum svo heppin að nágrannar okkar buðu okkur í mat á föstudagskvöldið þannig að við þurftum hvorki að elda né hafa ofan af fyrir drengjunum þar sem allt var til alls í veislunni - matur og leikfélagar. Við spiluðum auðvitað frameftir nóttu og entumst ótrúlega lengi miðað við hve þreytt við vorum. Ég hafði t.d. vaknað kl. 05:10 um morguninn þar sem ég þurfti að leggja af stað kl. 06 um morguninn til Köben í prófið mitt!

Ég verð nú samt að nefna það sérstaklega að ég afrekaði að mæta með strákana á fótboltaæfingu kl. 09 á laugardagsmorgun !!!! Þetta var auðvitað fótboltaæfingin hans Jóels en það mæta svo fáir strákar á æfingarnar þessar vikurnar að Fannari var boðið að vera með og stóð sig ótrúlega vel og brosti út að eyrum allan tímann!

Eftir að komið var heim af fótboltaæfingunni var ekki meira afrekað þann daginn! Foreldrarnir voru einfaldlega of latir þannig að dagurinn leið án þess að það næðist að gera neitt af viti, ekki einu sinni að fara út í búð að versla í matinn ;-) (McDonalds reddaði kvöldmatnum við miklar vinsældir drengjanna!)

Á sunnudaginn skruppum við fjölskyldan í keilu. Strákarnir höfðu aldrei áður farið í keilu og skemmtum við okkur öll mjög vel. Það er keilusalur hérna rétt hjá okkur og höfum við oft talað um að fara en aldrei látið verða af því fyrr en nú. Þess má geta að úrslitin fóru þannig að Helgi burstaði keiluna, Jóel varð í 2. sæti , Fannar Ingi í 3. sæti eftir að hafa verið í 2. sæti lengst af en mamman sjálf rak lestina og átti víst aldrei minnstu von á verðlaunasæti :-(

Nú eru svo bara rólegheit framundan. Lítið sem Helgi á að mæta í skólann þessa vikuna og ég þarf bara að vinna smá í rannsóknarspurningunni minni og vinnuáætlun fyrir mastersritgerðina. Þannig að stærstu verkefnin verða bara að mæta í ræktina og vera latur ... svona til skiptis

Svo má minna einu sinni enn á að við erum að kíkja heim þann 6. febrúar... vona bara að það verði fleiri umræðuefni í boði en ástandið í landsmálunum! Við sitjum hérna á refresh-takkanum á fréttamiðlunum og fylgjumst með............ en ég er bara of löt til að skrifa allt sem mér finnst...

Bestu kveðjur

Próflestrardagar

2009-01-16T22:47:00.002+01:00

Nú snýst heimilislífið bara um próflestur foreldranna. Ekki það að við séum alltaf að læra - nei nei alls ekki - við bara eigum alltaf að vera að læra eða erum að reyna að vera læra.... og stundum erum við að læra ;-)

Ég var svo "heppin" að lenda á fyrsta mögulega prófadeginum í stærðfræðiprófinu mínu sem verður ansi erfitt! Það er alltaf jafn erfitt að fara í þessi munnlegu próf og tala útlensku þar að auki en auðvitað reddast það nú samt (vonandi) það þarf bara að hafa fyrir því. Ég hef nú ekki verið dugleg við að halda einbeitingu eftir verkefnaskilin og er núna að vinna upp það sem ég ætlaði að gera á ca. 10 dögum fyrir próf svona síðustu 3 dagana..... prófið er sem sagt á mánudagsmorgun. Seinna prófið mitt er á föstudagsmorgun en eftir það byrja ég bara í rólegheitunum að vinna í mastersritgerðinni minni.

Helgi er í rólegheitunum að undirbúa sig fyrir próf sem er næsta föstudag og þá er hann líka búinn í prófum.

Jóel Kristinn missti í fyrsta sinn daga úr skólanum en hann var lasinn heima í gær og í fyrradag. Þar sem við foreldrarnir vorum upptekin við að reyna að læra þurfti hann nú að sætta sig við lágmarksathygli allan daginn, horfa á sjónvarp og svoleiðis. Til að gera þetta aðeins flóknara þá er tölvan okkar í viðgerð (þar sem allt barnaefnið og leikirnir eru) og Play Station tölvan ónýt ... en einhvern veginn komst fólk af áður en tölvurnar komu......... við erum bara búin að gleyma því hvernig börn léku sér fyrir tíma Play Station þannig að Helgi fór til nágrannanna og fékk leikjatölvuna þeirra lánaða .... hehe. Jóel Kristinn var svo alsæll í morgun þegar hann fékk leyfi til að fara í skólann enda var afmælisveisla heima hjá einum bekkjarbróður hans.

Það er nú lítið að frétta af Fannar Inga, en engar fréttir eru jú góðar fréttir. Hann er að minnsta kosti sæll og glaður á leikskólanum og alveg dauðþreyttur á kvöldin. Í kvöld sofnaði hann t.d. í sófanum yfir Disney stundinni klukkan rúmlega sjö.

Annars er að styttast í Íslandsferðina - bara 3 vikur þangað til við komum og dagskráin alveg að verða þétt skipulögð - hehe! Jóel Kristinn ætlar meira að segja að heimsækja 1.R í Snælandsskóla en þar eru gömlu vinir hans úr leikskólanum. Þá getur hans aðeins fengið að sjá hvernig þetta er í íslenskum skóla á meðan mamma hans hangir á kennarastofunni og spjallar við allt samstarfsfólkið í skólanum.

Jæja best að fara að læra.... eða sofa,

Bestu kveðjur

Rútína á ný!

2009-01-08T22:51:00.003+01:00

Hér gengur lífið sinn vanagang.

Drengirnir alsælir að vera komnir í skólana sína aftur. Jóel Kristinn verður í því sama og á haustönninni þ.e. springgymnastik og fótboltanum sem er bara fínt. Í skólanum bætist smá við, þar sem að nú kemur dönskukennari inn í bekkinn 1 eða 2 sinnum í viku. Þetta er kennarinn sem mun taka við bekknum næsta vetur en hér í DK er það oftast þannig að það er sérstakur börnehaveklasselærer og svo tekur dönskukennarinn við umsjóninni í 1. bekk sem er reyndar 2. bekkur á Íslandi. Fljótlega kemur líka inn stærðfræðikennari sem mun svo halda áfram með bekkinn í stærðfræði næsta skólaár. Jóel fór líka í hefðbundna heimsókn til skólahjúkkunnar í vikunni og staðfesti hún að drengurinn bæði sjái og heyri vel er 120,5 cm og bara í góðu lagi að öllu leyti!

Fannar Ingi harðneitar að halda áfram í Boldspilinu þrátt fyrir að það hafi verið mjög fínt námskeið og við ætlum nú ekki að neyða drenginn til að halda áfram. Þeir bræður hafa báðir verið að tala um að spila á hljóðfæri og kannski getum við fundið út úr því fyrir næsta vetur, skv. skyndikönnun á netinu eru nú samt engir námsmannaprísar í boði í tónlistarnáminu sem er rándýrt eins og á Íslandi - en þetta kemur bara í ljós. Fannar Ingi mun því láta leikskólann nægja en segist þá ætla í fótboltann þegar hann byrjar aftur fyrir hans aldur í vor.

Helgi fór í próf 3. janúar sl. og gekk bara fínt. Nú er hann í rólegheitunum að undirbúa sig fyrir næsta próf, ekkert stress ennþá en það á eftir að koma.

Ég skilaði öllum mínum verkefnum þ.e. 115 bls í 4 eintökum samtals 460 bls. á þriðjudagsmorgun. Nú býð ég bara eftir að fá að vita hvenær ég lendi í prófunum mínum en prófadagarnir eru frá 19. - 30. janúar. Ég hef verið að nota tímann aðeins síðustu daga til að undirbúa mastersritgerðina mína en ef ég næ öllum prófum á þessari önn þá á ég bara ritgerðina eftir! Í gærkvöldi áður en ég skrapp í átveislu með nágrannakonum mínum þá skrifaði ég niður þá hugmynd sem ég hef að efni og í dag sendi ég hana til þess kennara sem ég helst vildi fá sem leiðbeinanda og viti menn 5 mínútum seinna svaraði kennarinn mailinu og samþykkti bæði að verða leiðbeinandinn minn og að hugmyndin að efninu væri eitthvað sem vel væri hægt að nota! Þá þarf ég amk ekki að hafa áhyggjur af því!

Í gær héldum við Íslendingarnir í götunni þrettándagleðina okkar, eins og í fyrra söfnuðumst við saman og kveiktum bál, brenndum jólatré og skutum upp afganga af rakettum og börnin fengu stjörnuljós.

Nú erum við fjölskyldan öll farin að hlakka til að koma til Íslands í vetrarfríinu (6. - 16. febrúar) við verðum nú eins og venjulega að skipuleggja tímann vel til að ná að hitta sem flesta. Jóel Kristinn er búinn að leggja inn pöntun fyrir snjó á Íslandi enda er víst lítið um svoleiðis hér hjá okkur - sáum samt nokkur korn um síðustu helgi og var þeim fagnað gríðarlega í þær klukkustundir sem snjórinn var.

Bestu kveðjur,

Gleðilegt ár!

2009-01-01T15:29:00.002+01:00

Við fjölskyldan óskum ykkur öllum gleðilegs árs og hlökkum auðvitað til að hitta ykkur öll á nýju ári.

Við höfum haft það rólegt og gott yfir jólin. Helgi hefur verið að læra fyrir próf og við strákarnir höfum bara verið að leika og slappa af. Við fórum á jólaball hjá Íslendingafélaginu þar sem synir tónmenntakennarans fengu loksins að heyra og syngja íslensku jólalögin (tónlistaruppeldið eitthvað slappt á heimilinu um þessar mundir). Þá skruppum við og kíktum á lífvarðaskipti hjá drottningunni sem var hér í Árósum yfir jólin. Annars erum við bara búin að vera heima!

Ég var nú eitthvað að læra og á morgun er það lokahnikkurinn - allt á að klárast um helgina.

Áramótin voru mjög skemmtileg hjá okkur. Við borðuðum með Þórunni, Jóa og börnunum þeirra og það er sko aldrei leiðinlegt hjá okkur!!! Við vorum með kalkún í matinn - þvílíkt vel heppnað. Borðuðum auðvitað yfir okkur, vorum með ótrúlega góða forrétti og tvo desserta líka og magnið af matnum hefði dugað fyrir a.m.k. eina til tvær fjölskyldur í viðbót! Við skutum auðvitað upp flugeldum um miðnætti og svo var bara tjúttað fram eftir öllu......... kannski aðeins of lengi miðað við að Helgi er að fara í próf á laugardagsmorgun!!

Nú er bara að koma sér í rútínuna aftur - drengirnir fara aftur í skóla á mánudaginn og þá verður að vera búið að koma svefntímanum í réttan farveg aftur.

Sem sagt allt gott héðan á nýju ári!

Gleðileg jól!

2008-12-25T10:02:00.002+01:00

Við fjölskyldan sendum ykkur öllum okkar bestu óskir um gleðileg jól!

Við höfum það mjög gott hér í Danaveldinu. Jólaundirbúningurinn gekk vel og miðað við það sem við erum vön frá fyrri árum vorum við bara tímanlega með þetta allt saman. Á mánudaginn redduðum við síðustu pökkunum og sóttum hamborgarahrygginn sem var pantaður hjá slátraranum til að fá hann með beini. Á Þorláksmessu var jólagjafarúnturinn farinn. Í stað þess að keyra frá Kópavogi um alla Reykjavík og út á Seltjarnarnes með viðkomu í Mosfellsdal og enda á Selfossi var bara farið á einn stað - til Gedved!

Um kaffileytið á Þorláksmessu, eftir jólagjafarúntinn var komið að því að versla það sem vantaði í matinn. Við hálf kviðum því að fara með drengina í verslunarleiðangur um kaffileytið á Þorláksmessu, áttum auðvitað von á lööööngum röðum á kassana og troðningi í búðinni en létum okkur nú hafa það og stefndum í Bilka. Þegar þangað var komið var óvenju mikið úrval af bílastæðum og einstaklega rólegt í búðinni og engin röð á kassana. Danir eru sem sagt ekki að versla svona á síðustu stundu eftir kaffi á Þorláksmessu!!!!

Aðfangadagurinn hófst snemma (ca. kl. 06:15) hér á heimilinu eins og allir síðustu 13 dagarnir fyrir jól! Þrátt fyrir að hafa fengið að vaka lengi við að skreyta jólatréð og svoleiðis skemmtilegheit vöknuðu drengirnir eldsnemma til að kíkja á jólapakkann frá síðasta jólasveininum! Dagurinn gekk samt ótrúlega vel og voru þeir bræður ótrúlega góðir miðað við að sitja í stofunni með fullt af pökkum undir jólatrénu sem mátti ekki opna fyrr en klukkan sex!

Við ákváðum að hafa jólamatinn með hefðbundnu sniði, hamborgarahryggur með brúnuðum kartöflum og rauðvínssósu og sveppirnir góðu á sínum stað. Þrátt fyrir að allir hafi borðað á sig gat......... og rúmlega það...... sá varla högg á vatni, magnið hefði dugað fyrir a.m.k. tvær fjölskyldur í viðbót, en það er bara fínt - við höfum nægan tíma þessi jólin til að vera heima í rólegheitunum og borða afgangana.

Pakkamaraþonið var mikil skemmtun hér á heimilinu. Jóel Kristinn las á alla pakkana og þeir bræður voru þvílíkt glaðir með innihaldið. Það var alveg sama hvort pakkarnir voru mjúkir eða harðir, stórir eða litlir þeir voru alltaf jafn ánægðir með innihaldið. "Mig hefur alltaf langað í svona" "Mig langaði einmitt í svona vettlinga" .............. o.s.frv. Gaman að því! Foreldrar þeirra voru að sjálfsögðu einnig mjög ánægð með allt sitt. Við þökkum fyrir okkur!

Eftir pakkamaraþonið spiluðum við í smá stund fjölskyldan en svo voru drengirnir orðnir úrvinda af þreytu og vildu komast í rúmið......... í glænýjum náttfötum að sjálfsögðu.

Núna erum við fjölskyldan bara í rólegheitunum á jóladagsmorgni. Hugsum auðvitað heim í jólaboðin en í staðinn höldum við lítið jólaboð seinni partinn þegar Lilja, Jón Freyr og Benta Vala koma frá Gedved í jólahangikjötið.

Með jólakveðju,

Tilkynning um heimkomu!

2008-12-17T13:34:00.002+01:00

Við erum búin að kaupa flugmiða til Íslands!!!!

Komum seinnipartinn föstudaginn 6. febrúar og förum aftur snemma morguns mánudaginn 16. febrúar!

Bestu kveðjur,

...og hratt líður desember...

2008-12-16T14:44:00.003+01:00

Fannar Ingi jólaklipptur

Jóel Kristinn með jólaklippinguna sína

Tíminn líður hratt nú á gervihnattaöld, hraðar sérhvern dag, hraðar sérhvert kvöld..... sérstaklega nú þegar nóg er að gera!

Smám saman tekst okkur að undirbúa komu jólanna. Við höfum auðvitað aldrei áður þurft að hugsa fyrir því að eiga eitthvað í matinn um jólinn þar sem við höfum alltaf verið stanslaust í jólaboðum hjá öðrum og stundum tveimur á dag! .... en með kokkamenntaðan mann á heimilinu hefst þetta nú. Ég reyni svo bara að vera dugleg að leggja á borðið! (hehe)

Drengirnir fóru í jólaklippinguna í gær. Nú var sko engin kreppuklipping heldur bara alvöru töffaraklipping á íslensku stofunni niðrí bæ! Myndir af drengjunum nýklipptum fylgja hér með.

Annars er allt við það sama, búið að fara á julehygge í leikskólanum þar sem dansað var í kringum jólatréð og gengin Lúsíu-ganga. Þeir eru ekkert að stressa sig á því Danirnir hvort börnin eru með eða ekki í svona viðburðum og nú voru það bara 5 börn sem gengu (þar með yfir 15 sem gengu ekki). Fannar Ingi vildi ekki klæða sig í englabúning og ganga undir fögrum Lúsíusöngnum þar sem hann sagðist ekki kunna það......... þar með var það ákveðið!

Ritgerðarskrif og lærdómur eru bara á sínum stað. Við reynum að vera dugleg, gengur misvel svona þegar jólin nálgast en þetta reddast vonandi,

Bestu kveðjur,

Rólegur desember

2008-12-08T17:13:00.003+01:00

Hér er allt í rólegheitunum og í raun ekkert að frétta og þar með ekkert merkilegt til að skrifa um!

Við fórum reyndar í jólaföndur í skólann hans Jóels á fimmtudag þar sem við föndruðum músastiga og fléttuðum hjörtu auk þess sem við bjuggum til kertaskreytingar og fengum eplaskífur og jólaglögg. Mjög skemmtilegt.

Annars er ég húsmóðirin rétt að jafna mig eftir heila viku með hita og nokkra daga af stanslausum hósta sem hefur valdið því að ég hef bara verið hálfgerður aumingi. Helgi Kristinn hefur þvert á móti staðið sig með prýði og vann og vann um síðustu helgi. Á föstudaginn frá kl. 18 - 04:15 og svo strax aftur á laugardag frá 12 - 18. Hann var að þjóna í fínum veislum, bera fram mat, dæla bjór og svoleiðis. Kemur sér vel að fá nokkrar danskar krónur svona rétt fyrir jólin.

Það var nú reyndar annað stórafmæli í fjölskyldunni því hann Jóel bróðir eða Jóel frændi (fer eftir því hver talar) varð 25 ára þann 6. desember. Við fjölskyldan sendum honum að sjálfsögðu hamingjuóskir með stórafmælið.

Annars bara það sama verið að læra og læra og drengirnir að leika og leika...

Bestu kveðjur

Til hamingju með afmælið!

2008-12-03T11:50:00.003+01:00

Í dag er einn af þessum dögum þar sem það er pínu erfitt að vera ekki heima á Íslandi. Í dag á nefnilega mamman, tengdamamman og amman Anna Þóra 60 ára afmæli sem er sko bara ekkert smá!!
Við fjölskyldan óskum henni innilega til hamingju með afmælið!!!

Einn óvæntur kostur við að búa svona í útlöndum er að þá neyðist maður til að vera snemma í því með jólagjafirnar. Við erum sem sagt búin að afgreiða allar jólagjafir (nema hér inn á heimilið) og senda til Íslands. Lokaskiladagur á jólapökkunum til Íslands með skipinu er í dag sem er frábært fyrir fjölskyldu sem er vön að vera á síðustu stundu, korter í jól!

Nú er bara að setja í fluggírinn í lærdómnum. Helgi þarf að byrja að huga að prófinu sem hann fer í 3. janúar svo hann geti nú tekið sér eitthvað frí yfir jólahátíðina og ég þarf heldur betur að vera dugleg í ritgerðarskrifum. 2. janúar skila ég verkefnamöppu með fjórum verkefnum þar sem ég á eftir að gera eitt verkefnið og lagfæra hin, svo skila ég 40 blaðsíðna projekti um námsmat í stærðfræði (rúmlega hálfnuð með það), Rannsóknarritgerð í International and Comparative Education þar á ég eftir ca. 6 bls og svo að lokum prófverkefni í sama fagi þetta er víst alveg nóg fyrir desembermánuð!

Fannar Ingi og Jóel Kristinn eru alltaf jafn hressir borða nú súkkulaði í morgunmat á hverjum degi (jóladagatalið) og bíða spenntir eftir jólunum. Jóel talar ennþá eins og hann verði heima á Íslandi um jólinn en sættir sig nú samt alveg við að skreppa bara heim í vetrarfríinu í fyrri hluta febrúar. Fannar Ingi er bara alsæll, fagnar nú að hverjum morgni því að mega fara á leikskólann (eftir að hafa verið heima alla síðustu viku).

Bestu kveðjur

Óvenju róleg vika!

2008-11-29T22:55:00.003+01:00

Fyrsta vikan eftir Afmælið hefur svo sannarlega liðið hægt og rólega. Það tók nú flesta fullorðna í götunni a.m.k. fram á miðvikudag að ná nokkuð eðlilegri heilsu aftur eftir glæsilega frammistöðu í afmælinu. Íslendingar í "útlöndum" kunna sko alveg að skemmta sér og eru ekkert að láta gestgjafana þurfa að bera afganga af mat og drykk heim - virkilega tillitsamt fólk, Íslendingar í Árósum.

Fannar Ingi er búin að vera næstum því lasinn alla vikuna - fékk ekki að fara einn dag á leikskólann en varð samt aldrei almennilega veikur. Með góðan skammt af kvefi, eitt kvöld með verk í eyrunum eins og þegar hann var ungabarn og svo 5 - 6 kommur svona öðru hverju. Greyið var auðvitað hundleitt og t.d. á fimmtudag skreið hann skyndilega inn rúm og hágrét yfir örlögum sínum að þurfa að vera heima á meðan allir hinir voru að leika á leikskólanum! Það sem reddaði málunum var að hann fékk nokkur púsl í afmælisgjöf og núna er hann orðinn ansi leikinn með púslin sín enda margbúið að púsla hvert þeirra!

Jóel Kristinn hefur bara haft það gott í skólanum að venju. Fór í bæjarferðina sína með SFO-inu á mánudag og keypti nokkrar jólagjafir fyrir 30 krónur auk þess að vera boðið í pasta á veitingastað. Það hefur nú örugglega verið dálítið krúttað að sjá fimm, sex ára kríli í bænum að velja jólagjafir fyrir fjölskylduna. Á þriðjudag var svo julekagebagedag í skólanum hans Jóels. Þangað mættu foreldrar, börn og systkini úr bekknum hans Jóels. Við bökuðum piparkökur og súkkulaðibitakökur og tókst að innlifa okkur í danska jólamenningu með æbleskiver og soda eller öl! Það er hægt að sjá einhverjar myndir sem Helgi tók með símanum símum hér: http://share.ovi.com/hkh

Á föstudagskvöld var svo svona næstum því Þorláksmessa í miðbænum þegar það var miðnæturopnun í miðbænum og Julemanden kom til Árósa með tilheyrandi bílalest, lúðrablæstri og skrúðgöngu. Við vorum auðvitað mætt öll fjölskyldan með Sigurð Ragnar vin hans Jóels og svo Bentu Völu og fjölskyldu. Í bænum hittum við svo nánast alla hina Íslendingana úr götunni, Íslendinga úr skólanum hans Helga ........ svona er þetta hérna í Íslendingasamfélaginu.

Benta Vala gisti svo hjá okkur svo foreldrarnir gætu aðeins tekið þátt í skemmtanalífinu í Horsens. Það er sko bara fjör þegar hún er mætt og erfitt að láta sér leiðast. Hún er svo kraftmikil að "stóru" frændur hennar þurfa að hafa sig alla við og heilmikil svona "valdabarátta" á milli Fannars Inga og Bentu Völu. Það þyrfti líka að skrá sérstaklega niður það sem hún segir og gefa út sem brandarabók einhver jólin.... það sem veltur upp úr henni!

Nú þar sem það er sko algerlega miklu meira en nóg að gera í skólanum og Fannar var veikur heima alla vikuna (sem hjálpar víst lítið til í náminu...) þá hefur mér tekist að ná mér í hita og aumingjaskap! Það er nú samt bara tilfallandi og ég vakna án efa eldhress í fyrramálið!

Helgi mun síðan fara um næstu helgi og reyna að fá svolítið af dönskum krónum en honum hefur verið boðið tvö þjónadjobb í fínum veislum í gegnum vikar-skrifstofuna. Hann ætlar að vinna frá 18 - 04 á föstudag og svo strax aftur frá 12 - 18 á laugardag. Þetta er samt bara frábært því hver dönsk króna sem við fáum hér í Danmörku sparar svo margar íslenskar krónur á íslenska reikningnum okkar. Það getur verið mjög fróðlegt að reikna svona úr dönskum yfir í íslenskar. Þegar við fluttum hingað fyrir ári fengu danskir kennarar t.d rúmlega 300 þús íslenskar krónur en í dag líklega yfir 700 þús íslenskar. Samt hafa þeir ekki hækkað í launum og fá bara að það sama fyrir peninginn!!! - Jæja - það má hafa gaman af öllu!!

Bestu kveðjur í bili,

Blogg fyrir Þórunni!!!!!!!

2008-11-21T13:34:00.004+01:00

Já nú eru að renna upp svona einskonar áramót hér í Bögeskovparken. Síðustu mánuði hefur allt snúist um "fyrir" og "eftir" afmæli............ sko afmælið hennar Þórunnar. Þórunn (þessi sama og tekur að sér að passa börnin mín þess á milli sem hún hjálpar mér með hvítvínið...) verður sko 30 ára á sunnudaginn- og kemst þar með á fertugsaldurinn en á laugardagskvöldið verður partý aldarinnar haldið í veislusal hérna í götunni. Þar sem Íslendingarnir í götunni eru allir búnir að redda sér barnapössun - sem gerist nánast aldrei - hefur verið mikil tilhlökkun í götunni og "allt" snúist um hvað þarf að klárast fyrir afmæli og hvað tekur við eftir afmæli. Þar á meðal hafa Íslendingarir hópast í ræktina flesta morgna vikunnar til að komast í afmæliskjólana (sko stelpurnar) og strákarnir verðið að safna vöðvum til að vera færir um að sýna sig og sjá aðra .....

Þetta er líka svolítið blendin tilfinning fyrir Þórunni, því hún heldur að lífið sé bara nánast búið þegar maður kemst á fertugsaldurinn, ég hef ekkert verið að leiðrétta þann misskilning ... hún kemst bara að þessu á sunnudaginn!

Í tilefni afmælisins fá Fannar Ingi og Jóel Kristinn að gista í Gedved, sem verður öruggleg geðveikt (hehe - aulabrandari....) Þar verða þeir í góðum félagsskap Bentu Völu frænku sinnar og dýragarðsins hennar!

Annars að öðru en afmælisveislufréttum, Helgi fékk sitt fyrsta vikar-job í gær! Það var hringt í hann frá vikar-þjónustunni og hann beðinn um að mæta einn tveir og bingó í eitthvað tölvufyrirtæki í Skejby þar sem hann leysti af í eldhúsinu og eldaði kalkúnarétt fyrir 120 netnörda - og fór létt með það! Við vonum bara að hann fái einhver fleiri svona vikar -störf fyrir jól þar sem þar sem dönsku launin koma sér einstaklega vel þessa dagana.

Allt við það sama hjá okkur hinum - höfum það gott og öllum líður vel,

Jæja til hamingju með daginn á sunnudaginn Þórunn mín!

Jæja bestu kveðjur þangað til eftir afmæli,

Afmæliskveðjur heim og smá fréttir

2008-11-13T22:45:00.002+01:00

Áður en þið fáið nokkuð að vita um gang mála hér í Bögeskovparken þá viljum við byrja á því að senda ömmu Stínu á Seltjarnarnesinu kæmpe afmæliskveðjur frá okkur öllum! Hún á sem sagt afmæli í dag og við fengum okkur bara soðinn íslenskan fisk og kartöflur í matinn (það flokkast sko undir meiriháttar veislumat á þessu heimili!). Við hefðum auðvitað verið til í eitthvað gott á Unnarbrautinni en það býður bara betri tíma...

Stóru fréttirnar eru samt þær að við fjölskyldan verðum bara hér í Danaveldi um jólin! Það verður örugglega mjög skrítið og bæði erfitt og gaman. Við erum mjög vanaföst, búin að vera síðustu 14 jól í Lambhaganum og verðum því í fyrsta skipti bara við fjölskyldan á aðfangadagskvöld. Á jóladag höfum við alltaf fengið tvær hangikjötsveislur og svo farið í ótal jólaboð dagana á eftir.
Við verðum nú samt ekkert alein í allri Danmörku, Lilja og fjölskylda verða í Gedved þannig að við getum nú haldið a.m.k. eitt fjölskylduboð og svo verða allar íslensku fjölskyldurnar í götunni heima um jólin þannig að þetta getur bara orðið gaman.
Ástæðan fyrir þessu er nú fyrst og fremst tekin til að reyna að standa okkur sem best í náminu. Helgi fer í mikilvægt próf 3. janúar og ég á að skila öllum mínum verkefnum 2. janúar.

Það er eiginlega lítið annað að frétta! Allir glaðir og sælir í sínu. Þeir fullorðnu að reyna að sinna náminu eftir allra bestu getu. Ekki veitir af þar sem nóg er af verkefnum. Ég á t.d. að skila einu stærðfræðiverkefni nk. þriðjudag og svo öðru þremur vikum síðar. Fyrir 2. janúar á ég eftir að skrifa eitt projekt (að hámarki 40 síður) stefni á svona 33 - 35 síður þar og er búin með 4 blaðsíður. Síðan er ein 12 - 14 síðna rannsóknar ritgerð og önnur 5 síðna rannsóknargreining í öðru fagi að ógleymdum öllum lestrinum fyrir hvern tíma + dæmin sem maður verður víst að reikna fyrir tímana. Já - það þarf víst alveg að hafa fyrir þessu öllu saman!!!!

Bestu kveðjur,

Fyrsta foreldraviðtal skólastráksins Jóels

2008-11-05T20:54:00.002+01:00

Jæja á meðan húsbóndinn skellti sér í Boldspil med Fannar Inga skellti húsmóðirin sér upp í næsta strætisvagn (svona að dönskum sið) og niðrí Viby skole (sem er skólinn hans Jóels) þar sem boðað var til foreldraviðtals. Nú það er skemmst frá að segja að viðtalið gekk auðvitað rosa vel. Fyrsta setning kennarans var einfaldlega at "det er en pragtful dreng vi har" (sem er gott - ef einhver skyldi ekki skilja dönsku - hehe). Nú drengurinn er sem sagt læs á dönsku sem er mjög gott því það hefur enginn kennt honum að lesa á dönsku en einhvern veginn hefur hann bara lært dönsku hljóðin og bara les........... sem er gott!
Hann er líka búinn að taka þroskapróf sem er tekið af sálfræðingi og talpædagog og kemur út sem bráðduglegur og glaður drengur. Kennarinn er bara ánægður með dönskuna hans sem virðist ekki há honum svona í daglegum samskiptum. Svo vitum við foreldrarnir að hann er alsæll í skólanum og það skiptir auðvitað laaaaang mestu máli.

Nú en á meðan á þessu stóð "týndist" Jóel ... svona eiginlega! Hann átti að vera kominn heim með leigubílnum um 15:40-45 en rétt áður en ég þurfti að fara út til að ná strætó var hringt úr SFO-inu þar sem enginn bíll var kominn til að sækja hann. Jóel var búinn að fá leyfi til að fara til Sigurðar vinar síns á meðan ég væri í viðtalinu og ætlaði mamma hans Sigurðar að taka á móti honum fyrst leigubílnum seinkaði. Nú hélt ég bara af stað í rólegheitunum og í viðtalið en þá byrjaði síminn að hringja. Jóel hafði bara alls ekkert skilað sér heim og vonlaust var að ná sambandi við SFO-ið eða leigubílastöðina. Pabbinn áhyggjufullur í íþróttaskólanum, Þórunn nágranni hringjandi út um allt að reyna að hafa upp á drengnum og svo bættist við að kennarinn hans fór að reyna að hringja fyrir mig líka - en enginn náði sambandi við neinn sem vissi neitt!!! Nú eftir viðtalið rölti ég yfir í SFO- ið og fann drenginn þar og klukkan orðin 16:45 (hann á að vera sóttur 15:30). Þar var greyið búinn að bíða í klukkutíma og korter í útifötunum með húfuna á hausnum - öll önnur börn farin heim og Ove, pædagoginn í SFO-inu hans einn eftir með honum. Það besta var að leigubílstjórinn mætti svo loksins á sama tíma og ég...

Annars er hér allt í föstum skorðum, verkefnafjallið virðist nánast óyfirstíganlegt en að fenginni reynslu kemur þetta til með að reddast............ vonandi.

Bestu kveðjur,

Hér eru allir í fínu formi

2008-10-30T13:16:00.002+01:00

Eins og alltaf þá höfum við það gott hér fjölskyldan. Um síðustu helgi komu amma og afi á Selfossi til okkar og dekruðu við börn og fullorðna. Við fengum íslenskt lambalæri, íslenska ýsu, flatkökur og hangikjöt og svo auðvitað súkkulaðirúsínur og erum því voða íslensk í matarræðinu þessa dagana - og auðvitað þvílíkt ánægð með það!

Strákarnir fengu endalausa þjónustu hjá ömmu sinni sem las, spilaði og pússlaði eftir pöntunum - þvílíkt dekur!
Hápunktur helgarinnar var nú samt 3 daga afmælisveisla Fannars Inga. Á sunnudaginn hófst partýið með kaffiboði fyrir alla Íslendingana í götunni (og auðvitað Gedved-fjölskylduna). Á mánudag var afmælisdagurinn sjálfur og á þriðjudag var haldið uppá daginn á leikskólanum þar sem pabbinn mætti með græna drekaköku handa öllum börnunum á leikskólanum - það er sko alveg haft fyrir hlutunum!

En sem sagt vel heppnuð afmælishelgi með góðum gestum, veitingum og ánægðu afmælisbarni.

Nú tekur við lærdómsátak. Það er víst nóg af verkefnum sem bíða þess að vera kláruð.... Það kemur ekkert annað til greina en að nýta nóvember eins vel og hægt er til að eiga möguleika á að eiga smá tíma til jólaundirbúnings í desember.

Annars bara bestu kveðjur,

Haustfrí

2008-10-16T23:24:00.002+02:00

Við höfum haft í nógu að snúast að undanförnu!
Um síðustu helgi voru fimm börn hér á heimilinu, 2ja, 3ja, 5, 6 og 7 ára. Það vill svo vel til að allt eru þetta vel upp alin og góð börn þannig að ekki er hægt að kvarta. Eftir helgina höfum við samt verið að spá í það hvernig það væri hægt að koma svona mörgum börnum í tómstundir og veita hverju og einu næga athygli ef maður ætti 5 börn alla daga! En þetta gekk sem sagt svona líka ljómandi vel og helgin gekk aðallega út á að undirbúa mat, gefa að borða og ganga frá eftir matinn - með nokkrum ferðum út að leika svona inn á milli!

Íslenska kreppan er mætt hingað á heimilið í formi óvissu um hvenær og hvort hægt verði að millifæra nægan pening fyrir mat og reikningum við erum samt ekkert að stressa okkur á þessu - tökum á þetta íslenska "þetta reddast" hugsunarháttinn. Helgi bakar og bakar brauð (sem er sko bara enn betra) og matseðill heimilisins hefur aðeins breyst þar sem grjónagrautur og aðrir snilldarréttir fá meira pláss á matseðlum vikunnar!

Þessa vikuna er haustfrí í flestum skólum Danaveldis. Helgi þarf reyndar að mæta í skólann sinn og SFO-ið og leikskólinn eru opin þó að það séu ekkert svo mörg börn þar þessa vikuna. Jóel fór í SFO mánudag og þriðjudag. Þegar við sóttum hann mánudag var hann með nokkrum krökkum og SFO-pædagogunum að borða súpu úti á skólalóðinni en súpuna elduðu þau á báli. Á þriðjudag fór hann svo í dagsferð á leiksvæði einhversstaðar út í bæ - alltaf sama fjörið hjá honum. Fannar var á leikskólanum á mánudag og þriðjudag og fékk að fara með strætó i den Gamle by með hópa af leikskólakrílum á þriðjudaginn - voða gaman hjá honum líka.

Til að gera eitthvað í haustfríinu fórum við í dag með Þórunni og Jóa og börnunum þremur (sem voru hjá okkur um helgina) í Legoland. Þar skemmtum við okkur í rússíbönum, alskonar lestum, 4D bíó og og og ..... í allan dag. Auðvitað var kreppunni mætt með nestispökkum með heimabökuðu brauði og bakkelsi - bara gaman!

Sem sagt gott í okkur hljóðið og allir jákvæðir,
Bestu kveðjur

Um eitthvað annað en kreppuna...

2008-10-07T21:18:00.002+02:00

Lífið heldur víst áfram þrátt fyrir allt þetta krepputal!
Hér er allt í fullu fjöri. Indjánadagar hjá Fannari Inga á leikskólanum. Þemavika með heilbrigði, hollu fæði og hreyfingu hjá Jóel Kristni í skólanum. Þá er yngsta skólastiginu blandað í hópa þvert á aldur. Þeir drengirnir eru voða ánægðir með svona skemmtiprógramm í skólunum sínum - en ekki hvað!

Amma Guðlaug var hjá okkur um helgina. Það er alltaf jafn gaman fyrir drengina að fá að hitta afana og ömmurnar sínar. Þar sem Lilja, Jón Freyr og Benta Vala eru núna flutt til Horsens (eða reyndar Gedved) var amma fyrst hjá þeim og kom svo til okkar. Við fórum svo í mat til þeirra og þau til okkar þannig að þetta var bara ein alherjar fjölskylduhelgi!

Næstu helgi verður svo barnahelgi hér á heimilinu. Þá fáum við lánuð þrjú aukabörn og höldum þriggja daga partý!!
Næsta vika er svo efterårsferie hér í DK og þá taka Danir sér frí, við erum nú bara búin að vera hér í eitt ár þannig að við tökum bara hálfa viku frí og sinnum skólunum okkar hinn helminginn af vikunni.

Sem sagt allt í góðu hér!

Jóel Kristinn Helgason, yfirlit!

2008-09-26T15:03:00.004+02:00

Jamms - þar sem hér á síðunni eiga að vera aðgengilegar fréttir fyrir afa, ömmur, vinkonur og vini (og aðra forvitna - hehe) þá er best að gefa smá skýrslu um skólastrákinn Jóel Kristinn sem hefur líklega elst um 10 ár bara síðan í ágúst!!!

Viby skole: Drengurinn fer einn með leigubíl á morgnana í skólann (á kostnað kommúnunnar - og þar með kostnað skattborgaranna - og þar með á kostnað foreldra bekkjarfélaga Jóels ... hmmm). Í skólanum er hann mest í skemmtiferðum og afmælum. Á síðustu 7 skóladögum er hann búinn að fara í 3 afmæli, 1 sveitaferð, 1 vettvangsferð í mjólkurframleiðslufyrirtæki og 2 daga í skólanum! Í SFO-inu (eftir hádegi) gengur hann á stultum, tjúttar á beatboxnámskeiði, smíðar á tréverkstæði og fleira skemmtilegt. Síðan kemur hann heim með leigubílnum um kl. 15:30.

Tómstundir: Á fimmtudögum fer hann í spring-gymnastik. Þar hoppar hann á loftdýnu, stendur á haus og höndum og hoppar á trampolíni yfir á stóra dýnu. Á trampolíninu fara strákarnir í kollhnísa í loftinu, yfirslag yfir stóra mjúka dýnu (þ.e. að hoppa af trampolininu og upp á dýnuna þar sem lent er á höndum og svo farið yfir sig þannig að lent er á fótum á dýnu fyrir neðan) og ýmislegt fleira. Þetta gera þeir reyndar allt með þjálfurum sem nánast halda á þeim í gegnum ferlið en það er samt ótrúlegt að fylgjast með þessu öllu saman!

Á föstudögum er það svo fótboltinn. Það þarf nú ekkert að útskýra það neitt nánar en honum fylgja nú oft lítil mót um helgar þó að við höldum að það sé komið keppnisfrí - þangað til innanhúsfótboltinn byrjar.

Annað: Jóel fór í vikunni í fyrsta sinn aleinn á msn. Hann "talaði" við Kristínu Hrefnu frænku sína. Jóel skrifaði og las allt sjálfur þar sem mamman var bara að sinna þvottinum og pabbinn var úti og svo að undirbúa matinn! Drengurinn skríkti af gleði honum fannst þetta svo gaman! Nú er bara spurning hvort hann verður ekki að fá eigið netfang og msn svo hann geti bara sjálfur séð um að eiga samskipti við fólkið sitt á Íslandi - hehe

Jóel hefur líka tekið þvílíkum framförum í að teikna síðan að skólinn byrjaði. Ég læt fylgja eina mynd sem hann teiknaði handa mömmu sinni hérna við stofuborðið um daginn.

Læt þetta duga af honum Jóel Kristni í bili

Það er ekkert kominn vetur!

2008-09-23T13:54:00.002+02:00

Síðast þegar ég skellti inn smá bloggi, hélt ég því fram að það væri að koma vetur. Í augnablikinu virðist hann vera hættur við að koma þó að hitastigið sé nú kannski ekkert hátt, kannski 16° - 17° sem er bara fínt. Það er sem sagt sól og blíða hér og spáin fyrir a.m.k. næstu tvo daga er meiri sól og blíða. Tilvalið að skreppa með fjölskylduna í hjólatúra, skella sér í golf eða eitthvað álíka heilbrigt!

Erum reyndar ekkert stanslaust í hollustunni. Hér í götunni eru oft haldin matarboð og á föstudaginn fengum við íslenskt lambalæri með íslensku meðlæti og svo ýmislegt misóhollt eftir matinn. Sumum þessum matarboðum fylgir svo spilamennska fram á rauða nótt...

Við héldum svo íslensk kökuboð bæði á laugardag og sunnudag. Fengum Jódísi frænku hans Helga til okkar á laugardag með strákana sína tvo og á sunnudag kom skólabróðir Helga í heimsókn með fjölskylduna sína sem reyndar hefur stækkað síðan þá því að þau eignuðum son í gærkvöldi - gaman af því (kannski það hafi verið vöfflurnar sem komu öllu af stað)!

Jóel Kristinn er svo í stanslausum veislum í skólanum sínum. Það er nefnilega þannig að þegar einhver í bekknum á afmæli fer kennarinn með allan bekkinn heim til afmælisbarnsins og þar er haldin veisla. Þrjá daga í röð hafa stelpur úr bekknum átt afmæli. Á fimmtudag, föstudag og í gær (mánudag) fór allur skóladagurinn í afmælisveislu og til að krydda skemmtilegheitin í þessum skóla voru þau í sveitaferð á miðvikudag, þannig að í dag er fyrsti skóladagurinn í næstum viku!!! Það er líklega erfitt að láta sér leiðast í þessum skóla!

Fannar er bara eldhress í leikskólanum - er orðinn alveg sáttur að vera "einn" án stóra bróður.

Annars bara best að fara að sinna náminu svo maður komist út þegar strákarnir koma heim úr skólunum sínum.
Bestu kveðjur,

Rútínan

2008-09-13T21:27:00.004+02:00

Jóel Kristinn og Sebastian bekkjabróðir hans á fótboltaæfingu á föstudaginn.

Nú má eiginlega segja að það sé að koma vetur!

Ég fann það í gær þegar við fjölskyldan fórum á föstudagsfótboltaæfinguna en í stað þess að njóta sólarinnar á stuttermabolnum og safna lit þá var ég komin í jakka og að frjósa úr kulda. Það er kannski pínulítið undarlegt ef tekið er tillit til þess að hitastigið var þó 15°C !!! En 15° hér hljóta bara að vera eitthvað kaldari en 15° á Íslandi því það var skítkalt!

Nú eru tómstundamál vetrarins komin á hreint. Fannar Ingi fer í Boldspil í íþróttaskóla AGF á miðvikudögum, Jóel Kristinn fer í drengespring sem er fimleikahópur hjá Viby á fimmtudögum og á föstudögum fara þeir bræður báðir á fótboltaæfingu. Jamms, Fannar Ingi er sem sagt líka byrjaður að æfa, búin að vera með á 2 æfingum og er bara rosa duglegur, sérstaklega að gera æfingarnar. Hann er ekki alveg að skilja tilgangin í leiknum þegar það er bara einn bolti notaður í einu. Honum finnst meira gaman þegar hver og einn fær sinn bolta!

Við fórum í morgun á fótboltamót (eins og reyndar síðasta laugardag líka). Það er bara mjög hressandi að vakna snemma og skella sér út á fótboltavöll með drengina og hvetja liðið áfram. Í dag endaði mótið með því að allir fengu medalíur - það þykir nú ekki slæmt þegar maður er 6 ára!

Við fullorðna fólkið erum nú ekki með neinar svona tómstundir fastar á stundaskránni. Helgi er bara með myndavélina á lofti í tíma og ótíma og í þessum "töluðum" orðum er hann einmitt með myndavélina sem afsökun fyrir því að vera með Jóa nágranna sínum á fótboltamóti íslenskra karlmanna hér í DK!!! Á meðan hefur Þórunn nágranni minn (kærastan hans Jóa og kannski einhvern tímann tilvonandi eiginkona hans - hehe) verið að kynna mér sínar helstu tómstundir. En þar sem þetta er opin vefur þá er ég ekkert að útskýra það neitt nánar - hehe....................

Framundan er bara að keyra og sækja drengina í og úr skóla og tómstundum. Lærdómur og ræktin.

Í október fáum svo við heimsóknir. Amma Guðlaug kemur til okkar fyrstu helgina og amma og afi á Selfossi koma síðustu helgina í október.

Bestu kveðjur,

Endalaus gleði og rútínan byrjuð!

2008-09-03T08:54:00.004+02:00

Hæ hæ,
Það er sko hvorki hægt að kvarta undan aðgerðarleysi né skort á gleði hér í Bögeskovparken.

Við foreldrarnir á heimilinu skelltum okkur til Íslands um síðustu helgi í mjög stutt stopp - bara til að mæta í brúðkaupið hennar Regínu og auðvitað Svenna! Í stuttu máli var brúðkaupið stórkostleg skemmtun og endalaus gleði frá A - Ö!!!!!! Tónlistin í kirkjunni var gjörsamlega stórkostleg. Ég til dæmis grenjaði (eða táraðist) í fyrsta skipti yfir swing-lagi þegar Hera Björk, Margrét Eir og Heiða sungu Þú komst við hjartað í mér í frábærri útsetningu. Mér hefur alltaf þótt þær frábærar söngkonur en núna - bara enn betri!!! Það voru auðvitað fleiri tónlistarmenn í kirkjunni t.d. Friðrik Ómar og voru allir frábærir. Veislan var svo endalaus skemmtun, Friðrik Ómar og Hera Björk fóru gjörsamlega á kostum sem veislustjórar og þegar Aníta söng fyrir mömmu sína þá grét allur salurinn - enda var hún alveg yndisleg!

Helgi tók sérstaka mynd af Anítu til að sýna Jóel þar sem hún brosti fallega til hans. Þið hefðuð átt að sjá svipinn á honum þegar hann sá myndina af henni, fallega greiddri í brúðarmeyjakjólnum - það var sætt!

Nú á meðan við skemmtum okkur í veislunni voru drengirnir bara hjá nágrönnunum! Jamms - það eru ekki margir sem geta bara skilið börnin sín eftir í öruggum höndum nágrannanna - en það getum við! (kannski ekki á hverju degi samt .......... en svona einu sinni) Nú stöndum við í stórri þakkarskuld sem við finnum einhverja leið til að greiða.............

Fannar Ingi er ennþá oft leiður á leikskólanum þegar við komum að sækja hann. Hann er vanur að hafa stóra bróður og fullt af íslenskum börnum. Nú þarf hann stundum að vera einn með dönsku börnunum (sem reyndar eru fæst dönsk) sem tala bara dönsku og það þykir honum ekki nógu gott! En hann þarf að læra þetta og reyna að kynnast dönsku börnunum betur. Í morgun fór hann alsæll á leikskólann enda stendur til ferð niður í bæ að sjá Cirkus Charlie. Það vill svo skemmtilega til að Jóel er líka að fara með skólanum sínum á sömu sýningu. Þetta er allt í tilefni af Århus festuge sem er núna.

Annars erum við mjög ánægð með skólann hans Jóels Kristins, mikið um að vera og allt mjög skemmtilegt en á sama tíma afslappað. Hér á eftir er brot úr fréttabréfi frá SFO-inu hans (berið það saman við íslenska heilsdagsskólann -hmmm...) 0.B er bekkurinn hans Jóels og ég set hér inn smá sem tilheyrir bara hans bekk, hér kemur smá lýsing á því sem Jóel er að fást við á daginn:

"0.B er super udebørn. Vi er næsten ude hele dagen. Børnene kører moon-cars, spiller fodbold, laver flotte ting i ”Torbens skur” (træværkstedet), plukker brombær, graver mudderkanaler, hænger med hovedet nedad i klatrestativet, laver snobrød og mange flere ting. Rigtig mange børn har allerede lært at gå på stylter – de har øvet og øvet og er blevet rigtig gode til det. Vi nyder at vejret stadig indbyder til masser af udeleg, en regnbyge er ingen hindring – så HUSK regntøj, gummistøvler og skiftetøj. Mange børn vil gerne ud i regnen, men mangler nogle gange den rette påklædning. Sidst på eftermiddagen vil nogle af børnene gerne indenfor at lege, spille et spil og slappe lidt af. Alle de nye indtryk gør, ”at batterierne er lidt flade” sidst på eftermiddagen.

Så er vi startet på vores musikforløb med Jimmi og Sassi – Beatbox. Det er rigtig godt! Allerede første gang med Jimmi, lærte vi at synge afrikansk, danse og spille på tromme. Jimmi er alletiders og har musik helt ned i storetæerne. Vi glæder os til at møde Sassi næste gang.

Vi har været ovre i gymnastikhallen en gang. Det var en stor succes. Vi vil bruge gymnastikhallen ligeså meget, som det kan lade sig gøre. Vi skriver på tavlen udenfor klasselokalet, når vi går derover, så I ved, hvor I kan finde os.

Onsdag de. 3.9 tager vi i Cirkus Charlie i Festugen, I får nærmere besked herom."

Jamms - hér sé gaman. Þess má geta að Jóel Kristinn er einn af þeim sem er búinn að læra að ganga á stultum. Þetta eru svona alvöru stultur sem eru festar á fæturnar, þannig að hann hefur ekkert til að halda sér í!!!!! (ég verð að viðurkenna að ég var pínu stressuð þegar hann var að sýna mér listir sínar fyrst..... hehe)

Annars skólinn byrjaður hjá öllum, rútínan komin í gang. Best að fara að læra.
Bestu kveðjur,

Örstutt stopp á Íslandi - en án barna

2008-08-27T23:36:00.002+02:00

Jamms við hjónin erum að pakka niður til að koma heim í brúðkaupið hennar Regínu og auðvitað hans Svenna líka.

Komum seint á fimmtudagskvöld og förum aftur eldsnemma á sunnudagsmorgun þannig að við gerum nú ekki mikið meira en að mæta í brúðkaupið og fara aftur heim. Við þurfum nefnilega að drífa okkur aftur heim til að bjarga geðheilsu nágrannakonu okkar sem ætlar að passa strákana okkar tvo auk barnanna sinna þriggja ... það verður víst ekki mikið um rólegheit þar þessa helgina - þó svo að öll börnin fimm séu auðvitað draumabörn!

Erum búin að hafa það nokkuð gott hérna í vikunni. Héldum morgunpartý á sunnudaginn fyrir alla íslensku nágranna okkar. Allir komu með eitthvað gott á morgunverðarhlaðborð, íslenski fánin, húfur og fleira í fánalitunum skreyttu gestina og Danirnir á móti héldu líklega að við værum endanlega gengin af göflunum. Ekki hversu oft hefur maður tækifæri til að sjá Ísland leika til úrslita á Ólympíuleikum - það hefur nú verið haldið partý af minna tilefni.

Er að fara að pakka,
Bestu kveðjur,

Tíminn flýgur og áfram Ísland!!!!

2008-08-22T22:46:00.003+02:00

Það er eiginlega alveg ótrúlegt hvað tíminn líður alltaf hratt - einmitt þegar maður hefur það gott og tíminn ætti að silast áfram, ja svona til að fríið endist sem lengst! (maður verður auðvitað að sýna lit og vera aðeins á heimspekilegu nótunum Ólafi Stefánssyni til heiðurs ;-) )

Jóel Kristinn er núna búinn að vera alvöru skólastrákur í 2 vikur. Hann er mjög ánægður í skólanum, segist vera stilltur og prúður og við bara trúum því! Fyrsti foreldrafundurinn var haldinn á fimmtudagskvöld þar sem skólastarfið var kynnt. Það var mjög gaman að fá í fyrsta sinn að prófa að mæta sem foreldri í grunnskólann. Foreldrahópurinn virkaði mjög hress og skemmtilegur og "rifist" var um að fá að vera í foreldraráðinu - bara gaman! Það er ýmislegt í boði fyrir Jóel í SFO-inu er að byrja Beatbox-námskeið (söngur, dans, hljóðfæraleikur, sögur......) þar sem þau fá indverskan dansara og afrískan tónlistarmann og leikara sem kennara. Frítt og á skólatíma - flokkast sem lúxus!

Fannar Ingi á pínu erfitt á leikskólanum nú þegar stóri bróðir er farinn í skólann. Mætir sæll og glaður á morgnana en er oft lítill í sér og stundum grátandi þegar við komum að sækja hann. Er oft farinn að spyrja um mömmu sína, sérstaklega ef Ísak vinur hans er farinn heim. Þetta kemur nú samt vonandi allt saman hjá honum...

Við fjölskyldan skruppum til Köben með lestinni um síðustu helgi og fórum í Tívolí með ömmu Stínu og afa Jóel og "Svíunum" okkar. Alltaf gaman að koma í Tívolí. Horfðum á Ísland -Danmörk á bar í tívolíinu - bara gaman. Gengum líka um miðbæinn með öllum hinum túristunum. Kíktum á lífvarðaskiptin enda gistum við í frábærri íbúð nánast í bakgarði drottningarinnar. Strákarnir alsælir bæði með að fá að hitta ömmu og afa og frændur sína og að fá loksins af fara í lestina.

Vikan hefur liðið hratt. Handbolti, ræktin, keyra og sækja í skólann hafa verið helstu viðfangsefnin. Engum leiddist hér í dag þegar við horfðum á Ísland - Spán. Það var líka gaman að mæta með Jóel á fótboltaæfinguna strax eftir leikinn og ræða aðeins um handboltann við Danina!!!! Jóel þarf reyndar að sleppa einu fótboltamóti á sunnudagsmorgun þar sem við ætlum að horfa á úrslitaleikinn með nágrönnum okkar. Það verður sko þvílík veisla.

Áfram Ísland

Síðan síðast

2008-08-13T11:37:00.002+02:00

Hér sé stanslaust fjör og nóg um að vera!

Erum búin að hafa góða gesti frá Svíþjóð síðustu 5 daga, mikið fjör. Margrét systir með fjölskylduna eru búin að skoða með okkur miðbæ Árósa, Legoland og rigninguna þess á milli. Litlu frændurnir voru í stuði allan tímann - leiddist ekki augnablik, þannig að þögnin sem er nú í húsinu er nánast yfirþyrmandi (hehe). Hittum þau reyndar aftur á laugardag í Köben því afi Jóel og amma Stína eru um það bil að lenda í Kaupmannahöfn þar sem þau eru með íbúð á leigu í viku. Þangað eru Svíarnir farnir og við förum á eftir þeim um helgina. Að þessu sinni ætlum við með lestinni en þeir bræður Fannar og Jóel er þvílíkt spenntir að fá loksins að fá að fara í lestina ...

Jóel Kristinn var sem sagt í SFO-inu sínu í síðustu viku og gekk bara mjög vel. Á mánudag var svo fyrsti skóladagurinn með kennaranum og hefur drengnum bara gengið ljómandi vel. Hann kom heim með stærðfræðibókina sína þar sem foreldrar hans áttu að pakka henni inn í bókapappír! Þvílíkt föndur - að taka fagurskreytta, litríka og plasthúðaða bókina hans og pakka henni inn í brúnan umbúðapappír (minnir á svona ca. 1935 og reyndar kröfurnar í Landakotsskóla hjá Bentu systur hérna fyrir nokkrum árum). Í staðinn fékk mamman smá tíma til að skoða bókina sem á að duga börnehaveklassen í ALLAN vetur. Markmið bókarinnar er að nemendur geti talið frá 1 - 10, þekki hugtökin hringur, þríhyrningur og ferhyrningur auk þess að geta notað hugtökin stærri en, minni en og þar með borið saman (en samt bara 1 - 10).... Ég man ekki betur en að þetta hafi allt verið prófað í 3 og 1/2 árs þroskaprófinu - þar sem drengurinn svaraði nánast öllu 100%!!! Hann ætti sem sagt að geta staðið undir kröfum vetrarins...
Á sama tíma og kröfurnar til barnsins er að geta talið upp að 10 í maí/júní á næsta ári .... þá er búið að afhenta honum strætókort til að fara einn í strætó á ein stærstu gatnamótin hér í Viby (7 akreinar til að fara yfir á ljósunum...) - já maður verður eiginlega bara hálf ruglaður í því hvað 6 ára börn eiga að vera fær um!

Fannar Ingi fer létt með að vera án stóra bróður á leikskólanum! Fékk frí mánudag og þriðjudag til að vera með Tomma frænda og öllum hinum en nú er rútínan hafin og það er bara fínt.

Helgi Kristinn er kominn í sumarfrí númer 2 og er nú að glíma við bílaviðgerðir með aðstoð Jóns Freys. Gamli skrjóðurinn okkar er víst ekkert unglamb lengur og núna þarf að skipta um alla bremsudiskana og bremsuklossana. Ætluðum varla að komast heim úr Legolandi á mánudaginn og höfum ekki getað notað bílinn síðan þá.

Ég er búin að fá kennsluáætlanir og bókalista fyrir veturinn. Líst bara vel á! Verð í einu fagi hér í Árósum og öðru inn í Köben. Bæði líta bara vel út, mikill lestur og mörg verkefni, eeeen þannig á það víst að vera. Er líka að mæta í ræktina og skokkaði meira að segja hring hér í hverfinu snemma á sunnudagsmorgun - er á meðan er!

Jæja, þá er langlokunni lokið,
Bestu kveðjur

Fyrsta tönnin farin!

2008-08-05T22:01:00.002+02:00

Hér með tilkynnist að Jóel Kristinn Helgason, nemi er búinn að missa fyrstu barnatönnina. Fullorðins tönnin er nú þegar komin nokkuð langt upp en liggur bara fyrir aftan fyrrverandi barnatönnina sem hefur hangið laflaus síðustu daga og verið algerlega fyrir fullorðinstönnninni góðu!

Barnatönnin liggur nú undir kodda barnsins ...... hver veit nema það verði eitthvað annað undir koddanum í fyrramálið þegar barnið vaknar.

Þessi tannmissir hefur nú þegar lagt sitt af mörkum til þroska barnsins. Í kvöld er drengurinn lagðist upp í rúm tilkynnti hann móður sinni hátíðlega að nú myndi hann hvorki vilja vatnsglas né söng því hann væri orðinn stór strákur! Móðirinn samþykkti án andmæla.

Með kveðju frá skólastrákunum,

Eitt ár!

2008-08-03T12:43:00.002+02:00

Þá er komið eitt ár frá því að við fluttum hingað til Danmerkur!

Á þessu ári höfum við lært vægast samt mjög mikið....

Fannar Ingi var bara smápeð með bleiu þegar við fluttum en er núna "stór" strákur sem talar bæði dönsku og íslensku, hleypur hér sjálfur milli húsa til vina sinna. Hann er mikill rússíbanamaður og í skemmtigörðunum eru það bara hæðatakmarkanirnar sem stoppa hann af í tækjunum! Frá og með þriðjudeginum (þegar sumarfríið er búið) verður hann í fyrsta skipti einn á leikskólanum þ.e. án stóra bróður, það verður nú bara gott fyrir hann.

Jóel Kristinn var auðvitað orðinn nokkuð sjálfstæður og duglegur þegar við fluttum og hefur honum bara farið fram síðan þá. Hann er helsti framburðarsérfræðingur fjölskyldunnar er kemur að dönskunni. Hann er hættur á leikskóla og orðinn alvöru skólastrákur, byrjar meira að segja á morgun í SFO-inu (heilsdagsskólanum) og næsta mánudag (11. ágúst) í skólanum sjálfum!
Hann er búinn að keppa á nokkrum fótboltamótum og fá tvo verðlaunapeninga auk þess sem hann er mikill áhugamaður um hina ýmsu skemmtigarða!

Við foreldrarnir erum auðvitað búin að læra eitthvað smá í dönsku, kynnast fullt af nýju fólki, læra einhvern slatta í náminu okkar en umfram allt erum við búin að læra að slaka svolítið á og gefa okkur tíma til að vera saman fjölskyldan! (það á nú samt bara við þegar það eru ekki próf... en það eru svolítið oft próf...)
Helgi er nú búinn að kynnast nokkrum nýjum golfvöllum og eignast slatta af nýjum græjum á árinu ... hehe
Sjálf er ég nýbúin að prófa að vera stungin af geitungi og get sagt ykkur, að það er verra en ég átti von á!

Annars er bara gott að frétta af okkur hér í upphafi okkar annars árs í DK. Við erum búin að vera með góða gesti, afi Sæli og Benta frænka eru búin að vera með okkur síðustu daga og eru nú í Horsens hjá Lilju frænku og fjölskyldu. Saman erum við öll búin að taka hefðbundinn túristarúnt, þ.e. Djurs Sommerland, Löveparken og miðbæ Árósa, borða og slappa af!

Framundan eru svo góðir gestir frá Svíþjóð sem fá einnig einhverja góða túristameðferð!

Bestu kveðjur,

Lífið í hitabylgjunni

2008-07-27T21:31:00.004+02:00

Nú stendur yfir hitabylgja hjá okkur hér í Danaveldi!

Húsbóndinn á heimilinu tók sér frí frá inniverunni og við fórum öll fjölskyldan og eyddum föstudeginum í Djurs Sommerland. Í tilefni af háu hitastigi vorum við stærstan part dagsins í vatnagarðinum að sulla í sundlaugum, renna og almennt að fá smá brúnan lit!

Í gær var afmælisveisla í götunni, það var reyndar svo heitt í garðinum að flestir flúðu inn yfir heitasta tímann. Fórum svo eftir afmælið til Horsens að hjálpa Lilju, Jóni og Bentu Völu að flytja í íbúð þar sem þau ætla að búa næstu tvo mánuðina.

Í dag fórum við svo á ströndina. Það er alltaf gott að fara á ströndina í svona hita því það getur orðið ansi heitt hér í lokuðum garðinum! Hver veit nema við skellum okkur bara aftur á ströndina á morgun og náum okkur í smá meiri lit ... (Þórunn! líst þér ekki vel á það??? hehe)

Af Helga er það helst að frétta að hann er "alltaf " að kaupa sér nýtt dót! Í matarboði hjá Svenna og Regínu í Íslandsferðinni fékk hann þessa svakalegu flugvéla/þyrlu/fjarstýringa-bakteríu. Núna er hann búinn að lesa og lesa um fjarstýrðar þyrlur og kaupa sér tvær....

Bestu kveðjur héðan úr sólarlandaveðrinu,

Drengirnir í sumarfríi

2008-07-22T22:42:00.002+02:00

Hér á heimilinu ríkir mikil óregla varðandi svefntíma þeirra bræðra. Drengirnir "fengu" aldrei að fara að sofa á eðlilegum tíma á meðan veisluhöldunum á Íslandi stóð og nú eftir að heim er komið er erfitt að koma svefninum í rétt horf annað hvort er erfitt að sofna vegna fyrri óreglu eða eitthvað annað skemmtilegt að gera.

Fórum t.d. í dag í dýragarðinn í Álaborg. Lögðum ekki af stað heim fyrr en um hálf níu og þá átti eftir að keyra í rúman klukkutíma. Fannar Ingi sofnaði í bílnum en sá stóri (þessi með lausu tönnina) ekki fyrr en eftir að heim var komið. Annars var gaman í dýragarðinum, fullt af spennandi dýrum t.d. ísbirnir, ljón og tígrisdýr sem alltaf er spennandi að skoða, skemmtilegir apar og fleira. Þrátt fyrir öll þessi spennandi dýr fannst strákunum eiginlega skemmtilegast í klifrugrindinni og búðinn þar sem þeir fengu að kaupa sér smá dýr sem minjagrip...

Nú er bara að finna eitthvað skemmtilegt til að viðhalda óreglunni á þeim bræðrum næstu daga, framundan gott veður (ef veðurspáin rætist) þannig að við verðum bara úti að leika...

Bestu kveðjur,

Komin heim - búin að fara heim

2008-07-18T11:17:00.002+02:00

Við erum sem sagt búin að fara heim til Íslands og komin aftur heim til Danmerkur.

Íslandsferðin varð að einni alsherjar matarveislu! Nautalundir, lambalundir, kálfalundir, HUMAR, lambalæri... og allir hinir veisluréttirnir. Þetta kemur sér einstaklega vel þar sem næstu þrjár vikur mun húsmóðirin á heimilinu sjá um eldamennskuna að mestu, þar sem eiginmaðurinn verður meira og minna upptekinn!

Til að gera langa sögu stutta þá þökkum við bara öllum sem gáfu okkur góðan mat og góðan félagsskap kærlega fyrir okkur!

Nú erum við bara í rólegheitunum framundan mikil rigningahelgi samkvæmt veðurspánni, það er allt í besta, alltaf nóg hægt að þrífa ... og svoleiðis skemmtileg inniverk.

Þangað til næst...
Bestu kveðjur,

Erum að koma heim ... á eftir!

2008-07-05T08:32:00.003+02:00

Jæja, eftir frábæra viku í sumarfríi hér í Danaveldi erum við á leiðinni heim - verðum í 10 daga!

Við erum sko vægast sagt búin að hafa það gott hér í sumarfríinu. Fyrri hluta vikunnar voru strákarnir ennþá á leikskólanum og þá notuðum við tækifærið og fórum í golf á frábæran golfvöll hér í Árósum.
Nýju garðhúsgögnin okkar eru heldur betur búin að sanna gildi sitt - við erum heldur betur búin að sitja í garðinum, oft með nágrönnum okkar ...
Við fengum líka óvænta hringinu frá Simma og Hrund "matarklúbbs"vinum okkar en þau voru staðsett í sumarbústað hér rétt hjá. Við skelltum okkur til þeirra og gistum eina nótt. Fórum á ströndina og elduðum góðan mat og spjölluðum.

Jóel Kristinn er nú formlega hættur á leikskólanum og byrjar næst í Viby skole í byrjun ágúst. Kennslan byrjar 11. ágúst en hann byrjar fyrst í SFO-inu (skolefritidsordningin) þar sem hann fær nokkra daga til að kynnast krökkunum, skólanum og starfsfólkinu áður en skólinn byrjar formlega.
Fannar Ingi er auðvitað kominn í sumarfrí og fer næst "aleinn" á leikskólann í ágúst. Það verða viðbrigði fyrir hann að vera án bróður síns - en hann hefur sko bara gott af því.

Annars ætla ég núna að skella í ferðatöskur, og undirbúa ferð í Löveparken. Við ætlum nefnilega í dýragarðinn á leiðinni út á flugvöll.

Lendum í Keflavík seint í kvöld - sjáumst

Amma afmælisbarn!

2008-06-29T15:40:00.002+02:00

Í dag á amma Guðlaug afmæli - á eftir er afmæliskaffi og þar sem við getum ekki mætt, sendum við bara kveðjur á netinu. Til hamingju með afmælið amma Guðlaug.

Lilja frænka er reyndar nýbúin að eiga afmæli líka - svo við sendum henni líka afmæliskveðjur!

Annars bara ekkert nýtt. Erum búin að vera mest í því að borða og spila...........

Strákarnir að leika sér - eins og alltaf
Helgi í golfi - eins og hann myndi helst "alltaf" vilja vera...
húsmóðirin í tölvunni, búin að taka til, borða köku ...

Bestu kveðjur

Sumarfrí :-)

2008-06-27T16:33:00.002+02:00

Jæja, þá er þessari prófatörn lokið!

Þessa dagana erum við fullorðnafólkið mjög upptekið við að hvíla okkur, fara í bæinn og svoleiðis. Það er líka svo ánægjulegt fyrir okkur námsmennina að versla svolítið á útsölunum þar sem gengið á dönsku krónunni er "bara" rúmlega 17 núna.

Þannig að kannski við notum bara sumarfríið í að finna út hvernig við getum sparað...

Strákarnir eru svolítið í því að meiða sig þessa dagana. Jóel fékk gat á hausinn í síðustu viku, en hann harkaði það nú af sér og við slepptum því að heimsækja slysó - það er víst svo roooosalega löng bið þar og þetta var nú ekkert alvarlegt! Í dag var hringt af leikskólanum út af Fannari. Hann meiddi sig á puttanum sem bólgnaði vel upp og létum við læknirinn kíkja á puttann sem sem betur fer reyndist í lagi - bara bólginn.

Annars er núna komið helgarfrí ... framundan matarboð fyrir nágranna okkar sem björguðu okkur algerlega í upphafi verkfallsins þegar við allt í einum vorum upp fyrir haus í verkefnaskilum og próflestri og strákarnir heima - allan daginn!

Minnum svo á að við komum heim að kvöldi 5. júlí og förum aftur 15. júlí...

Bestu kveðjur,

Örstutt

2008-06-21T16:17:00.002+02:00

Hér er allt í rólegheitunum

Strákarnir alsælir með að vera komnir aftur á leikskólann!

Helgi Kristinn alsæll með að vera kominn í sumarfrí.

Ég alsæl með að það sér bráðum fyrir endann á þessara löngu verkefna- og prófatörn. Eitt próf eftir nk. miðvikudag!

Eftir miðvikudaginn verður svo hafist handa við að sinna öllu því sem ekki hefur verið sinnt sl. 1000 vikur (kannski smá ýkjur en mér líður samt eins og þess törn sé búin að vera svona lengi). Ofarlega á listanum eru hversdagslegir hlutir eins og þrif og svoleiðis en engu að síður mikilvægt má búast við ferð á golfvöllinn, í miðbæinn, á ströndina, út í garð að nota nýju garðhúsgögnin, dýragarðurinn með strákunum......................
Gott ef ég er bara ekki farin að hlakka til að vakna næsta fimmtudagsmorgun og byrja að vinna úr þessum verkefnum.

Komum svo heim 5. júlí og verðum í 10 daga!!!

Bestu kveðjur,

Ha! Verkfallið að leysast...

2008-06-13T18:20:00.002+02:00

Fékk SMS frá einni hér í götunni áðan - verkfallið er að leysast, leikskólarnir opna á fimmtudaginn!

Þetta passar vel fyrir strákana mína. Í síðustu viku léku þeir með afa og ömmu og þessa vikuna með Tinnu og Hörpu. Þær fara heim á mánudag og leikskólinn opnar á þriðjudag!

Helgi Kristinn er kominn í sumarfrí. Vaknaði með þvílíkt bros í morgun, bros af stærðargráðu sem hefur ekki sést lengi hér i Beykiskóginum. Nú er bara að sinna heimilinu og áhugamálunum á meðan húsmóðirin klára prófin sín "bara" 12 dagar eftir...

Kuldahretið sem Jyllands-Posten sagði yfirvofandi er komið. Hitastigið hefur farið allt niður í 16°gráður auk þess sem það hafa fallið nokkrir dropar! Þetta gengur náttúrlega ekki - persónulega finnst mér þetta nú ekki nóg til að tala um kuldahret og sumarlok - þetta er bara hin fínasta sumarblíða + örlítið auðveldara að hanga inni yfir bókunum í þessu veðri.
Annars vorum við að fá nýtt glæsilegt útiborð og stóla. Maður verður að eiga almennilegt sett svona þegar maður er svona mikið úti í garðinum!

Sem sagt framundan er í næstu viku:
Helgi Kristinn: sumarfrí (örugglega reynt að komast í golf!)
Lóa Björk: próflestur (próf mánudag og miðvikudag í næstu viku og svo eitt viku síðar)
Jóel Kristinn: fótbolti og leikskóli frá þriðjudegi
Fannar Ingi: leikskóli frá þriðjudegi - loksins!

Bestu kveðjur,

Hver er að sjá um börnin?

2008-06-08T15:38:00.003+02:00

Nú þegar verkfallið virðist verða endalaust og foreldrarnir alltaf í próflestri þarf einhver að sjá um börnin.

Drengirnir voru þvílíkt heppnir í síðustu viku en á sunnudagskvöld mættu hingað afi og amma á Selfossi tilbúin til að sjá um börnin alla vikuna - þvílíkur lúxus og þjónusta. Strákarnir nutu þess að þvælast um allt með ömmu og afa, í göngutúra, fótboltavöllinn og strætóferð í bæinn og svoleiðis. Á fimmtudag var svo Grundlovsdag sem er frídagur og þá fórum við öll í 3 ára afmælisveislu til Egå sem var mjög gaman! Afi og amma fóru svo heim á föstudagseftirmiðdag.

Fótboltinn hjá Jóel einkennir föstudaga og laugardaga þessar helgarnar. Um helgina fórum við með Jóel á mót í Solbjerg. Það er ótrúlega gaman að fara í alla þessa litlu bæi með flottu fótboltavellina að spila á mótunum, bæir sem maður annars kæmi líklega aldrei til!

Eftir fótboltamótið í gær fórum við (ekki pabbinn samt) í Legoland. Tilgangurinn var sem sagt að sækja næstu barnapíur en það eru sem sagt Tinna og Harpa sem eru úr Snælandsskóla. Við nýttum nú ferðina til að fara í nokkur tæki - auðvitað áður en við fórum heim með stelpurnar. Hitinn nú um helgina hefur verið "einum of" nánast bara erfitt að vera í bílnum á leiðinni í Lego þar sem hitinn í forsælu var kominn hátt í 30°.

Í dag eru svo strákarnir bara að þvælast um hverfið með Hörpu og Tinnu. Kíkt á leikvellina auk þess sem við fengum lánaða buslulaug í garðinn til að börnin réðu betur við hitann! Nú er svo komið að því að veðurspáin segir að næsta vika verði bæði kaldari og með rigningu. Reyndar stendur í Jyllands-Posten að sumarið sé búið í bili og kuldahret á leiðinni en skv. veðurspánni er það allt niður í 18° hita. (Ég sem hélt að 18° væri bara ágætishitastig!!!)

Jæja verð að halda áfram lestrinum,

Kv.

Bara að ítreka góða veðrið

2008-05-31T19:28:00.002+02:00

Bara svona ef einhver skyldi efast um að hér væri raunverulega alltaf svona gott veður!

http://www.mbl.is/mm/frettir/erlent/2008/05/31/solrikasti_manudur_i_danmorku/

Nú í góða veðrinu í dag sem var ennþá betra en síðustu daga þar sem hitastigið fór a.m.k. í 25 gráðurnar (í skugganum og vindinum - ekki á skjólsæla sólpallinum með gashitaranum...) höfðum við það alveg frábært.

Helgi fékk að eyða deginum í tölfræðiprófi og svo á bókasafninu þar sem stutt er í næsta próf!

Við þrjú (fréttaritari og bræðurnir) hófum daginn á fótboltamóti eða eiginlega fótboltamótum. Við vorum mætt galvösk á Viby völlinn kl. 9:00 í morgun þar sem raðað var í þrjú lið. Tvö liðin áttu að keppa á einu móti en eitt annars staðar. Við fórum með hópi til Harlev þar sem við héldum að við ættum að keppa en kl. 10 þegar mótið var að byrja kom í ljós að þarna átti Viby bara að vera með eitt lið en tvö á hinum vellinum í öðrum smábæ ca. 7 km í burtu. Við brunuðum ásamt einum öðrum bíl yfir í næsta bæ þar sem Jóel Kristinn spilaði þrjá leiki af miklum móð. Hann var rosalega duglegur, þeir voru ekki með neina varamenn þannig að hann bara hljóp og hljóp og hljóp og hljóp án þess að fá nokkra pásu því leikirnir voru hver á eftir öðrum þar sem við komum allt of seint á völlinn. Það var (og er) auðvitað sól og blíða hitinn kominn upp í 23° strax í morgun (fór miklu hærra seinni partinn) svo þetta var bara snilldarmorgun hjá okkur þremur!

Í dag eru svo bræðurnir búnir að vera úti að leika, þar af í nokkra klukkutíma í uppblásinni garðsundlaug hjá nágrönnunum þar sem buslað var í lengri tíma.

Pabbanum var svo bjargað af bókasafninu um 16:30..............

Rétt í þessu vorum við svo að koma inn úr garðinum þar sem við grilluðum BBQ ribs og pylsur og borðuðum úti.

Sem sagt það fer væntanlega ekki á milli mála að við höfum það gott,

sendum svo tiltektarkveðjur til ömmu og afa á Selfossi..........

Hið ljúfa líf vs. bókasafnslíf!

2008-05-29T18:18:00.002+02:00

Jæja, á þriðjudaginn var verkefnahlassinu skilað. Ég sem sagt náði að skrifa síðustu bókstafina í stærsta verkefnið rúmlega 5 að morgni ............ þá var úthaldið búið þannið að síðasti kaflinn í verkefninu var ekki einu sinni lesinn yfir............ hhmmmmmmmmm.
En mér eiginlega bara alveg sama ég er bara svo fegin að mér tókst að klára þetta að gæðin verða bara að koma í ljós. Aðalmálið er að ég náði að skila og uppfylla þar með lágmarksskilyrði til að fá að fara í próf!

Þetta tókst nú samt ekkert án hjálpar.............. ég er nokkuð viss um að það eru ekki allir sem eiga eins góða nágranna og við :-) Á mánudaginn fór Helgi snemma að morgni á bókasafnið enda próf hjá honum á þriðjudagsmorgni, eftir sat ég með þvílíkt magn af óunnum verkefnum og tvo yndislega drengi sem samt þarf nú að sinna. Fljótlega voru nágrannar mínir hér niður í dalnum (sami pabbinn og bjargaði allri síðustu viku og nú mamman á heimilinu líka sem var búin með sín próf) búin að taka yfir umsjá barnanna minna, þar fengu strákarnir að borða í hádegi, kaffi og kvöldmat auk þess sem afgangurinn af kvöldmatnum var sendur hingað til mín þannig að ég fékk líka að borða! (........ samt bara fyrir framan tölvuna þar sem ég mátti engan tíma missa). Strákana fékk ég svo senda hálfsofandi í teppum hingað heim, rétt kyssti þá góða nótt og hélt svo áfram lærdómnum. Þvílíkt þjónusta!

Ég er algerlega búin að komast að því að ég á sko ekki að þetta prófskírteini mitt úr neinum Coco Puffs pakka! Verkefnin töldu sem sagt vel á annað hundrað síður sem er mun meira en lokaönnin þegar kandidatsritgerðinni verður skilað (mastersritgerð). Um morguninn um klukkan 05:30 fékk ég email frá einni sem ég var að vinna eitt verkefnið með en hún var þá að klára að fara yfir leiðréttingar í verkefninu okkar, og um tveimur mínútum seinna fékk ég email frá þeirri sem ég var í samstarfi við í stóra projektinu mínu. Þannig að það var sko ekki bara ég sem vakti alla nóttina til að klára. Þegar ég skilaði verkefnunum mínum svo á skrifstofuna hér í Árósum voru þar nemendur úr öllum deildum að skila. Þegar ég rétti fram verkefnin mín var ég spurð hvort ég væri að skila svona miklu? Ertu í þremur fögum? Nei, nei, svaraði ég bara venjulegu námi. Það besta er að samstarfskonan mín var líka spurð að þessu inn í Kaupmannahöfn þegar hún skilaði en það er víst þannig að allar aðrar deildir þurfa bara að skila ca. eðlilegum blaðsíðufjölda....................
En svo er það náttúrlega Pollýannan í þessu....... spáið í það hvað ég læri miklu meira á þessu en allir hinir....................... hehe.

Helgi er, var og verður á bókasafninu...............

Strákarnir mínir eru búnir að endurheimta móður sína. Á þriðjudaginn þegar ég skilaði biðu þeir nánast við útidyrnar eftir mín og settust bara niður og gáfu endalaust knús. Í gær fórum við svo með tveimur nágrannafjölskyldum okkar í Djurs Sommeraland þar sem börn og fullorðnir léku sér ALLAN daginn. Ég fékk að fara tvisvar í nýja stóra rússíbanan - sem er frábær og öll hin tækin og strákarnir fengu líka að leika sér - hehe! Við þrjú vorum sko öll dauðþreytt en alsæl þegar við sóttum aumingja pabbann á bókasafnið um níuleytið um kvöldið. Hann lærði tölfræði á meðan............

Við þrjú áttum aftur yndislegan dag í dag. Úti var auðvitað sól og blíða (eins og svo oft áður) og við fórum í gönguferð með Sigurði Ragnari vini Jóels, mömmu hans og litlu systur niður á Viby Torv. Það fórum við í búðir og kaffihús........ sem selur hvítvín og Nachos, ökologiskan solberjasafa og muffins............ og allt hitt sem við keyptum ekki! Löbbuðum svo aftur heim mörgum klukkutímum síðar með barnakerrur sem varla sást í fyrir innkaupapokum! Bara gaman, síðan er bara endalaust verið að hygge sig, þangað til að næsta törn tekur við.

Ef einhver hefur sérstakar áhyggjur af því að Helgi fái ekki að gera neitt skemmtilegt á meðan við hin höfum það svona gott - þá vil ég minna á að Helgi klára prófin 12. júní en ég 27. júní þannig að fær þetta allt til baka síðar - hehe

Bestu kveðjur héðan úr hinu ljúúúúfa lífi.......

This is my life!!!!!!!

2008-05-24T14:20:00.002+02:00

Jæja hér er lífið í Beykiskóginum í "stuttu" máli:

Jóel og Fannar hringsóla hér hálf sjálfala um göturnar í verkfalli leikskólakennaranna sem nú hefur staðið yfir í viku. Ólíkt því sem myndi gerast heima á Íslandi - er ekki nokkur maður að stressa sig yfir þessu! Danirnir taka sér launalaust frí frá vinnu, með bros á vör, pínu svekktir með þetta en laaaang frá því að kvarta, sådan er det bare! Fjölmiðlarnir fjalla nánast ekki neitt um málið, enda ekkert að gerast og "enginn" með áhyggjur af því! Í vikunni var t.d. í Nyhedsavisen meira fjallað um kostnaðinn við lífrænt ræktað fæði inn á leikskólana árið 2010 en það að þessa dagana (vikurnar) væri leikskólinn lokaður og gríðarlegur fjöldi foreldra í vandræðum..........
Nú þetta hefur nú samt allt gengið - auðvitað - strákarnir fengu stærstan hluta af vikunni gott húsaskjól og góða þjónustu hjá pabba vinar síns hér í götunni sem hefur algerlega bjargað okkur fyrir horn!

Helgi er nánast fluttur búferlum á bókasafnið. Prófin eru 5 talsins þar af tvö sem hann hefur miklar áhyggjur af og þarf að leggja allt í sölurnar.............

Skiladagurinn mikli er handan við hornið. Mér reiknast til að ég þurfi að prenta út u.þ.b. 390 bls. til að skila. Þetta reikna ég þannig að samtals blaðsíðufjöldi allra verkefnanna er um 130 síður og ég þarf að skila öllu í 3 eintökum! Ég á ennþá slatta eftir. Þar sem dagarnir nýtast ekki alveg nógu vel, þó svo að þetta séu ótrúlega góðir drengir sem ég á - þá hef ég verið að reyna að skrifa á kvöldin og frameftir en þá er meiri friður hér á heimilinu!

Eeeen ég get samt EKKI skrifað í kvöld!!!!!!!!!!!! Ó NEI !!!!!!!!!!!!!!

Ég get ekki einu sinni almennilega lýst því hvað ég er ótrúlega sátt við Eurovision frammistöðu Íslendinga í ár. Það er ekki nokkur vafi á því að þó svo að Regína og Friðrik vinni ekki keppnina sjálfa þá eru þau nýjir Evrópumeistarar í útgeislun!!!!!!!!! En það er allavegna ljóst það er ekki séns að nokkur læri á þessu heimili í kvöld. Hér verður fylgst með Eurovision og skálað fyrir Regínu!

Jæja this is our life!
Bestu kveðjur,

Jú, jú, ennþá sól og blíða eeeeeeeennnn

2008-05-15T20:32:00.003+02:00

Nú held ég bara að einhver sé að grínast í okkur og að á mánudaginn sé aftur kominn 1. apríl!

Sko málið er:
1. Helgi er í prófum, og þarf að lesa fyrir þau nánast 24/7 ........ svoleiðis er þetta hjá háskólanemum!
2. Ég er í verkefnavinnu, á núna í þessum töluðu orðum 44 bls eftir (þökk sé frábærri frammistöðu í dag að það er ekki meira - var í vinnustuði). Þessum 44 bls (ásamt því sem er nú þegar búið) þarf að skila fallega frágengnu, yfirlesnu o.s.frv. 27. maí!

Þetta þótti okkur hjónum alveg feikigóður verkefnaskammtur og sáum fram á að reyna að skiptast á með börnin milli kl. 4 og 8 (frá því að leikskólinn er búinn og fram að háttatíma)
eeeeeeeeeeeen
Þá kom skellurinn!!!!
Verkfall. Jamms á mánudaginn næsta (í prófa- og verkefnavikunni miklu) fara leikskólakennarar í Árósum í verkfall! Sérfræðingar telja enga von um lausn þar sem því hefur verið líst yfir að ekki verði gengið að frekari kröfum pædagoganna! Nú og ekkert mun gerast fyrr en í fyrsta lagi 29. maí þegar úrslit eru ljós úr annarri kjaradeilu sem leystist í síðust viku.
Góða skemmtun við - í næstu viku.
Vil samt taka það sérstaklega fram að auðvitað reddast þetta allt hjá okkur - og við styðjum að sjálfsögðu kjarabaráttu pædagoganna...............
Og ef einhver hefur áhuga segja blöðin laun þeirra vera ca. 23.000 dkr (x 16) og hækkunin sem þeim var boðið - en þeir felldu var 2000 - 3000 dkr (x 16 =isl. kr)
Hér sé og verði fjör
Farin að læra - og

Ennþá meiri sól og blíða

2008-05-12T10:07:00.003+02:00

Jæja - þá er hitinn búinn að ná 26° - sko í forsælu!
Verkefnin eru öll á sínum stað því í svona góðviðri getum við Íslendingar bara ekki setið stanslaust inn og lært! Það þarf að nota veðrið...................
Við höfum meira að segja verið að brenna okkur á því að halda að börnin þurfi alltaf að vera úti að leika í góða veðrinu, en svo kemur bara í ljós að svona um miðjan daginn fá þau bara alveg nóg og verða að fá að koma inn og leika inni "í kuldanum"!

Helgin hefur mjög góð hjá okkur.
Á föstudag hófum við leikinn á fótboltaæfingu með Jóel, auðvitað í brakandi sól og blíðu. Um kvöldið var svo sannkallað stelpudjamm. Þá safnaðist saman hópur af íslenskum "stelpum" sem eiga það sameiginlegt að vera vinkonur Þórunnar hér í götunni og svo var bara fjör fram eftir öllu. Ég fór sem sagt í fyrsta sinn niður í bæ (að kvöldi - um helgi) hér í Árósum. Tímasetningin vekur athygli nú þegar verkefnin bíða, sólin tekur frá manni allan daginn þá allt í einu hlaðast upp pókerkvöld og stelpudjömm............ (það hlýtur að vera langt í 27. maí - sko skiladaginn mikla)

Á laugardagsmorgun fórum við og keyrðum Helga eldsnemma (kl. 10) upp í skóla - á bókasafnið! Nú það var sem sagt sól og blíða og ég og strákarnir byrjuðum á því að fjárfesta í sumarfötum handa strákunum. Hluti af því var reyndar afmælisgjafir. Síðan tók bara við góður dagur í sólinni. Ég var með öll verkefnin tilbúin á borðstofuborðinu en eyddi samt stærri hluta af deginum út í garði og með strákunum. Það er víst þannig að strákarnir þurfa sína athygli og manni verður ekki sérstaklega mikið úr verki einn með þá. Við sóttum svo pabbann seinni partinn og grilluðum lambalæri og borðuðum úti í garði - þannig að húsbóndinn fékk smá sól.

Pinsedagen var dejlig! Við fórum í Djurs Sommerland sem er einn alskemmtilegasti fjölskyldugarðuinn hérna á svæðinu og er af nógu að taka! Þar voru fleiri nágrannar svo þetta var ennþá skemmtilegra fyrir vikið. Strákarnir nutu þess að leika og fara í tækin með vinum sínum. Það var farið í stelpuferð í nýja rússíbanann í Djurs - sem er geeeeðveikur! Strákarnir fengu bjór í laun fyrir að passa börnin á meðan. Annars er garðurinn fullur af skemmtilegheitum og á einum degi notar maður bara hluta af garðinu - en við erum með árskort þarna þannig að við förum bara aftur - og aftur...............

Nú er 2. pinsedag - og frí í leikskólanum. Það styttist í fyrsta prófið hjá Helga, hagfræðipróf úr efni heils vetrar! Hann á því daginn í dag, ég mun sitja við tölvuna og reyna að skrifa eitthvað þess á milli sem ég sinni börnunum og fer í eftirlitsferðir um hverfið - þar sem börnin eru úti að "nota" góða veðrið! Á morgun verða strákarnir svo einir heima - þeir eru að verða vanir - þar sem ég fer til Köben í tíma á þriðjudag og miðvikudag auk þess sem ég verð að vinna með hópnum mínum í stærsta verkefninu mínu.

Annars bara lærdóms- og sólarkveðjur

Jóel 6 ára

2008-05-08T23:21:00.002+02:00

Nú eru sem sagt liðin 6 ár frá því að Jóel Kristinn Helgason kom í heiminn! Við héldum auðvitað upp á tímamótin - öll fjölskyldan.

Dagurinn hófst með pakkaflóði uppi í rúmi þar sem þeir bræður (hjá Fannar Ingi fékk líka pakka) rifu utan af fyrstu pökkunum. Jóel var í stuttu máli ánægður með allt sem hann fékk. Sagði eftir hvern pakka - skælbrosandi - "þetta var einmitt það sem mig langaði í ".
Nú þar sem pabbinn á heimilinu átti að mæta klukkan 8:00 í skólann ákváðum við hin að taka því aðeins rólegra og labba bara í rólegheitunum. Reyndar ekki að labba því Jóel fékk hlaupahjól í afmælisgjöf og gaf um Fannari gamla hlaupahjólið sitt. Strákarnir fóru því á hlaupahjólum í leikskólann þar sem börnin tókum fagnandi á móti Jóel, búin að vera að teikna myndir og pakka inn fyrir hann. Gaman að því!

Foreldrarnir eyddu svo deginum í undirbúning afmælisveislu - enginn lærdómur í dag (tvöfaldur á morgun í staðinn!!!!). Klukkan tvö var svo afmæli á leikskólanum. Þá mættum við með ís sem Jóel bauð félögum sínum á leikskólanum upp á - ekki slæmt fyrir þau að fá ís í hitanum en það var um 23° í forsælu í dag. Helsta vandamálið var að ísinn bráðnaði svo hratt í sólinni að krakkarnir þurftu öll að flýta sé að borða ísinn.

Íslensku leikfélagar Jóels í götunni komu svo í veislu strax eftir skóla/leikskóla. Það var þvílíkt gaman - allir stilltir og prúðir og skemmtilegir. Það var sjóræningjaþema í afmælinu og Helgi bjó til ótrúlega flotta sjóræningjaköku. Við fórum svo í sjóræningjaratleik um hverfið þar sem krakkarnir stóðu sig ótrúlega vel. Um klukkan 18 komu svo fullorðnafólkið og litlu og stóru börnin í götunni í grill. Við settum bara upp svona langborð út í garði í hitanum og grilluðum pylsur og kjúkling og höfðum það huggulegt - við búum jú í Danmörku þar á maður að hafa það huggulegt.

Frábær dagur
kv.

Góðviðrisdagar í Árósum

2008-05-05T19:57:00.003+02:00

Jæja þá er draumahelgi að baki
Amma Guðlaug í heimsókn frá miðvikudagskvöldi til sunnudags. Þá var reynt að slaka á, verið úti að leika, farið í bæjarferð með ömmu (sko bara amma og strákarnir), spilaður póker öll kvöld (sko bara amma og fullorðna fólkið), farið á kræmmermarket og lystbådehavnen í þvílíkri sól og blíðu.

Nú er sumarið greinilega komið. Hitastigið komið í 20°, sólin skín núna dag eftir dag, allir að taka smá lit og hárið á strákunum að lýsast aftur.

Nýjasta græjan hans Helga er sími. Það hefur sína kosti og galla eins og alltaf. Gallarnir eru augljóslega allur sá ómældi tími sem fer í að læra á hvern einasta "fídus" í símanum. Kostirnir eru að auðvelt er að taka fínar myndir á nýja símanum og senda þær beint inn á netið. Slóðin hans Helga er: http://www.flickr.com/photos/23533601@N07/. Þarna er einhverjar myndir m.a. frá því um helgina.

Nú eru bara 3 dagar í afmælið hans Jóels Kristins - sumir eru farnir að hlakka til.

Bestu kveðjur

Töffaradrengir

2008-04-26T11:00:00.003+02:00

Jóel Kristinn rétt fyrir páska
Fannar Ingi á fimmtudag

Þeir bræður eru opinberlega yfirlýstir töffarar - hér með!!

Það var reyndar fyrir páska sem Jóel Kristinn fór með pabba sínum í klippingu og kom heim með þvílíka töffaragreiðslu. Fannar Ingi var veikur heim og fékk því ekki að fara með en nú er búið að bæta úr því og fóru Fannar og Helgi í feðgaferð í klippingu á fimmtudaginn. Hér að ofan má sem sagt sjá útkomuna. Þess má geta að við förum alltaf á íslenska hárgreiðslustofu - auðvitað - allt svo íslenskt hjá okkur hér í DK!!! hhmmmmmmmmmmm

Annars er bara allt á fullu í lærdómi og útiveru í góðu veðri. Strákarnir þrír voru einir heima tvo daga (eina nótt) í vikunni þegar húsmóðirin skellti sér í verkefnavinnu í Köben. Þeir létu sér ekki leiðast og héldu grillpartý bæði kvöldin! Nú er bara verið að reyna að vinna og vinna, það verður að viðurkennast það þetta er ansi tæpt hjá mér með að ná að ljúka öllum verkefnunum. Ég á eftir að skrifa u.þ.b. 106 bls. af skilaverkefnum á 30 dögum (skil 27. maí) fyrir utan vikulegan lestur og dæmi fyrir fyrirlestrana sem hefur yfirleitt verið nóg fyrir vinnuvikuna! Var t.d. til kl. 00:00 í gærkvöldi og ætla nú snarlega að hætta þessu blog-veseni til að halda áfram!!!

Verð samt að minna ykkur á þá merkilegu staðreynd að það eru bara 12 dagar þangað til Jóel Kristinn verður 6 ára!!!!!!!!!! Getur það verið - hann sem fæddist eiginlega bara í fyrradag! En áður en að því kemur fáum við ömmu Guðlaugu í heimsókn. Það er eins gott að drífa sig í að læra svo maður nái a.m.k. að segja hæ og kannski aðeins að njóta þess að fá hana í heimsókn - þrátt fyrir annatíma.

Bestu kveðjur úr Beykiskóginum sem er að verða sumar-grænn!

Gaman hjá okkur!

2008-04-20T21:11:00.002+02:00

Þá er helgin eiginlega liðin! Að þessu sinni var löng helgi þar sem að á föstudaginn var store bededag og þá eru auðvitað allir í fríi.

Við héldum upp á daginn með því að fara í Cirkus!! Þetta var sko svona alvöru - Cirkus Arena - 3 tíma show með fílum, hestum, sæljónum, trúðum, akrobati, Kung-fu listamönnum, brasilískum mótorhjólamönnum sem keyrðu í lítilli kúlu - fimm í einu!!! - og miklu miklu fleira. Þetta var skemmtun fyrir alla fjölskylduna - ekki bara minni börnin.........

Á laugardaginn fóru strákarnir í afmæli hjá vinum sínum og jafnöldrum hér í götunni. Bræður sem héldu upp á 4ra og 6 ára afmæli í sól og sumaryl. Við fullorðna fólkið söfnuðumst saman í öðrum garði og sóluðum okkur á meðan. Eftir laugardagsgrillið okkar var svo spilað við nágrannana.

Í dag var ekki ský í himni - í allan dag! Þvílík veðurblíða. Við bara sátum í garðinum, bökuðum sunnudags-súkkulaðikökuna og höfðum það gott. Seinni partinn skruppum við svo í göngutúr um lystbådehavnen að skoða allar flottu skúturnar. Þetta er æðislegt svæði - með veitingastöðum og huggulegheitum að dönskum stíl. Eigum pottþétt eftir að taka að skreppa þangað oftar. Ótrúlegt hvað það virðist endalaust vera hægt að finna nýja og nýja skemmtilega staði til að skreppa á hér í Árósum!

Eins og sést á þessari upptalningu - var EKKERT lært um þessa löngu helgi. Það var fyrst og fremst vegna veðurs - hmmmmm - en hvernig verður þetta þá í júní ef ekki er hægt að læra vegna veðurs í apríl!!!!!!!!!!
Nei, nú verða námsmennirnir að taka sig á og setja í gírinn - Power study alla næstu viku - ekkert annað í boði!!!

Jóel Kristinn er loksins búinn að fá bréf frá kommununni varðandi skóla fyrir næsta vetur. Hann var sem sagt metinn (úr dönskuprófinu - í janúar) þannig að hann fer í venjulegan bekk með meðalstuðning í dönsku. Það er bara fínt. Þar sem það er kvóti á fjölda tvítyngdra barna í hverjum bekk fékk hann ekki boð um hverfisskólann - eins og við bjuggumst eiginlega við - en fékk boð um Viby skole, sem er ekkert mikið lengra frá en hverfisskólinn. Það verður vonandi bara allt í lagi. Það eru reyndar nánast engar upplýsingar um skólann á netinu þannig að við vitum lítið um þennan skóla - annað að hann er þekktur fyrir að vera með mörg tvítyngd börn og kemur vel út úr 9. bekkja prófunum hér í DK.
Nú er bara að fara að huga að undirbúningi 6 ára afmælis stóra stráksins!!! Það er eiginlega bara ótrúlega stutt í 8. maí!
Verð að bæta við einu sætu gullkorni frá kvöldverðarborðinu áðan. Allt í einu og alveg upp úr þurru segir drengurinn: "Mér finnst mjög leiðinlegt að amma mín fótbrotnaði aftur!" (Amma Lóa er nefnilega búin að lærbrotna tvisvar í vetur). Það er sem er nú fallegast við þetta að hvorki amma Lóa né nokkuð henni tengt var til umræðu þannig að þetta koma bara beint frá hjartanu! Sætur!

Annars bara lærdómskveðjur,

fréttir úr sólskininu........

2008-04-15T13:08:00.002+02:00

Hér er bara komið alvöru vor - svona eiginlega íslenskt sumar! Nú er t.d. sól og blíða um 13°C sem er bara frábært.

Staðan á fullorðna fólkinu er þannig að það styttist í próf og alls konar verkefnaskil en mikið magn óunnið. Þannig að það er nokkuð ljóst að við verðum að reyna að halda okkur aðeins innan dyra og stunda námið - við fluttum jú hingað til að læra!

Í síðustu viku voru strákarnir einir heima í tvo daga þar sem ég þurfti að vinna í hópverkefni inn í Köben. Það gekk bara vel og er ljóst að þeir geta verið einir heima, a.mk. í stuttan tíma í einu!

Um helgina höfðum við það bara rólegt og gott. Byrjuðum helgina á fótboltaæfingu og pizzu á föstudagseftirmiðdaginn. Á laugardeginum fórum við í óvissuferð hér um nágrennið okkar og uppgötvuðum nýjan leikvöll hér í nágrenninu sem við vissum ekkert um. Þar voru lítil fótboltamörk þar sem við kepptum í fótbolta mamman og Fannar Ingi á móti Jóel og pabbanum. Úrslitin voru þannig að Jóel tryggði sínu liði sigur m.a. með þvílíku glæsimarki að annað eins ................... Þarna var líka klifurveggur og fleira spennandi fyrir börn á öllum aldri, mjög gaman.

Á sunnudaginn skruppu strákarnir saman að veiða og fundu skemmtilegan stað hér ekki svo langt frá - það veiddist reyndar enginn fiskur en strákarnir höfðu allir gaman af þessu. Mamman tók svo á móti veiðimönnunum með vöfflum og fór svo út að leika á meðan pabbinn kíkti í bók - já það verður að lesa líka ekki bara að hafa gaman og slappa af.

Reyndar er það þannig að sunnudagskvöld eru orðin uppáhaldskvöld strákanna. Þá fá þeir að slást við pabba sinn! Það hefur sem sagt þróast sú skemmtilega hefð að eftir mat á sunnudögum fara strákarnir í sturtu og fá svo "að slást" við pabba sinn upp í okkar rúmi hreinir og fínir. Ótrúlegt hvað þetta framkallar mikla gleði hjá þeim bræðrum!

Bestu kveðjur úr Beykiskóginum,

Helgarlífið...........

2008-04-07T12:13:00.003+02:00

Okkur fjölskyldunni hér í Beykiskóginum tekst einhvern veginn alltaf að skemmta okkur vel um helgar!

Við hófum nýliðna helgi með því að fara á fyrstu útiæfingu ársins í fótboltanum. Þar var gríðarlegur fjöldi af upprennandi knattspyrnumönnum mættir. Flestir voru þarna í glænýjum og glansandi takkaskóm en þar sem Jóel Kristinn hafði ekki enn eignast svoleiðis "pro" útbúnað varð hann að láta sér venjulega íþróttaskó duga - að þessu sinni. Nú þar sem við foreldrarnir viljum auðvitað standa okkur í hlutverkinu og veita drengjunum allt hið besta drifum við okkur í Sportmaster strax á laugardagsmorgun og fjárfestum í "komplet fodboldpakke" sem innihélt takkaskó, stuttbuxur og treyju auk sokka! Þannig að nú getum við fjölskyldan varla beðið eftir næstu æfingu!

Eftir æfinguna á föstudaginn vorum við svo heppin að okkar beið bara tilbúinn matur hjá einum nágrannanum. Og á laugardagskvöldið buðum við svo öðrum nágrönnum til okkar. Það er nefnilega þannig að við erum með grasekkjur sitthvorum megin við okkur (karlarnir á Íslandi) og þá getur verið gaman að fá félagsskap frá nágrönnunum auk þess sem strákarnir (sérstaklega Jóel) njóta þess þvílíkt að fá að borða með vinum sínum og vaka lengur ......... miklu lengur!

Í gær, sunnudag fórum við að heimsækja sumarhöll drottningarinnar hér í Árósum. Við höfðum aldrei áður skoðað höllina eða hallargarðinn og fórum því í góðan göngutúr um svæðið sem er opið þegar drottningin er ekki "heima". Í sumar þegar drottningin kemur þá verður garðurinn lokaður en í staðinn verður hægt að sjá hin frægu lífvarðaskipti kl. 12 að hádegi.
Við hliðina á hallargarðinum er skemmtilegur leikvöllur þar sem við lékum okkur þegar við vorum búin að rölta um hallargarðinn og stúdera listaverkin sem þar eru. Við enduðum svo ferðina niðrí bæ - þar sem strákarnir fengu að velja sér stað til að borða - þannig að við fengum að sjálfsögðu einn McDonalds til að draga aðeins niður í hinum heilbrigða lífsstíl.

Nú er sem sagt helgin búin og lærdómurinn tekin við. Húsmóðirin þarf meira að segja að gista eina nótt í Köben í vikunni þar sem hún þarf að læra svo roooosalega mikið í þessari viku! Þá verða strákarnir bara að sjá um sig sjálfir - eða fá hjálp frá nágrönnunum (joke...)

Bestu kveðjur,

Ein mynd

2008-04-04T13:26:00.003+02:00

Þar sem ég á aldrei neinar myndir í tölvunni minni - set ég aldrei neinar myndir hér inn. Fékk eina mynd senda frá manninum sem átti afmæli 1. apríl. Skelli henni inn svona til að gefa ykkur innsýn í lífið á leikskólanum. Þarna eru þeir bræður Fannar Ingi og Jóel Kristinn að smíða á leikskólanum með Sigurði vini sínum.

Annars er að koma helgi ............... páskaliljurnar sprungnar út í garðinum. Í dag byrjar líka fótboltinn hjá Jóel á fullu aftur eftir hlé.

Bestu kveðjur

Þroskakippir og rólegheit

2008-03-31T14:24:00.004+02:00

Jæja eftir páskaátið er allt komið í sinn vanalega gír - veikindatörnin búin - við farin að mæta aftur í ræktina og búin að brenna páskaeggjunum!

Lærdómurinn hefur tekið við. Æfingapróf og verkefnaskil til skiptis hjá okkur námsmönnunum og strákarnir bara leika sér - þrælgóðir eins og venjulega.

Þeir eru reyndar báðir að taka einhverja þroskakippi. Nú er auðvitað rétt rúmlega mánuður þangað til Jóel Kristinn verður 6 ára og heimspekilegar pælingar hans eru ótrúlega skemmtilegar þessa dagana. Hann er mjög áhugasamur um Ástrík og Steinrík þessa dagana þar sem Herkúles og rómversku guðirnir eru söguhetjur (heyrist mér af því sem ég heyri útundan mér af þessu sjónvarpsefni). Nú drengurinn er þvílíkt upptekinn af því að spá í guð, ósýnileika og aðrar álíka tilvistarpælingar en fær yfirleitt sömu svörin frá móður sinni, "ég veit nú ekki hvernig það er, en hvað heldur þú?" Ég sem sagt ræð ekkert við að svara spurningum barnsins og læt hann bara svara sér sjálfur og þá myndast bara nýjar skemmtilegar hugleiðingar!
Í bílnum á föstudaginn sagði hann líka "mamma, ég sakna allra vina minna og afanna og ömmurnar mínar á Íslandi. Mest sakna ég samt langafa sem er dáinn því ég hitti hann ekki aftur". Bara sætur!

Fannar Ingi er líka að stækka og þroskast, hann er farinn að ræða málin og koma með athugasemdir sem maður trúir varla að "litla krílið" láti frá sér. Hans stærsta áhugamál þessa dagana er að verða næst 4 ára og svo 5 ára og sýnir aldurinn alltaf á puttunum á sér. Það er nefnilega þannig að 5 ára börnin eru svo oft "på tur" á leikskólanum og Fannar Ingi er að bíða eftir því að verða 5 ára og komast oftar "på tur". Reyndar er hann einmitt "på tur" í dag, fór í heimsókn í annan leikskóla. Jóel Kristinn fór síðast á föstudag en þá var Naturholdet (sem eru elstu krakkarnir) boðið í heimsókn í tannlæknaskólann þar sem þau fengu að skoða allar tannlæknagræjurnar - ótrúlega spennandi.

Á morgun á svo húsbóndinn, kokkurinn, golfarinn, ljósmyndaáhugamaðurinn, viðskiptafræðineminn, ......... Helgi Kristinn afmæli. Þá fær hann pakka...................

Bestu kveðjur til ykkar allra, sérstaklega ömmu í sveitinni
Beykiskógarfjölskyldan á 215

Í hvaða landi búum við?

2008-03-25T16:58:00.002+01:00

Ég var að koma heim með strákana af leikskólanum. Þegar við komum inn úr dyrunum, setjast drengirnir niður við eldhúsborðið í rólegheitunum til að fá smá hressingu eftir átök dagsins. Á svona stundum er oft spjallað, eftirfarandi spjall átti sér stað áðan:
Jóel: mamma afhverju ert þú ekki með svona hettu yfir hárinu eins og hinar mömmurnar?
mamman: ha?
Jóel: já eða sko næstum allar mömmurnar, svona eins og bóndakonur eða þannig?
.........
þess má geta að mamman varð eiginlega hálf orðlaus því hún hélt að hún hefði farið með fjölskylduna til Danmerkur ............ en hver veit kannski erum við bara í vitleysu landi........ það er ekki furða að mér finnist erfitt að skilja dönskuna, kannski er þetta bara alls ekki danska........

með bestu kveðju frá útlöndum

Gleðilega páska! - og nýtt gengi...........

2008-03-23T12:40:00.003+01:00

Jæja hér er nú aldeilis búið að vera gaman - eða kannski fyrst of fremst gott að borða - sem er gaman!
Fyrir viku síðan kom Kristín Hrefna í langþráða heimsókn. Hún kom með flugi til Billund frá Osló þar sem hún var í einhverri vinnutengdri ferð, sem sagt pólitík! Um leið og Kristín mætti á svæðið byrjaði mikil átveisla. Hún kom auðvitað með íslenskt nammi í poka (nokkuð stórum) með sér og svo var hún einnig búin að lýsa því yfir að einu áhyggjurnar hennar af ferðinni snerust um hvort hún fengi gott að borða! Við höfum líka reynt að viðra hana reglulega, skruppum í gönguferð á ströndina þar sem Helgi "neyddist" til að vaða út í ískaldan sjóinn til að bjarga verðmætum American Style frisbí-diski sem lenti óvart í sjónum - Helgi er í stuttu máli búinn að vera veikur síðan!!!

Í páskafríinu var leikskólinn lokaður alla vikuna fyrir páska sem þýðir að samtals fá drengirnir 10 daga páskafrí - við bætast svo 9 daga veikindafrí, þannig að samtal verður Fannar Ingi í 19 daga fríi, hann er líka farinn að spyrja um leikskólann á hverjum morgni. Á meðan Helgi og Kristín tóku svona sófadag sl. mánudag fór ég í skólann til Köben, þar mætti bara hálfur bekkurinn þar sem fólk var komið í páskafrí. Á þriðjudeginum skruppum við Kristín Hrefna svo með Jóel og Fannar í Legoland á meðan Helgi lá veikur heima. Það var auðvitað rosa gaman. Reyndar svolítið kalt en hvergi raðir og svo fórum við í 4D bíó og skoðuðum vel allt sem var innan hús á milli þess sem strákarnir fóru á kostum (og við stelpurnar líka) í tækjunum.
Á miðvikudag kom svo Borgar til okkar og þá hófst matarveislan fyrir alvöru.

Á miðvikudag varð líka skyndilega helmingi dýrara að búa hér í Danmörku. Eitt stærsta verkefni okkar þessa dagana er að reyna að hafa húmor fyrir þessu "nýja" gengi á dönsku krónunni. Við til dæmis versluðum í matinn á miðvikudaginn og í íslenskum krónum kostaði matarkarfan u.þ.b. 50% meira en hún hefði kostað fyrr í vetur. Við erum með ógreidda reikninga upp í hillu sem eru á gjalddaga eftir mánaðamót -þeir hafa hækkað um u.þ.b. 20%
síðan við fengum þá senda! Staðan er nefnilega þannig að við höfum engar tekjur í dönskum krónum, þannig að við þurfum að millifæra íslenskar krónur fyrir öllu sem við gerum hér - og í stuttu máli þá er þetta stórmál ef þetta verður niðurstaðan..................... ekki það að við séum að kvarta....................... strákunum finnst grjónagrautur góður!

Það er fleira sem hefur tekið óvænta niðursveiflu á síðustu dögum en það er hitastigið. Í allan vetur er búið að vera "vor". Við fengum einu sinni smá snjó sem var farinn morguninn eftir og 2 - 3 hefur orðið kalt. 1. mars hófst svo vorið skv. dagatalinu hér í DK, blómin farin að springa út, brum komið á tré og hitastigið oftast nálægt 10°C................ en svo komu Kristín og Borgar með golfsettið og um leið kom snjór, frost og almennur "skítakuldi".
Helgi og Borgar létu sig nú samt hafa það og fóru tvisvar sinnum í golf í vikunni (svona á milli þess sem Helgi var veikur) og núna er Borgar veikur - en það er í lagi, þeir komust í golf!

Jæja, nú er páskadagur með tilheyrandi átveislu framundan - fengum íslenskt páskalamb sent frá Selfyssingunum og verður það borðað í kvöld, þangað til borðum við íslensk Nóa Siríus páskaegg og njótum dagsins með íslensku gestunum okkar............

Jæja, best að fara að undirbúa páska"brunch".....

Með páskakveðju,

Sjúklingalíf

2008-03-11T20:57:00.002+01:00

Það kom að því! Þeir bræður hafa verið svo heppnir að missa ekki dag úr leikskólanum vegna veikinda frá því er þeir byrjuðu, 16. ágúst í fyrrasumar en nú er Fannar Ingi orðinn lasinn.
Hann sem sagt var lasinn um helgina en hitalaus í gær (mánudag) og héldum við að hann kæmist aftur á leikskólann í dag þriðjudag og gæti því verið með í "ferðalaginu" í dag. En í morgun var hann aftur rokinn yfir 39 gráðurnar og lá eins og slytti í allan dag, svaf og slappaði af til skiptis, miklu meira veikur en um helgina........... fúúúúlt! En það þýðir sko ekki að kvarta ekki mörg leikskólabörn sem ná svona löngum tímabilum án veikinda.................... og þó betra að vera lasinn núna en í næstu viku þegar allir eru í páskafríi og Kristín Hrefna - með alla sína aksjón - mætt á svæðið.
Verð víst að viðurkenna að litli snáðinn náði líka að smita mömmu sína sem vaknaði einnig með hita í morgun og því erum við búin að liggja saman í allan dag!

Það er útivist og fjör á leikskólanum alla vikuna - þetta er sem sagt síðasta vikan fyrir páskafrí þar sem það er lokað alla næstu viku. Endalaust verið að kveikja bál og poppa, baka brauðbollur o.s.frv á bálinu - voða gaman örugglega. Í dag fór allur leikskólinn saman í Bøgeskov gård sem er víst leikvöllur hér rétt hjá okkur og áttu allir að mæta með frokost-nesti í léttum bakpoka. Voða spennandi allt saman. Auðvitað missti Fannar af þessu en honum var nú alveg saman. Jóel Kristinn sagði samt þegar hann kom heim í dag að honum finndist betra að hafa Fannar hjá sér á leikskólanum af því að þegar hann verður eitthvað leiður þá kemur Fannar Ingi alltaf til hans og spyr hvað sé að! Þeir eru nú dáááldið góðir bræður!!!!

Skólinn er víst í fullum gangi hjá okkur fullorðnafólkinu - við kannski þurfum "aðeins" að auka við lesturinn eftir páskafrí en vonandi er þetta allt í lagi. Ég ætla að skila fyrsta hópverkefninu mínu á dönsku á mánudaginn. Skrepp til Köben á föstudag, heim til einnar í bekknum og við ætlum að vippa upp svokölluðu mini-projekti. Fyrir áhugasama þá erum við semsagt að fara að setja um diffurjöfnu módel sem lýsir útbreiðslu smitsjúkdóma í ákveðnu umhverfi! Þeir sem hafa gagnlegar ábendingar - rétt upp hönd!

Sendum Bentu systur svo aðalkveðjur dagsins!

Bestu kveðjur úr Beykiskóginum

Sumarbústaðarferð og skemmtilegheit

2008-03-04T12:49:00.002+01:00

Um helgina skruppum við ásamt okkar næstu nágrönnum í sumarbústaðarferð til Vestur-Jótlands (Ringköbing fjord). Það var ekki leiðinlegt! Við vorum reyndar nánast viss um að það yrði brotist inn hjá einhverju okkar þar sem þrjú hús í röð voru alveg mannlaus alla helgina, engir bílar hjá húsunum inn í þessari lokuðu götu. Í hvert skipti sem síminn hringdi um helgina vorum við viss um að það væri símtal frá Þórunni um að nú væri búið að hreinsa út úr húsinu. (Þórunn býr sko líka í götunni okkar)............. en viti menn ekkert símtal og allt á sínum stað þegar við komum heim!

Ferðalagið gekk reyndar mest út á mat - sem er vel við hæfi þar sem flestir í götunni eru í þvílíku átaki og hafa kílóin verið að fljúga af fólki (ekki af okkur hér á 215 samt - við erum bara í ræktinni til að lifa svolítið heilsusamlegra lífi - og kílóin fara um leið þá er það bara plús!!!)
Við fórum nú líka á milli máltíða í góðan bíltúr um svæðið sem er mjög skemmtilegt og örugglega algjör paradís á sumrin og smá göngutúr til að gera okkur klár í næstu máltíð...........
Eins og í flestum sumarbústaðarferðum var skroppið í pottinn og svo var spilað fram á nótt. Að þessu sinni var spilaður póker - sem er mikið spilaður hér í götunni, sérstaklega af karlmönnunum. Ég hafði reyndar ekki spilað póker áður en hafði nú lítið val um annað en að læra spilið snarlega og hafði bara gaman af (og stóð mig alveg vel...).

Drengirnir nutu sín vel í bústaðnum. Þeir voru þarna með tveimur nágrannastrákum sem eru reyndar aðeins eldri en þeir en það var alveg í góðu lagi. Fannar Ingi tók smá syrpu í að prófa sig áfram með að segja ljóta hluti við foreldra sína - svona til að tékka á viðbrögðunum. Nú er sem sagt ljóst að dónaskap læra börn á leikskólanum. Allavegana er það eini staðurinn sem Fannar heyrir dönsku og hann kann bara að vera dónalegur á dönsku!!!! "Du dumme far/mor!" Svo veit hann ekkert hvað þetta þýðir á íslensku - hehe!

Nú einhverjir eru farnir að skipuleggja sumarfrí - þið skemmtilega fólk sem ætlið að hitta okkur í sumar t.d. með því að heimsækja okkur mættuð alveg fara að hafa samband með hugmyndir að dagsetningum svo við getum pússlað sumrinu saman sem allra best. Það væri allavegana fúlt að við værum búin að kaupa flugmiða heim til Íslands á sama tíma og þið komið út að heimsækja okkur!
Ég er í prófum 16 - 27. júní og Helgi eitthvað aðeins fyrr (höldum við).

Bestu kveðjur,

Afmæliskveðjur heim til Íslands

2008-02-28T14:01:00.002+01:00

Eitt af því sem erfiðast við að búa í útlöndum er að vera í burtu þegar aðal fólkið á afmæli eða eitthvað svoleiðis.
Pabbi - afi Jóel - átti afmæli 21. febrúar og er ekki búinn að fá kossa og knús frá Beykiskógarfjölskyldunni.

Teitur "litli bróðir" er 25 ára í dag og fær einnig kossa og knús frá okkur öllum"

Skrítið þegar litlu systkini manns eru að verða jafn gömul og maður sjálfur!

Bestu kveðjur,

This is my life!

2008-02-24T18:13:00.002+01:00

Frábært!
Við hér í DK fullkomlega sátt - en ekki hvað! Hér var auðvitað Euro-partý og horft í gegnum netið - allt ætlaði um koll að keyra þega ruv.is slökkti á útsendingunni kl. 23:00 (auglýstur útsendingatími búinn) og við fengum ekki að fylgjast með spennunni þegar úrslitin voru tilkynnt, frekar fúllt - en útsendingin kom aftur inn og náðum við að fagna sigri þegar lagið var endurtekið.

Verst að keppnin er ekki haldin hér í Danaveldi þetta árið - það væri ekki leiðinlegt að vera í salnum og sveifla íslenska fánanum með Regínu á sviðinu! Það verður a.m.k. Eurovision-partý að bestu gerð þetta árið. Mikið ógeeeeeeeeðsleeeeeega verður gaman.

Elsku Regína þú veist að við erum óóóóótrúlega stolt af þér - eins og alltaf!

Eurokveðjur

Ræktin!!!!!!!!!

2008-02-22T21:09:00.003+01:00

Jamms, hvort sem þið trúið því eða ekki - við hjónin erum búin að kaupa kort í ræktinni. Mætum nú nánast daglega í Equinox sem er auðvitað í eigu Íslendinga (World Class) og æfum þar með öllum hinum Íslendingunum. Það er eiginlega dálítið fyndið að fyrst þegar við mættum voru Íslendingarnir sem eru búnir að æfa þarna lengur en við að benda okkur á Tyrkina sem hópa sig þarna saman og láta eins og þetta sé einhver félagsmiðstöð - ................................ þegar við mættum í dag vorum við þarna 4 úr götunni á sama tíma og 2 ný farin og í gærmorgun vorum við einmitt 5 Íslendingarnir úr Beykiskóginum á sama tíma................ þetta er náttúrulega ekki hægt að Tyrkirnir hópi sig svona saman þarna í stöðinni......... Sem sagt hver veit nema við komum bara til með að líta þokkalega út - í góðu formi a.m.k. næst þegar við hittumst!

Annars bara allt í góðu gengi hér. Strákarnir í fínu formi. Jóel Kristinn fer á kostum í reikningi þessa dagana, svarar einföldum plús og mínus dæmum nánast án umhugsunar og notar svo puttana eða aðrar aðferðir þegar tölurnar stækka. Í dag í kaffinu spurði hann okkur foreldrarna stoltur hvað 100 + 100 væri, við auðvitað sögðum bara hmmm.....? En var svaraði sjálfur, nú 200! Í gær skrapp Helgi í smá Þýskalandsferð. Við hin lágum upp í rúmi og lásum Línu langsokk en Fannar Ingi sofnaði yfir bókinni og þá fórum við Jóel Kristinn að spjalla og vildi hann fara í stærðfræðileik, sem er þannig að við skiptumst á að búa til dæmi sem við reiknum svo til skiptis. Nú svo fórum við að spjalla um eitt og annað og spurði ég hann, hvað hann myndi vilja æfa og verða góður í þegar hann verður unglingur ég kom með hugmyndir eins og fótbolta, handbolta...... dans, söng, hljóðfæri og átti auðvitað von á því að svarið yrði fótbolti eða kannski dans - það er nefnilega mikið dansað þessa dagana. En nei, minn svaraði ákveðið - ég ætla vera góður í skóla!
Ég held kannski að við foreldrarnir ættum að fara endurskoða umræðuefnið á heimilinu og snúa okkur að fótboltaumræðum..............

Jæja, skemmtileg helgi framundan. Eurovision á Íslandi - varla hægt að lesa nokkuð íslenskt blað eða opna fyrir beinar útsendingar frá íslenskum fjölmiðlum án þess að allt sé veggfóðrað með Hey.... Hó klúbbnum. Þvílík auglýsingaherferð................... held samt með Regínu .......... ekki að það komi nokkrum á óvart. Enska útgáfan This is my life er mjög flott og gaman að lesa jákvæð comment um þau hjá Eurovision-nördunum á ESC today. Áfram Regína!!!

Góða helgi

.............það er að brenna..........

2008-02-16T23:07:00.004+01:00

Nei, nei............. það hefur bara verið nokkuð rólegt í kringum okkur hér í Beykiskóginum! Reyndar lásum við í blöðunum að það var kveikt í bíl og endurvinnslugámi hér í næstu götu en mestu ólætin hér í Árósum hafa verið í Gellerup þar sem mikill fjöldi innflytjenda býr. Annars vonar maður auðvitað að ástandið fari að róast. Bækistöðvar Jyllands Posten eru hér í okkar hverfi og leikskóli drengjanna er bara örstutt frá..........

Það hefur verið nóg að gera í vikunni. Tvær ferðir húsmóðurinnar til Köben og meira að segja átti ég að vera þar þrjá daga í vikunni en það er bara í hreinskilni sagt of mikið - þannig að ég "skrópaði" einn dag. Á fimmtudag (eftir skóla) skelltum við okkur fjölskyldan í strætóferð niður í bæ - ótrúlega spennandi. Löbbuðum um í göngugötunni og fórum út að borða á Pizza Hut og svo í strætó heim um áttaleytið. Jóel Kristni og Fannari Inga finnst ótrúlega gaman í strætó en Fannar náði nú samt að steinsofna í sætinu sínu við hliðina á stóra bróður á leiðinni heim - þvílík dúlla!

Í Árósum var vetrarfrí í skólum og hjá fjölmörgum fjölskyldum alla síðustu viku. Leikskólinn var opinn en ekki svo mörg börn - aðallega öll íslensku börnin - hehe! Hér er sem sagt vetrarfrí núna í heila viku, mér sem finnst ég varla byrjuð aftur eftir jólafrí - og svo er einmitt svo stutt í páskafríið!!!! Því miður var samt ekki vetrarfrí í skólunum okkar Helga og voru okkar drengir því á leikskólanum mest alla vikuna. Þar sem börnin voru færri en venjulega var boðið upp á alls konar lúxus, nammi, videó og svoleiðis skemmtilegtheit. Við fengum reyndar samviskubit yfir því að okkar drengir fengju ekkert frí þannig að þeir fengu frí á föstudag - svona rólegan lúxusdag með mömmu sinni þar sem pabbinn var í skólanum allan daginn. Við spiluðum löngu vitleysu, lásum bækur, bökuðum köku og fleira skemmtilegt...................... það mætti gjarnan vera svona vetrarfrí alla daga...................

Annars er vika í úrslit íslenska Eurovision - höfum verið að horfa á lögin á netinu og haft gaman af - sumu. Ég þarf líklega ekkert að útskýra hvaða lag ég vil senda til Serbíu................ Hef reyndar haft mjög gaman af Hey hey hey, say ho ho ho auk þess að hafa alltaf haft gaman af Barða og mikið álit á honum sem tónlistarmanni. Ég verð bara að viðurkenna að ég efast um að hópurinn (nema Ceres4 - heitir hann það ekki) sé tilbúinn í live flutning í beinni útsendingu og því gríðarstóra apparati sem keppnin úti er fyrst útkoman varð svona vandræðaleg í "litlum" sjónvarpsþætti sl. laugardag. Mín skoðun er bara sú að það þurfi meiri reynslu til að ráða hreinlega við að skila kraftinum og húmornum til allrar Evrópu ef þetta á að vera skemmtilegt - sorrý - bara mín skoðun!
Sem sagt skemmtum okkur með Hey...Ho... heima á Íslandi en sendum svo eitthvað traust út til Evrópu t.d Regínu og Friðrik!

Skruppum til Horsens í dag.................. að hitta skemmtilegt fólk! Það er sem sagt þorrablót í Horsens í kvöld þar sem Bermúda spilar og Daði vinur okkar sér um hljóðið hjá þeim. Skelltum okkur því í bíltúr til Horsens (30 mín) til að hitta Daða og Þóru Sif. Það var sko frábært að fá aðeins að hitta vini sína að heiman - þó það hafi bara verið örstutt - enginn tími fyrir matarboð, spil eða annað. Jóel Kristinn var alsæll með ferðina, við fórum nefnilega í salinn þar sem hljómsveitin var að "soundtékka" og var drengurinn þvílíkt spenntur að fá að heyra í hljómsveitinni. Við fengum líka nýja diskinn þeirra - sem var spilaður bæði í bílnum og eftir að við komum heim og bað Jóel okkur um að hækka svona 20 - 30 sinnum (Fannar fékk bara hausverk - fannst "soundtékkið" allt of hátt!!!).
Jóel kvartaði líka undan því að Aníta væri ekki með pabba sínum en tók alveg gleði sína þegar hljómsveitin byrjaði að spila.

Sunnudagur á morgun og örugglega kaffi í Sveitinni - við erum orðin nokkuð flink í að sjá um sunnudagskaffið sjálf - þó svo að ekkert komi í staðinn fyrir Sveitina á sunnudegi!!!!!!!!!!!!!!!!!!

Bestu kveðjur

Frábær helgi

2008-02-11T22:45:00.000+01:00

Jæja þá er helgin liðin,

Benta systir komst loksins til Danmerkur eftir 15 klst. seinkun á fluginu. Þar sem við misstum af föstudeginum saman fékk mamma fluginu heim frestað til mánudags - sem var alveg frábært!

Á föstudaginn fórum við í miðbæinn á kaffihús og í H&M eins og sönnum Íslendingum í útlöndum sæmir. Á laugardagsmorgun smurðum við nesti að dönskum sið og fórum í Randers Regnskov þar sem við skemmtum okkur auðvitað mjög vel. Um kvöldið fórum við svo á þorrablót Íslendingafélagsins - þar var sko boðið upp á íslenskt lambalæri auk þorramatsins - allt bara frábært. Allir Íslendingarnir í götunni mættu og áttum við í Beykiskóginum meira að segja helming fulltrúanna í nefndinni. Á móti sól spilaði og var miiiiiikið dansað.
Á sunnudaginn (í gær) var sól og 10 stiga hiti. Við fórum í göngutúr í skóginu og niður á strönd þar sem strákarnir urðu rennblautir í fæturna eftir að sulla í sjónum. Fórum svo og gáfum bömbunum nokkur epli áður en við fórum með Bentu systur út að borða niðrí bæ. Ætluðum reyndar beint úr Bambaskóginum á veitingastaðinn en þar sem strákarnir voru votir og buxurnar blautar nánast upp að hnjám urðum við að koma við heima til að vera svona þokkalega snyrtileg á veitingastaðnum.

Keyrðum svo Bentu kl. 06:54 í morgun á lestarstöðina - en aldrei þessu vant var flugið hjá Iceland Express á réttum tíma!!!!!!!!!

Svona var semsagt helgin hjá okkur..............

Fréttir úr góða veðrinu

2008-02-07T22:04:00.000+01:00

Jamms hér í DK er bara "íslensk vorblíða". 6 - 9 stiga hiti og veðurspáin segir að við megum eiga von á svipuðu áfram. Það er bara fínt. Eini gallinn er að veðrið er einhvernveginn alltaf svo meinlaust - maður bara tekur sjaldnast eftir því hvernig veðrið er nema þegar maður óvart sér veðurfréttir í sjónvarpinu! Við Íslendingar erum jú vön að vera alltaf að spá í veðrinu.

Annars er veðrið víst þannig á Íslandi að það er búið að setja allt flug úr skorðum í dag. Akkurat þegar við eigum að vera að fá hana Bentu systur til okkar. Ég var í Köben áðan - ætlaði að taka á móti litlu systur á Kastrup kl. 19:40 en fluginu hennar hefur bara verið seinkað meira og meira í allan dag. Í augnablikinu er áætlað flugtak frá Íslandi kl. 02:00 sem þýðir lendingu í Köben um 06:00 sem er 10 klukkustunda seinkun + ein svefnlaust nótt. Þetta er auðvitað frábært þegar ætlunin er að fljúga til baka á sunnudag! hmmmmmm.................

Annars var ég í Kaupmannahöfn að byrja í nýju kúrsunum mánudag, miðvikudag og í dag fimmtudag. Dálítið mikið en til að fækka lestarferðalögunum gisti ég á íslensku gistiheimili fullu af þýskum karlmönnum sl. nótt! Ég get bara sagt það að ég læsti mig bara inni í herberginu og fór varla fram á klósettið - ekki það að ég hafi neitt á móti Þjóðverjum, var bara ekki alveg að finna mig svona í þessum aðstæðum!

Strákarnir hafa það gott. Helgi er búinn að vera upptekinn í því að sjá um strákana þar sem konan hans hefur bara verið ýmist í Kaupmannahöfn eða í lestinni á milli Árósa og Köben siðustu daga.
Jóel Kristinn fór með elstu börnunum í leikskólanum í Sirkus í dag og skemmti sér þvílíkt vel. Fannar Ingi fór á meðan með jafnöldrum sínum heim til eins stráksins í leikskólanum í afmælisveislu og skemmti sér líka þvílíkt vel!

Annars bara bestu kveðjur,

Fréttir af hvíld

2008-01-31T23:27:00.000+01:00

Erum búin að hvíla okkur mikið síðustu þrjá daga. Það veitir ekki af þar sem námsáætlanirnar hjá okkur báðum benda til þess að það verði alveg nóg að gera á önninni. Fórum í foreldraviðtal á leikskólanum í dag. Það var engin svona listi sem farið var yfir eins og á Grænatúni, engar svona beinar upplýsingar um stöðu barnsins líkamlega eða............. Nei, nei, við bara mættum og settumst inn á kaffistofu starfsfólksins með tveimur pedagógum og þær bara spurðu okkur hvort það væri eitthvað sem við vildum ræða, neeeeiiii , ekkert sérstakt sögðum við og þar með var það eiginlega afgreitt. Sátum nú samt og spjölluðum við þær í dálítinn tíma fengum jú að heyra að vel gengi og að þeir væru duglegir að tala og skilja dönskuna og svoleiðis. Vorum sammála um að það verði hollt og gott fyrir Fannar Inga að standa á eigin fótum næsta vetur þegar Jóel Kristinn fer í skólann.

Já, skólamálin! Fór með Jóel Kristinn í sprogscreening á þriðjudag. Það var bara mjög gaman og auðvitað stóð hann sig mjög vel, svaraði flestu og var bara duglegur. Fékk að vita það hjá talpedagógnum (hér eru sko allir pedagógar - leikskólakennarar -talkennarar o.s.frv.) að ekki væri spurning um móttökubekk þar sem hann er kominn það vel af stað með dönskuna en ef fjöldi tvítyngdra barna í hverfinu er mikill er þeim skipt á fleiri skóla með færri útlendingum. Í apríl fáum við sem sagt bréf með tilboði um einhvern skóla fyrir Jóel Kristinn, sá skóli gæti verið hverfisskólinn eða skóli einhversstaðar í burtu............. og þá kæmi leigubíll frá bænum á morgnana og sækir hann. Eftir skóla fara svo börnin í heilsdagsskóla (SFO) en þá yrðum við að sækja Jóel Kristinn þangað kl. 16:00 daglega - eins gott að skólinn sem hann fer í verði a.m.k. í þessum landshluta -hmmmm! Nei, nei það verður bara spennandi að sjá hvað kemur í bréfinu í apríl!

Framundan er margt skemmtilegt - næstu helgi er þorrablót Íslendingfélagsins og fáum við senda barnapíu frá Íslandi! Jamms, hvorki meira né minna. Benta systir ætlar að skreppa í smá helgarferð til Danmerkur, hitta Stóru systur sína og uppáhaldsfrændur sína, skoða aðstæður og passa á meðan við förum í fyrsta skiptið út að skemmta okkur án barnanna síðan við fluttum hingað til Árósa!
Um páskana eru svo Kristín Hrefna og Borgar búin að boða komu sína - og ekki verður það nú leiðinlegt heldur! Við hjónin eru nefnilega svo heppin með systur! (............ og auðvitað bræður....... þeir eru bara ekkert að heimsækja okkur................ ennþá!)

Annars bara bestu kveðjur í vetrarhörkurnar á Íslandi,

Loksins!

2008-01-28T19:09:00.000+01:00

Jæja, þá er það loksins helst í fréttum að próf og ritgerðir eru búin (í bili).
Það er því staðfest að ég er búin með 1/4 af mastersnámi. En það er sko ekki hægt að segja annað en að það sé alveg haft fyrir þessu - mikið rosalega hljótum við að koma heim með mikinn fróðleik miðað við magnið á þekkingu sem maður hefur þurft að innbyrða fyrir þessi próf.

Annars bara - ekki tala um próf við mig - þau eru búin!

Ekki halda samt að það eitthvað frí eða svoleiðis. Helgi Kristinn er kominn á fullt aftur og þegar ég kom heim úr prófinu í dag var búið að setja inn hvað ætti að lesa fyrir næstu tíma sem eru á mánudag og miðvikudag í næstu viku og það er alveg margra daga lestur - takk fyrir!

Annars tekur nú við hið dæmigerða fjölskyldulíf - nú munum við spjalla og leika við strákana - ekki bara segja USS mamma er að læra eða USS pabbi er að læra. Það er nú aldeilis jákvætt!

Helgi Kristinn er reyndar alveg uppgefinn eftir prófatörn konu sinnar - því hann "þurfti" að sjá um börn og mat í heila viku, nú situr hann bara og bíður rólegur eftir því að maturinn verði tilbúinn. Þakka fyrir að þurfa ekki að mata hann!
Hann má nú samt alveg eiga það að hann er búinn að vera rosa duglegur - alltaf góður matur (auðvitað - enginn átti von á öðru) og svo fór hann og var hann í allan gærdag með Jóel Kristinn og Fannar Inga í legelandet þar sem þeir skemmtu sér saman feðgarnir.

Annars eru Fannar og Jóel alltaf jafn glaðir með allt saman. Nú eru þeir með æði fyrir því að láta lesa fyrir sig, þannig að það er best að drífa sig núna, skella matnum á borðið og lesa svo fyrir prinsana.

Kv.

próf og ekki fleiri próf ......og fleiri próf

2008-01-21T22:23:00.000+01:00

Jæja þá er Helgi Kristinn búinn í prófum og búinn að skila ritgerðinni - og vorönnin byrjuð! Þetta var nú nokkuð strembin törn en frábært að hún sé búin og "eðlilegra" líf taki við.......

Jæja þá er Lóa Björk (ég) búin í fyrsta prófinu af þremur. Munnlegt próf í kennslufræði stærðfræðinnar í dag - gekk vel en þvílíkt erfitt! Mætti í prófið ísköld á höndunum og rennsveitt af stressi. Gekk vel að kynna efnið en síðan tóku við spurningar prófdómaranna sumar mjöööög svínslegar, þeir voru nú samt almennilegir greyin og gáfu mér fína einkunn.
Vorkenndi meira aumingja manninum sem þurfti að sitja við hliðina á mér í 3 klukkutíma í lestinni á leiðinni heim - angandi af svitastressfílunni.............. hehe.

Þegar heim var komið sló svo húsbóndinn í gegn!!!
Það var þvílíkt búið að taka til, ryksuga og skúra heimilið. Leggja fínt á borð, taka fram freyðivín og alles. Nú síðan var bara eldaður góður matur skálað fyrir próflokum Helga og fyrsta prófinu mínu...........

... svo er bara að rífa sig upp úr sæluvímunni snemma í fyrramálið og byrja að læra undir næsta próf. Fer aftur til Köben á fimmtudag til að verja ritgerð sem ég skilaði 3. janúar. Það eru sömu prófdómarar og voru í dag þannig að ég á von hörku spurningum!!!!!!!!!! Best að vera búin að átta sig á göllunum og tilbúin að verja þá fyrir stórskotaliðinu.........
Síðasta prófið er svo næsta mánudag, hér í Árósum

Nú af þeim bræðrum er bara allt gott að frétta. Brosandi út að eyrum alla daga, ánægðir með leikskólann, leikfélagana, foreldrana (nema svo kannski rétt á meðan enginn má vera að því að sinna þeim vegna prófa........) og umfram allt hvorn annan. Jóel Kristinn sagði nú til dæmis í kvöld þegar við vorum að skála í freyðivíni og appelsínudjús með kertaljós á mánudagskvöldi að hann ætti bestu fjölskyldu í heimi - við erum barasta sammála því.

Well, best að hætta þessu röfli undir áhrifum freyðivíns á mánudagskvöldi í miðjum prófum,
kveðjur úr Beykiskóginum,

Skráður í skóla

2008-01-17T00:14:00.000+01:00

Hér með er Jóel Kristinn Helgason skráður í Vestergårdskolen, í börnehaveklassen. Mættum í skólann í dag, öll fjölskyldan en skráningin fór fram í kennslustofu 6 ára barnanna. Mjög svona hyggelig stemning og dejlige mennesker. Allir svona ligeglad og þægilegir. Eeeeeen það er náttúrulega þetta með dönskukunnáttuna, þeir eru svo gáfaðir hérna í Árósum að tunglumálaprófin standa yfir næstu tvær vikurnar. Jóel fer í próf 29. janúar til að kanna hvort hann kunni næga dönsku til að fara í hverfisskólann í ágúst. Ég spurði reyndar að því afhverju prófin væru núna, þar sem börnin lærðu nú vonandi eitthvað frá janúar og fram í ágúst en þá fékk ég þetta fína svar "sådan er det bare!".

Þetta er reyndar svolítið asnalegt að gera þetta svona, barnið er boðað í skólann og fær að sjá kennslustofuna sína og verða mjög spenntur fyrir nýja skólanum, svo fer hann í próf (í janúar) en er þá líklega ekki nógu vel staddur í dönskunni til að fá aðgang að hverfisskólanum og er því vísað frá í annan skóla.
Nú svo byrjar hann í hinum skólanum í ágúst, kynnist fólkinu þar en þar sem hann verður vonandi búinn að læra meiri dönsku þá (7 mánuðum eftir tungumálaprófið), verður hann kannski bara........ sendur aftur í hverfisskólann...........

Nei, nei þetta verður í góðu lagi! Við fórum og héldum upp á þennan merka áfanga í lífi drengsins með því að bjóða honum út að borða. Fórum á mexíkóskan restaurant niðrí bæ sem var bara mjög fínt.

Annars bara þetta sama, Helgi Kristinn í ritgerðarvinnu núna, ég í próflestri - byrja af fullri alvöru á morgun að lesa og Fannar Ingi bara sæll og glaður.

Skólakveðjur,

Við erum búin að..........

2008-01-12T16:07:00.000+01:00

............fá nýja þvottavél.
Þar með þurfum við engan rafvirkja. Við töluðum við tvo rafvirkja, einn náskyldan á Íslandi sem taldi viðgerð varla borga sig og einn hér í nágrenninu sem samkvæmt dönskum sið gat komið u.þ.b 10 dögum seinna, kl. 7:30 að morgni - takk fyrir það. Hann taldi samt miðað við lýsingarnar að það myndi ekki borga sig að gera við vélina. Helgi hringdi því í leigufélagið og sannfærði þá um að það væri ekki þess virði að við barnafjölskyldan væru látin bíða í 10 daga í viðbót eftir því að fá rafvirkja fyrir 600 danskar krónur til að segja okkur að það þyrfti nýja vél. Við fengum nýja vél sem er byrjuð að þvo fyrir okkur.

........... að gera við blástursofnin.
Keyptum bara nýtt element í gegnum netið, fengum það sent með póstinum og Helgi skellti því í. Við vorum svo rétt áðan að klára þess fínu súkkulaðiköku, bakaða í ofninum. Það þarf því engan rafvirkja í það djobb heldur.

......... taka eitt próf til viðbótar.
Eða sko Helgi Kristinn. Fór í munnlegt próf í dag - stóð sig vel. Nú er næsta próf hjá honum á mánudag og svo ritgerðarskil 21. janúar og þá er törnin búin hjá honum.

......... fá próftöflu.
Eða sko Lóa Björk. Fékk loksins í gær að vita hvenær ég á að mæta í prófin. Fer í 3 munnleg próf, þann 21. og 24. janúar í Köben og svo 28. janúar hér í Árósum. Fór á smá kynningu um munnleg próf í gær og held að ég viti nokkurn vegin út á hvað þetta gengur. Veit að minnsta kosti að ég á að kynna efnið fyrst í 10 mínútur en svo fæ ég spurningar og spjall við prófdómarana í hálftíma í viðbót. Eftir það ákveða þeir einkunnina og segja mér hana með rökstuðningi - spennandi, hmmmm.

........ ákveða framtíðina.
Eða sko Jóel Kristinn. Í gær vorum við að horfa á danska X-faktorið og spurði ég Jóel hvaða lag hann myndi syngja ef hann færi í svona prufu. "Ekkert!" sagði hann. "Nú, myndir þú ekki vilja verða söngvari?" spurði ég til baka. "Nei, ég ætla bara að vera venjulegur maður, í venjulegri vinnu!" svaraði drengurinn.

......... hafa það gott.
Öll en ekki síst Fannar Ingi sem kemur svo glaður heim af leikskólanum á hverjum degi og finnst alltaf "mjög gaman!" Hann liggur hérna við hliðina á mér núna í Turtles búningi sem hann fékk í afmælisgjöf frá ömmu Guðlaugu. Það komu nefnilega áðan fullt að bæklingum frá dótabúðunum í tilefni af Fastelavn og þurftu þeir bræður auðvitað að skella sér í búningana sína - gaman að því.

annars bara bestu kveðjur frá próflestrarheimilinu mikla,

Við óskum eftir.......................

2008-01-05T23:23:00.000+01:00

Þvottavél í lagi!
Þvottavélin er biluð sem gengur varla hjá fjögurra manna fjölskyldu sem á nú ekkert endalaust föt til skiptanna! Í dag prófuðum við eitt alveg nýtt og ótrúlega spennandi - við fórum í möntvaskeri (með dönsku ö-auðvitað), eða mynt-þvottahús. Fórum með þvottinn og skelltum í fjórar þvottavélar, biðum auðvitað á meðan þvotturinn hringsnerist þarna í vélunum, rosa gaman en eiginlega bara rándýrt, 26 kr vélin (sinnum 12 til að fá íslenskar) og svo 5 kr. fyrir þvottaefnið. Síðan var þvotturinn bara fluttur blautur heim og er nú á víð og dreif um íbúðina, auk þess sem eitthvað er í þurrkaranum!
Ef einhver þekkir góðan rafvirkja hér í nágrenni við Beykiskóginn, vinsamlegast látið okkur vita.

Ofn í lagi!
Blástursofninn hitnar ekki. Það er ekki vinsælt hér á heimilinu. Á morgun er t.d. sunnudagur og hljótum við að þurfa að baka!!!!
Annað verkefni fyrir rafvirkjann!

Uppþvottavél sem þvær leirtauið!
Við nánast þvoum í vélina, en svo kemur meirihlutinn skítugur úr henni, sérstaklega frá efri hæðinni og svo skilur hún leifar af þvottaefninu eftir sem við þurfum að skola burtu.
Getur rafvirkinn ekki kíkt á það líka!

Barnapössun 9. febrúar!
Við hjónin erum sem sagt búin að kaupa okkur miða á þorrablót Íslendingafélagsins hérna í Árósum eins og allir hinir nágrannar okkar hér í Beykiskóginum. En hver á þá að passa? Ef einhver hefur hugmynd um lausn á þessu skemmtilega vandamáli þá vinsamlegast látið okkur vita.
Rafvirkinn þarf samt ekkert að leysa úr þessu vandamáli...............

Góðu gengi í prófunum!
Helgi Kristinn er búinn í sínu fyrsta prófi sem gekk vonandi a.m.k. þokkalega. Nú á hann tvö próf eftir + eina ritgerð.
Ég (Lóa Björk) skilaði öllum prófverkefnunum svona eftir bestu getu þann 3. janúar. Gæðin eru því miður minni en ég vildi, sem má rekja til tungumálaerfiðleika - en því miður þá hef ég aldrei verið neinn tungumálasnillingur - vonum bara að þetta sleppi fyrir horn. Fer svo í þrjú munnleg próf úr efninu 21 - 31. janúar og þá reynir nú heldur betur á tungumálakunnáttuna, leiðinleg samt að geta ekki skilað sínu besta þar sem maður hefur ekki réttu orðin til að lýsa því sem maður kann. Þetta kemur vonandi á endanum...............

Annars bara gott að frétta - höfum það mjög gott. Fengum bréf frá tilvonandi skólanum hans Jóels Kristins þar sem við eigum að mæta með hann til skráningar um miðjan mánuðinn. Hann þarf reyndar að fara í tungumálapróf áður en hann fær að byrja í skólanum (næsta haust) og ef hann er ekki búinn að læra næga dönsku þá, á hann að fara í móttökuskóla nálægt miðbæ Árósa. Sem sagt ef að það, að hann er bara með íslenskum börnum á leikskólanum (og heima) hefur komið í veg fyrir að hann hafi náð dönskunni ætla Danirnir að bæta úr því með því að setja hann í skóla með öðrum útlenskum krökkum! Já, sæll! Þetta eru engin geimvísindi, til að barnið læri dönsku þarf hann kannski bara að fá tækifæri til að vera með dönskum börnum! Annars er móttökuskólinn örugglega mjög fínn, börnin hérna í götunni eru flest í honum og bara ánægð, þetta voru bara svona smá hugleiðingar......
Fannar Ingi er eiginlega bara orðinn stór, hefur tekinn mikinn þroskakipp að undanförnu og er voða duglegur.

Bestu kveðjur ykkar allra og munið nú að redda mér rafvirkja og barnapíu hingað í Beykiskóginn (hehe)

Gleðilegt ár!

2008-01-01T15:25:00.000+01:00

Við fjölskyldan þökkum fyrir allt gamalt og gott!

Þá er sem sagt kominn 1. janúar 2008. Síðastliðin ár (Silja veit töluna) höfum við staðið í undirbúningi Galaveislu á nýársdag. Jamm - hvert nýárskvöld höfum við fengið skemmtilegasta fólk í heimi (eða sko nokkra af þeim- það vantar auðvitað Kristínu Hrefnu og fleiri skemmtilega til að hægt sé að segja allt skemmtilegasta fólk í heimi (innskot: 02.01. eftir þarfa ábendingu í commentunum) - að minnsta kosti) og slegið upp stórveislu með glæsilegum réttum og svo spili fram á morgun. Núna erum við hjónin búin að ganga frá sparistellinu upp í skáp, búin að opna tölvurnar og erum að byrja að læra!
Við vonum bara að Kristján og Silja, Daði og Þóra Sif, Regína og Svenni fái öll örugglega eitthvað gott að borða í kvöld - annars verðum við með samviskubit!

Annars voru áramótin mjög skemmtileg þó svo að hefðin um veislumat og áramót á Öldugötunni væri brotin! Við pöntuðum nautalund hjá slátraranum og fengum veislumat a la Helgi Kristinn sem er jú alltaf toppurinn á öllu í matarmálum. Dessertinn fengum við í næsta húsi en kokkurinn þar er húsmæðraskólagenginn og klikkar heldur ekki í eldhúsinu. Um hálf tólf stóðu Íslendingarnir í götunni og gestir þeirra fyrir flugeldasýningu að íslenskum hætti í logni og heiðskýru veðri. Um miðnætti toppaði svo Daninn á móti okkur sýninguna með stærstu tertunni. Jóel Kristinn var ekkert hress með ósköpin og fór bara inn að horfa á teiknimynd. Fannar endist lengur yfir flugeldunum en sofnaði svo í sófanum hjá nágrönnunum yfir teiknimynd fljótlegaeftir miðnætti.

Jæja þá er best að snúa sér að ritgerðaskrifum.
Með nýárskveðju,

Komin heim

2007-12-30T21:23:00.001+01:00

Jæja þá erum við komin heim eftir viku ferð heim til Íslands! Já, nú er bara allt heim!

Þó að það hafi verið mikið span á okkur þessa viku á Íslandi var það algjörlega þess virði. Ferðin hófst reyndar með mikilli seinkun á fluginu frá Billund til Keflavíkur. Við áttum að fara í loftið kl. 20:20 en það tafðist til um kl. 02 og lentum við í Keflavík rétt rúmlega 04 að íslenskum tíma. Ekki alveg það besta fyrir allar íslensku barnafjölskyldurnar sem voru á leið heim í jólafrí! En þetta gekk ótrúlega vel og vorum við komin í rúmið á Öldugötunni um 05:20. Afi Jóel á Seltjarnarnesinu fékk hlutverk bílstjórans og þurfti að keyra um miðja nótt til Keflavíkur að sækja fjölskylduna - takk fyrir það!

Við ætluðum auðvitað að vera á röltinu í bænum á Þorláksmessu en þar sem heilsan og röddin hjá húsmóðurinni urðu eftir á Billund flugvelli auk þess sem allir voru þreyttir þá varð lítið úr því. Við kíktum því bara rétt á ömmu Lóu sem tókst að lærbrjóta sig fyrir jólin. Amma Lóa á örugglega skilið að fá medalíu fyrir jákvætt hugarfar og góðar framfarir miðað við "aldur og fyrri störf" - hún er sko kjarnakvendi! Við kíktum líka heim til Kristínar Hrefnu og Borgars en það var mjög mikilvægt að sjá búskapinn hjá þeim! Regína og Svenni, Daði og Þóra Sif komu svo með Anítu á Öldugötuna og það urðu sko heldur betur fagnaðarfundir hjá krökkunum - sko bæði stórum og litlum! Við tókum myndir af litlu grísunum þremur og það er bara fyndið að sjá Anítu "stóru" á milli þeirra bræðra.

Á aðfangadag var brunað austur á Selfoss með viðkomu á nokkrum pakkastöðum. Jóel Kristinn og Fannar Ingi slógu algerlega í gegn með því að vera svooooooo góðir allan daginn og allt kvöldið að það hálfa væri nóg! Þeir dunduðu bara og léku sér allan daginn, ekki eitt suð um pakkana sem voru undir jólatrénum það var ekki fyrr en Kristín Hrefna frænka gat ekki beðið lengur að við réðumst á pakkana. Það var alveg sama hvað var í pökkunum þeir bræður voru yfir sig glaðir með allt saman!

Á jóladag og annan í jólum vorum við aftur í bænum að keppast við að knúsa fjölskylduna. Hitta systkinin og ömmurnar og afana. Eftir jólaboð á annan í jólum var aftur haldið austur og spiluðum við Party og Co Extreme með ömmu og afa á Selfossi, Kristínu Hrefnu og Borgari fram á nótt! Það var dálítið skrautleg fjölskyldusamkoma svona á köflum - hehehe!

Á fimmtudaginn ætluðum við hjónin að læra - en það var ekkert úr því!!!!!!!!!!!!!!!!
Lærdómurinn bíður því - og á að fara fram einmitt núna - en þá mundi ég að ég átti eftir að blogga smá - þannig að líklega fer ég bara að læra á eftir!!!!!!!!!!!! Helgi Kristinn er vonandi duglegri hann a.m.k. er kominn út í bæ að læra. Ég er eiginlega líka að bíða eftir því að bræðurnir verði nógu þreyttir til að fara að sofa - þeir eru búnir að snúa sólarhringnum alveg við og eru uppi í herbergi með nýja geislaspilarann sinn að dansa með Matthias og hinum krökkunum úr dönsku barnasöngkeppninni. Jólasveinninn gaf sko Jóel diskinn í skóinn.

Á föstudeginum var svo brunað í bæinn í keppni um að hitta sem flesta á sem stystum tíma. Við fórum hús úr húsi og kysstum og knúsuðum skemmtilegt fólk. Um kvöldið borðuðum við með Kristjáni og Silju og brunuðum svo í afmæli til Regínu. Við vorum ekkert smá glöð með að afmælisveislan væri haldin á meðan við vorum heima!

Á laugardeginum var svo flogið heim! Nú tókst þeim að hafa flugið á réttum tíma og gekk allt mjög vel. Nú erum við bara komið heim í Beykiskóginn, búin að gera áramótainnkaupin - nema sækja nautalundina til slátrarans á morgun. Skólabækurnar og tölvurnar tilbúnar fyrir átökin framundan!

Takk ömmur og afar fyrir þjónustuna um jólin,
Takk frænkur, frændur og vinir fyrir samveruna og skemmtunina,

Með áframhaldandi jólakveðju,
(ég er farin að læra...............)

2007-12-22T13:38:00.000+01:00

Það eru að koma jól

2007-12-19T11:51:00.000+01:00

Dagatalið segir að það séu alveg að koma jól!
Hér innandyra eru jú jólseríur og smá skraut en pappírshrúgan og bókastaflinn sem umlykur fartölvuna á borðstofuborðinu dregur all verulega úr jólaskapinu.

Helgi Kristinn er kominn í "jólafrí" og er upp í skóla að lesa undir próf - ekki ýtir það nú sérstaklega undir jólastemninguna. En þegar fyrsta prófið er 3. janúar er ekkert annað í boði. Það er annaðhvort að reyna að læra núna eða hafa bækurnar í fanginu á sjálfum jólunum!

Ég sit hérna í pappírsflóðinu (eins og alla hina dagana) Komin á bls. 32 í ritgerðinni sem þýðir að kannski er hugsanlegt að mögulega verði ég ef til vill bráðum búin! EN þá á ég eftir aðra litla ritgerð sem ég er ekki byrjuð á, en búin að afla heimilda, lesa mér til og ákveða uppbygginguna - þannig að henni verður nú rumpað af, kannski á morgun! Ég skrapp til Köben í síðasta tímann fyrir jól í gær þar sem við vorum að yfirfara verkefni sem ég skilaði síðasta laugardag. Á meðan við unnum í hópum skrapp kennarinn í burtu og bakaði "æbleskiver" og kom með handa okkur, veitti ekki af til að peppa upp liðið. Í stóra verkefninu eru nefnilega fimm hópar, ein er búin að segja sig úr verkefninu, einn hópur var of seinn að segja sig úr verkefninu en nær ekki að klára og verður að skila auðu en enginn af hinum þremur hópunum (ég meðtalin) er búin með verkefnið og það eru að koma jól!

Strákarnir hafa það gott nú á aðventunni. Á laugardaginn fórum við öll fjölskyldan á leikskólann þar sem strákarnir föndruðu kertaskreytingar, Jóel Kristinn labbaði eins og engill með kertaljós undir Lúsíusöngnum, borið var fram jólaglögg, piparkökur og æbleskiver auk þess sem gengið var í kringum jólatréð og sungnir danskir jólasöngvar.
Eftir jólaskemmtunina fórum við í bakarí og Jóel vildi fá að kaupa sjálfur: "Jeg skal har to klejner" og "og så skal vi har en julestjerne" (julstjerne er vínarbrauð í stjörnuformi). Drengurinn var gríðarlega stoltur af eigin frammistöðu og vildi sérstaklega að ég myndi segja öllum ömmum og öfum frá þessu! Við þetta má bæta að drengurinn er farinn að leiðrétta framburð foreldra sinna af miklum móð - og veitir kannski ekki af!

Nú er vaknað fyrir allar aldir á morgnana til að fá að kíkja í skóinn, stundum klukkan 06:00, jafnvel fyrr en hér gilda reglur - nóttin er ekki búin fyrr en klukkan 07:00!!! Í morgun spurði Jóel u.þ.b. 20 sinnum hvort að klukkan væri ekki orðinn 07 þannig að svefnfriðurinn fyrir þreytta foreldra var ekki mikill.

Ég minni ykkur á að við komum heim á laugardagskvöldið og verðum í miðbænum á Þorláksmessu. Helgi er með íslenskt símanúmer 697 5700 en ég er ekki með neitt íslenskt númer í bili.

Bestu kveðjur

Danskir og íslenskir jólasiðir á aðventunni

2007-12-13T13:48:00.000+01:00

Jóel Kristinn og Fannar Ingi eru farnir að njóta hinna 13 íslensku jólasveina, sem mæta nú galvaskir hingað í götuna á hverri nóttu enda svo mörg íslensk börn sem fá í skóinn. Dönsku börnin fá "kalendergaver" allan desember en íslenskt - já takk gildir að þessu leyti hér í götunni. Reyndar er ansi gaman að fylgjast með Jóel Kristni í þessu ferli nú um jólin. Hann á erfitt með að átta sig á því hvernig þetta með jólasveininn getur virkað og spyr margra mjög svo skynsamlegra spurninga en fær óskynsamleg svör til baka. Í gærkvöldi svaraði ég flestum spurningunum hans bara með því að ég skyldi bara ekkert í þessu heldur, þetta væri bara eitthvað eins og töfrar!

Í gær fóru þeir bræður með leikskólanum sínum í strætó á bóndabæ og keyptu jólatré og næsta laugardag er einhver jólasamkoma fyrir foreldra og börn á leikskólanum.
Svona "by the way" þá eru strákarnir mjög glaðir á leikskólanum núna og finnst voða gaman! Í gær ætlaði ég ekki að ná Jóel heim, hann var "upptekinn" við að teikna flugvél með mörgum hreyflum svo hún kæmist rosalega hratt!
Útiveran á leikskólanum er líka alltaf jafn stór partur starfinu þar og með ólíkindum hvað útigallar bræðranna verða endalaust mikið skítugir - það þyrfi nánast að ráða manneskju í fullt starf til að sjá um þrif af þeim bræðrum!

Stærðfræðikennaraneminn, ég, leit aðeins upp úr ritgerðavinnunni á þriðjudag og fór í tíma til Köben ásamt því að mæta í "julefrokost" með fólkinu úr bekknum. Við mættum 6 af 8 nemendum heim til einnar sem býr út á Amager. Flestir hafa heyrt sögur af dönskum julefrokost og ég var ansi spennt að fá að taka þátt í einhverju svona ekta dönsku.
Drykkina áttum við að koma með sjálf en þar sem ég vissi ekki hvað hinir myndu gera keypti ég bæði litla rauðvín og 3 bjóra og hafði í töskunni. Ég fór nú reyndar með alla bjórana heim því það kom í ljós að allir hinir fengu sér bara 1 bjór með matnum og svo bara vatnssopa.
Maturinn var keyptur úr tilbúna kjötborðinu í súpermarkaðnum. Grunnurinn var rúgbrauð, hvítt brauð, remolaðitúpa, majonestúpa, örfáar gúrkusneiðar og cherrytómatar. Upphitað úr kjötborðinu kom svo "þurrt" fiskifillet í raspi (borðað á rúgbrauði með smá remolaðiklessu), "þurr" upphituð purusteik (borðuð á brauði með rauðkáli + majonesi), frikadeller (líka borðaðar á brauði með majonesi og jafnvel rauðkáli), heit leverpostej (skellt á rúgbrauð). Í dessert var svo að sjálfsögðu "ris a la mand" sem bar af, af réttum kvöldsins. Á eftir var farið í pakkaleik og var ég svo heppin að fá tvo jólablýanta - og svo ótrúlega skemmtilega vildi til að þeir eru alveg eins og jólablýantarnir sem jólasveinninn gaf sonum mínum í skóinn í morgun!
Ég setti jólageisladisk með Kór Snælandsskóla í pakkann frá mér og það var einmitt Ole, eini karlmaðurinn í hópnum og mikill áhugamaður um tónlist sem fékk diskinn. Ég gerði það nú meira til gamans að setja diskinn í pakkann en skólafélagar mínir tóku þessu mjög alvarlega og fóru strax að spila diskinn og ræða sönginn. Eftir fyrstu fimm tónana komust þau að þeirri niðurstöðu að svona söngur heyrðist ekki í dönskum skólakórum - Heyr Heyr Heiðrún! (ég get eftir nokkrarferðir á samnorræn barnakóramót - að það er rétt hjá þeim, dönsku stuttermabolakórarnir með shalalala lögin hafa annað sound en Kór Snælandsskóla 2001).

Í kvöld fer svo viðskiptafræðineminn á sinn julefrokost, ég veðja á að það verði fáir þar sem láti sér nægja 1 bjór með matnum!!!!!

Annars bara bestu kveðjur til ykkar allra héðan úr ritgerðavinnunni í Danaveldi,

Lærdómsfréttir

2007-12-08T22:51:00.000+01:00

Húsmóðirin er bara að skrifa ritgerðir, það kemst nákvæmlega ekkert annað að en að læra. Afraksturinn er því miður ekki alveg nógu mikill, það þarf að reddast sem allra fyrst - annars má búast við að jólin fari öll í ritgerðaskrif, sem er ekki spennandi. En reddast svona lagað ekki alltaf á endanum?

Húsbóndinn er líka alltaf að læra, hópverkefni og svo náttúrulega allt þetta sem er til prófs í byrjun janúar - En reddast svona lagað ekki alltaf á endanum?

Fannar Ingi er að læra að vera 3 ára. Það gengur vel og er hann farinn að sýna alls konar töffaratakta sem ekki sáust hjá honum þegar hann var bara tveggja ára.

Jóel Kristinn er mest í því að læra dönsku, fer fram með hverjum deginum. Við foreldrar hans fengum bréf í vikunni frá Vestergaardskólanum. Til foreldra tilvonandi börnehaveklasse! Það er foreldrafundur í skólanum þann 13. desember. Skemmtileg tímasetning hjá Dönunum fyrir kynningarfund - þetta er akkurat það sem er foreldrum efst í huga svona rétt fyrir jól!
Jóel Kristinn er yfirleitt mjög sjálfbjarga og sér auðvitað alveg um að klæða sig sjálfur og svoleiðis en í kvöld var mamma hans að dekstra hann eitthvað þegar hann var að fara að sofa og klæddi hann í náttfötinn. Þá sagði Jóel: "ég verð að fara að læra að klæða mig sjálfur, annars þarf konan sem ég giftist að klæða mig þegar ég er orðinn fullorðinn!"

Saman eru þeir bræður að læra að vera töffarar. Þeir fóru í klippingu á íslensku hárgreiðslustofuna niðri í bæ í gær. Hárgreiðslukonurnar settu gel í hárið á þeim og settu toppinn svona upp í loft - eins og á alvöru töffurum. Þeir voru ekkert lítið glaðir með þetta, það mátti ekki setja á þá húfurnar og stanslaust var verið að tékka á því hvort hárið væri í lagi. Í dag fóru þeir svo í tvöfalt afmæli hjá íslenskum systkinum hér í götunni. Auðvitað með gel í hárinu - og toppinn upp í loft!

Sem sagt bara allt gott að frétt af okkur, orðið nokkuð jólalegt hjá okkur þó það sé því miður kannski ekki nógur tími til að njóta aðventunnar. En átti einhver svo sem von á því að desember væri rólegur mánuður hjá námsmönnum????

Bestu kveðjur,

Julemanden er kominn til Århus!

2007-12-02T21:27:00.000+01:00

Jahá! Það er aldeilis fréttir héðan frá Árósum. Julemanden er kominn! Hann kom á föstudaginn með skipti og fór svo með julenissunum sínum, lúðrasveitum, brunabíl o.fl. í skrúðgöngu um miðbæinn. Við íslensku fjölskyldurnar hér í Beykiskóginum flykktumst að sjálfsögðu niður í bæ og fylgdumst með herlegheitunum. Þetta var voða gaman allt saman. Rétt áður en skrúðgangan kom var líka kveikt á jólaljósunum í göngugötunni og það er alveg yfir meðallagi mikið af ljósum!
Á föstudagskvöldið var opið í búðunum til kl. 24:00. Stemningin minnti einna helst á Þorláksmessu á laugarveginum. Við nýttum tímann og skelltum okkur í nokkrar búðir og erum hér með nánast búin að kaupa allar jólagjafirnar!!!!! Húrra fyrir okkur - sem höfum nánast alltaf átt a.m.k. 15 gjafir eftir á Þorláksmessu og sjaldnast klárað gjafakaupin fyrr en á aðfangadagsmorgun!

Laugardagskvöldið var líka ótrúlega skemmtilegt hjá okkur í fjölskyldunni. Við skelltum okkur yfir til nágrannanna og spiluðum m.a. Buzz sem er ótrúlega skemmtilegt Play Station spurningaspil! Vorum reyndar dálítið lengi frameftir svona miðað við að eiga tvo gorma sem ekki kunna að sofa út - en þeir settu nú samt persónulegt með drengirnir og sváfu næstu því til kl.9:00 sem er þeirra lang besta frammistaða í því að sofa út!

Í dag sunnudag héldum við áfram að skemmta okkur fjölskyldan. Við skelltum okkur í Storcenter Nord sem er verlsunarmiðstöð hér í Árósum en þar voru tónleikar með dönskum krökkum sem tóku þátt í Melodi Grand Prix 2007 sem er svona skandinavísk Eurovision keppni fyrir krakka. Við Jóel Kristinn horfðum einmitt á úrslitin í beinni útsendingu frá Svíþjóð um síðustu helgi og varð Jóel Kristinn alveg dolfallinn af hinum danska Matthias sem er 14 ára sætur strákur sem rappar, syngur og dansar - og gerir það alveg ótrúlega vel! Jóel Kristinn hefur síðan þá verið að æfa dansspor og "rapp" og tók m.a. þvílík spor í eldhúsinu eftir kvöldmatinn. Allavegana var gaman að geta leyft Jóel að sjá idolið sitt "live" - þetta er jú í fyrsta sinn sem hann eignast eitthvað svona idol!

Tókum okkur einnig til í dag og skelltum upp eitthvað af jólaljósum og skrauti.

Nú er bara spennandi að sjá hvort að eitthvað gangi með lærdóminn í vikunni - ef ekki þá erum við í vondum málum!

Bestu kveðjur til ykkar allra,
P.s. það eru bara 20 dagar þangað til við komum í stutt jólastopp heim

Fréttir af eiginlega engu!

2007-11-28T12:31:00.001+01:00

Engar fréttir eru góðar fréttir! Þannig er staðan hér.

Dagarnir fljúga áfram og það styttist og styttist til jóla á sama tíma og verkefnamagnið eykst og fleira og fleira er óklárað. Þetta er nú kannski bara eðlilegt ástand svona þegar jólin nálgast en alltaf svolítið yfirþyrmandi að hafa prófin og ritgerðirnar hangandi yfir sér - eeeeeen ennþá meira gaman þegar allt verður yfirstaðið (í lok janúar!)

Fannar og Jóel eru í góðu ástandi, óslasaðir og alltaf að babbla eitthvað á dönsku! Já þetta er að koma. Jóel prófar og prófar og notar bara íslensk orð með dönskum framburði ef hann kann ekki dönsku orðin. Fannar passar sig að við foreldrarnir heyrum hann ekki segja neitt en talar svolítið á leikskólanum.
Þeir skilja þetta helsta á leikskólanum, svona í sambandi við matmálstímana og í hverju þeir eiga að fara út í kuldann og svoleiðis spjall. Annars gerum við foreldrarnir okkur ekki almennilega grein fyrir stöðunni í dag - við vitum bara að þetta er að koma!

Annars er lítið um fréttnæmar uppákomur þessa dagana þar sem skólinn (og svo jólastandið allt saman) hefur forgang.

Bestu kveðjur héðan úr rólegheitunum,

Myndafréttir

2007-11-21T20:14:00.001+01:00

Jóel Hook - er hann oftast kallaður þessiFlying Fannar

Saumafréttir 2 - læknirinn saumar Fannar Inga

2007-11-16T23:55:00.000+01:00

Eins og í öllum alvöru fréttamiðlum má búast við fréttum af slysum og svolítið af blóði hér á fréttasíðu fjölskyldunnar.

Í morgun var Fannar Ingi sleginn í hausinn (ennið - rétt við hársvörðinn) á leikskólanum. Hringt var heim í móður barnsins og hún beðin um að koma og meta ástandið á barninu. Þegar móðirin mætti á staðinn hafði blóðið lekið hressilega úr enni barnsins í um 30 mínútur auk þess sem drengurinn hafði fengið ís til að lina sársaukann (ísinn var sko til að að borða!!!).
Hanne, sem stýrir leikskólanum, hafði boðað komu drengsins til heimilislæknisins sem gerði heiðarlegar tilraunir til að líma sárið en þar sem það gekk ekki þurfti að sauma tvö spor.
Það má sérstaklega taka það fram að Fannar Ingi var sko ekki að grenja yfir svona smáræði, þær á leikskólanum sögðu að hann hafi bara setið rólegur og góður með blóðið lekandi niður andlitið og svo hjá lækninum kom bara smá svona uhuhu (kannski 5 - 7 sek.) þegar læknirnir sprautaði deyfingu í sárið áður en hún saumaði.
Eftir saumaskapinn hjá lækninum var drengnum bara skutlað aftur á leikskólann í blóðugum fötum með deyfingu í enninu þar sem foreldrar barnsins voru svo uppteknir að sinna náminu sínu. Það var sem betur fer í góðu lagi og var hann bara hress og kátur og sýndi öllum á leikskólanum spottana í enninu............ ekki vanur þessari athygli á leikskólanum þessi rólegi drengur!

Myndavélafréttir

2007-11-15T18:28:00.000+01:00

Rétt í þessu var viðskiptafræðineminn, Helgi Kristinn að eignast glænýja, rándýra myndavél Canon 40D og einhverja svaka fína linsu (líka rándýra).
............svona er að vera fátækur námsmaður í útlöndum...........

Fréttaritari vill sérstaklega taka það fram að það var hún sem dró upp kortið í búðinni og greiddi fyrir myndavélina. Sölumaðurinn var svo ánægður með gæsku eiginkonunnar að hann spurði Helga Kristinn hvort hann mætti ekki bara giftast konunni hans, hún væri svo góð. Helgi neitaði!

Nú þeir sem þekkja hinn nýbakaða myndavélaeiganda vita að nú tekur við tímabil ljósmyndunnar! Næstu dagar - vikur verða þéttsetnir hinum ýmsu tilraunum með hraðastillingar, ljósop og hvað þetta allt saman heitir. Ég þori ekki lengur að lofa neinu, en hver veit nema nokkrum myndum verði skellt á netið..................svona a.m.k. fyrir jól.........

Ég verð að fara, flassið er byrjað að blikka ótt og títt........
kveðjur,
fréttaritarinn

Fréttir af rólegheitum og jólaheimsókn

2007-11-12T13:12:00.000+01:00

Héðan er bara gott að frétta - eða í raun voða lítið að frétta (sem er bara gott).

Fannar Ingi og Jóel Kristinn eru í rólegheitum farnir að tala smá dönsku og þar sem íslenskan er notuð bæði heima og í leikskólanum, æfa þeir sig helst við matarborðið hér heima. "kan ikke spise mere!" "Må jeg få mælk?" ............ eru frasar borðhaldi fjölskyldunnar, bara gaman af því!
Í dag (mánudag) eiga þeir reyndar að byrja í dönskukennslu á leikskólanum. Þeir áttu reyndar að byrja strax í ágúst. Einn leikskólakennarinn útskýrði fyrir okkur hvernig það myndi fara fram, sendi okkur heim með einnota myndavél til að taka myndir sem nota átti í dönskukennslunni en svo bara gerðist ekki neitt. Á fimmtudaginn kom svo annar leikskólakennari og útskýrði fyrir okkur dönskukennsluna sem byrja á í dag, vonandi verður meira úr þessu núna!

Við skruppum í fjölskylduferð til Þýskalands á laugardaginn. Keyptum 576 dósir af drykkjum + nokkrar flöskur. Tökum það sérstaklega fram að lang stærstur hluti dósanna inniheldur óáfenga drykki - bara svo þið farið ekki að hafa áhyggjur af heimilislífinu hér.

Nú aðalfréttirnar eru kannski þær að við komum heim um jólin.............. en bara rétt yfir jólin!
Prófin eru hjá okkur báðum í janúar!!!!!!!!!!!!!!
Helgi Kristinn byrjar á fullu í prófum 3. janúar og á sama tíma á fréttaritarinn að skila ritgerð sem er til prófs.
Það þýðir að við fljúgum til baka 29. desember og verðum því hér í DK um áramótin.
Við komum því heim laugardagskvöldið 22. desember og förum aftur 29. desember.

Bestu kveðjur,

Gamlar (en góðar) fréttamyndir

2007-11-07T20:54:00.001+01:00

Knattspyrnumót í lok september - Jóel Kristinn og félagar í Viby Fodbold

Jóel Kristinn alveg að ná boltanum, í hvítri treyju og bláum buxum! Þetta er samt ekki Fram-búningur þó svo að afi og amma á Nesinu yrðu stolt af því!
Eftir leikina takast leikmenn í hendur og segja: "tak for kampen" - frekar sætt!
Viby Fodbold með medalíurnar, Jóel Kristinn lengst til vinstri (ef einhver skyldi ekki þekkja hann lengur)
Stoltir leikmenn Viby Fodbold
(Snúa höfði) Fannar Ingi að skoða medalíuna sem hann vann sér inn með því að gráta fögrum tárum!

Plötufréttir - Ef væri ég ...

2007-11-02T13:15:00.000+01:00

Það hefur verið pínu skrítin tilfinning fyrir fréttaritara að fylgjast með útkomu nýju plötunnar hennar Regínu úr allri þessari fjarlægð. Hingað til hef ég verið búin að heyra allt efnið áður en það er gefið út, búin að heyra demo og fylgjast með ferlinu þannig að þegar plöturnar (sérstaklega sú fyrsta) koma út er bara hlaupið út í búð og keypt eintök í von um að plöturnar byrji að rúlla upp sölulistana.

Nú er staðan allt önnur - ég er bara hérna í Danmörku og hef ekkert heyrt og ef ekki væri netið þá veit ég ekki hvað!
Ég var auðvitað rosalega spennt að heyra plötuna. Í fyrsta lagi af því að Regína er sjálf að semja og því uppáhaldslögin mín á síðustu plötu voru einmitt lögin sem Kalli Olgeirs samdi, Ljósin komu, Draumur um dag og Hvað tekur við? En á þessari plötu semja Regína og Kalli Olgeirs lögin saman. Ótrúlega spennandi.

Ég auðvitað rauk inn á tonlist.is og keypti plötuna og er núna á fullu á hlusta og njóta.
Flest lögin eiga það sameiginlegt að vera yndisleg stemning, þægileg hlustun og oft skemmtilegt "grúf" í hljómsveitinni.
Ég er strax við fyrstu hlustun kolfallin fyrir nokkrum lögum. Lagið Alveg ein, er ótrúlega melódískt og svona "útvarpsvænt" ég var farin að raula með í lok lagsins. Mér finnst gaman að hlusta á Síðan þú komst, þar er textinn ekki beint ljóðrænn heldur svona eins og Regína sé að segja frá og það er allt of langt síðan við höfum spjallað svo ég fékk svona "söknuðar-tilfinningu" þegar ég hlustaði á lagið.
Ég gæti náttúrlega sagt eitthvað misgáfulegt um öll lögin en það eru kannski engar fréttir hvað mér finnst um lögin. Ég vil samt nefna titillagið Ef ég væri, frábært lag sem sýnir fílinginn í röddinni. Í augnablikinu er ég að hlusta á Líttu aldrei við og verð að viðurkenna að það finnast nokkur tár ..................... ógeðslega er ég að verða væmin.............
Lokalag er líka svona fyrir minn smekk og Engill minnir mig bara á hvað það er langt síðan ég hef hitt Anítu

Annars bara allir út í búð að versla, svo fáið þið annað eintak frá okkur í jólagjöf..... hehe
Til hamingju Regína mín!

Bestu kveðjur,
Lóa BJörk

Afmælisfréttir

2007-10-31T08:53:00.000+01:00

Fannar Ingi Helgason er orðinn 3 ára. Drengurinn fékk eiginlega 4 daga afmælisveislu með gleði, gjöfum og góðum (g)veitingum.
Þegar drengurinn vaknaði upp á föstudagsmorgni voru afi og amma á Selfossi mætt og þótti hinu tilvonandi afmælisbarni og bróður hans ekki slæmt að fá eitt knús áður en haldið var á leikskólann. Ekki versnaði það þegar afi og amma komu með að sækja og það snemma! Nú eins og hefð er þegar ömmur og afar koma í heimsókn var haldið í miðbæinn þar sem bærinn var skoðaður, smá búðaráp og matur. Síðan fór eftirmiðdagurinn í afmælisundirbúning

Á afmælisdaginn (laugardag 27.10) hófst dagurinn með smá kökubakstri en fljótlega voru fengin lánuð hjól fyrir "gamla" liðið og farið í klukkutíma hjólreiðaferð í kringum vatnið.
Afmælisveislan hófst klukkan 15:00 en þetta var tvöföld veisla því Kristján (á 203) varð 2 ára á föstudaginn og slógum við því saman í góða veislu fyrir báða strákana. Það var troðfullt hús og voða gaman.
Drengurinn fékk mikið af dóti og er alsæll með allt saman! Stoltastur er hann þó af því að vera kominn í nýtt rúm, svona með engum rimlum............ enda tími til kominn, barnið orðið þriggja ára!

Á sunnudag fengum við bílaleigubíl til að geta keyrt með ömmu og afa um svæðið. Við sýndum þeim ströndina og Bambaskóginn fórum upp á Himmelbjerget og í Randers Regnskov. Um kvöldið elduðum við svo góðan mat enda síðasta kvöld áður en gestirnir góðu héldu aftur heim á Selfoss.

Á mánudag var svo afmælisveisla á leikskólanum. Búið var að setja dúk á borð og kveikja á 3 kertum þegar við komum með heimabakaða pizzasnúða fyrir alla krakkana á leikskólanum. Nei! Ekki fyrir alla krakkana............... við íslensku foreldrarnir höfðum ekki áttað okkur á því að múslimsku börnin á leikskólanum máttu auðvitað ekki fá snúðana því höfðum sett skinku á þá!!! Okkur þótti þetta auðvitað mjög leiðinlegt en leikskólakennararnir redduðu mandarínum fyrir þau í staðin.
Þetta er auðvitað spurning, það hefði verið ótrúlega lítið mál fyrir okkur (ef við hefðum áttað okkur á þessu) að sleppa skinkunni eða búa til eitthvað annað - en á móti kemur spurningin á að sleppa skinkunni á pizzunni hér í landi svínakjötsins? Verður fólk sem flytur til Danmerkur ekki bara að taka tillit til þess að hér borðar fólk svínakjöt á pizzuna? En þetta eru bara börn 3 -5 ára og þau vilja auðvitað fá veitingar í afmælinu eins og hin börnin................. ég sker bara niður ávexti í næsta afmæli, þá ættu öll trúarbrögð að geta verið með!

Aðrar fréttir tengjast allar mat því með Selfyssingunum fengum við allt það mikilvægasta! Lambakjöt sem borðað var með bestu lyst á mánudagskvöld og íslenskan fisk sem borðaður var í gærkveldi auk þess sem nú eigum við íslenskar súkkulaðirúsínur, lýsi og Hunt BBQ-sósu. Það eru aldeilis gleðitímar framundan!

Bestu kveðjur,

Aukafréttatími

2007-10-25T18:17:00.000+02:00

Þessi aukafréttatími er í tilefni tveggja merkilegra frétta.
1. Jóel Kristinn er í ströngu námi á leikskólanum. Í gær fór hann með elstu krökkunum á leikskólanum í strætó í bíó. Þar lærði hann að drekka kók! Hingað til hefur barnið bara drukkið djús eða mjólk við hátíðleg tækifæri svo sem afmæli, bíóferðir eða annars konar matarveislur en í leikskólaferðinni var boðið upp á popp og kók (sem flokkast líklega undir nauðsynleg undirstöðu atriði í því að kunna að fara í bíó). Jóel Kristinn þáði auðvitað kókið með þökkum! Aðspurður um hvort þetta hafi verið gott svaraði hann ákveðinn, játandi. Reyndar hafi þetta verið dálítið sterkt en vinur hans var með vatn og hann fékk bara sopa hjá honum og þá var kókið mjög gott!!!

2. Kristín Hrefna Halldórsdóttir 23 ára "tengdadóttir" forsætisráðherra hefur verið ráðin framkvæmdastjóri borgarstjórnarflokks Sjálfstæðisflokksins í Reykjavík.
http://www.eyjan.is/ordid/
Fyrir þá sem aðeins lesa fréttirnar má upplýsa að Kristín Hrefna er auðvitað miklu miklu meira en "tengdadóttirin.is" hún er framkvæmdaforkur frá A - Ö. Hæfileikarík, dugleg, skemmtileg, jákvæð....... Við sem hana þekkjum vitum að hún hefur augljóslega verið ráðin í stöðuna af eigin verðleikum. Það er svo sem eðlilegt að fjölmiðlar sýni fjölskyldutengslunum áhuga en við vonum að fólk fái tækifæri til að meta hana af eigin verðleikum fyrst og fremst. Nú er þessari hallelúja frétt um ágæti Kristínar lokið. Kristín til hamingju með starfið!

Bestu kveðjur,

Fréttir eftir efterårsferie

2007-10-23T21:46:00.000+02:00

Jæja, þá er allt komið á fullt aftur hér í Beykiskóginum. Ekkert afslappelsi meir (þangað til næst alla vegana).
Viðskiptafræðineminn er að fara að skila fyrstu ritgerð vetrarins. Hún fjallar um efnahagsmál í Tyrklandi - gæti ekki verið meira spennandi!!! Áhugasamir um efnahagsmál Tyrklands ættu að geta leitað til Helga Kristins í lok vikunnar - þegar hann verður orðinn sérfróður á þessu sviði.
Kandidat - studenten i matematikkens- didaktik er rétt kominn inn úr dyrunum eftir lestarferð og kennslustund í Kaupmannahöfn (eins og langflesta þriðjudaga). Í dag gerðust þau undur og stórmerki að hinn alíslenski og ekki dönskumælandi nemi bara talaði og talaði - á dönsku (eða svona næstumþvídönsku) í umræðunum í tímanum. Fram til þessa hefur neminn (sem einnig er fréttaritari hér) verið hin þögla týpa í kennslustundunum en í dag gat Íslendingurinn bara ekki þagað meir (rétt upp hönd sem er hissa!!!!!!!).

Jóel Kristinn er farinn að segja slatta á dönsku og er alltaf að prófa. Í síðustu viku voru þeir bræður "einir" sem sagt án hinna íslensku strákanna á leikskólanum í einn dag og eftir daginn flutti pædagoginn á deildinni þeirra okkur þær fréttir að Jóel hefði bara sagt fullt m.a. "min mor kommer klokken tre" sem er alveg fimm orða setning.
Fannar Ingi er alltaf að spyrja hvernig hitt og þetta sé á dönsku og prófar stundum. Oft þegar hann prófar að tala dönsku verður hann voða feiminn á eftir - algjört krútt!
Þetta sem sagt kemur hjá þeim endanum þó að þeir leiki sér bara á íslensku og bara við íslensk börn bæði hér heima og á leikskólanum..............

Framundan er skemmtileg helgi. Fannar Ingi verður 3 ára á laugardaginn og þá verður auðvitað veisla. Vinum og fjölskyldu er að sjálfsögðu boðið - hehe. Reyndar fáum við gesti að heiman því Ingi afi og amma (Anna)Þóra eru væntanleg á fimmtudagskvöldið. Þau taka því þátt í veisluhöldunum með hinum Íslendingunum hér í Beykiskóginum.

Með bestu kveðju til ykkar allra

Fréttamyndir frá miðjum september

2007-10-21T16:52:00.001+02:00

Hér eru nokkrar myndir, þetta flokkast nú eiginlega undir gamlar fréttir. Grill á ströndinni, fjölskylduferð til Köben og ein af bræðrunum héðan frá Árósum. Allar myndirnar eru teknar um miðjan septmeber.

Verið að grilla pylsur og ströndinni. Pylsubrauðin eru ekki eins og við þekkjum heima á Íslandi heldur svona frönsk með gati.
Frændurnir Pétur Orri og Jóel Kristinn í hinu eina sanna Tivoli í Kaupmannahöfn.
Margrét eða "Magga móða" á leið í rússíbana með Tómas Atla. Þess má geta að ferðin gekk mjög vel og móður og barni heilsast vel á eftir.... hehehe
Bræðurnir á göngu í einum að görðunum hér í Árósum. Danirnir eru ekki eins uppteknir af þéttingu byggðar og "sumir" aðrir og skilja því eftir græn svæði hér og þar í bænum, meira að segja í miðbænum!!!!
Fannar Ingi í hringekjunni í Tivoli. Þrátt fyrir að vera orðinn vanur maður í rússíbanaferðum er alltaf jafn gaman að fara á hestbak í hringekjunni. Fyrir aftan hann sést glitta í Tómas Atla sem líka var á hestbaki.

Bless í bili,

Næstu fréttamyndir ættu svo að sýna fótboltamanninn í keppni.

Efterårs -"frí"

2007-10-18T22:17:00.001+02:00

Það er helst að frétta að hér í DK er efterårsferie þessa vikuna. Frí í skólunum en samt ekki. Fannar og Jóel fóru á leikskólann mánudag - miðvikudag á meðan foreldrarnir unnu í skólaverkefnum. Í dag á fimmtudegi tókum við okkur öll frí og fórum í Kattegatcenter að skoða hákarla, seli og hina ýmsu fiska. Þetta var bara alveg frábær dagur sól og blíða mest allan daginn en það var nú eiginlega skítkalt, samt 8 - 10 gráður, brrrrrr.

Til að gleðja Kristínu Hrefnu má nefna að þegar við komum heim elduðum við okkur góðan mat, kveiktum á kertum og svona.

Húsmóðirin á heimilinu fékk hjól í gær. Forláta TREK fjallahjól með dempara og alles..... Húsbóndinn og yfirkokkur heimilisins tók að sér að prufukeyra hjólið í hjólatúr með nágrönnunum. Þeir hjóluðu að Moesgaard-ströndinni og þar eftir stígum meðfram allri ströndinni og niður í miðbæ og svo þaðan heim. Hjólið reyndist ótrúlega vel en hjólreiðamaðurinn var rennsveittur eftir átökin enda dágóður spotti sem hjólaður var á ca. 70 mín.
Fannar Ingi fékk reyndar líka hjól í vikunni, í fyrirframgreidda afmælisgjöf. Hjól með hjálpardekkjum! Stefnan er nú samt að kaupa stól á nýja fjallahjólið fyrir Fannar svo hægt verði að fara í aðeins lengri hjólreiðatúra.

Bestu kveðjur úr Beykiskóginum,

Hjólafréttir Jóels

2007-10-15T09:22:00.000+02:00

Fréttaritari vill tilkynna það sérstaklega að Jóel Kristinn Helgason getur hjólað án hjálpardekkja! Hingað til hefur hjólreiðakappinn ekki verið sérstaklega viljugur að reyna (hann vill sko helst bara gera það sem hann kann og getur) en í gær hjólaði drengurinn sjálfur fram og til baka um götuna án aðstoðar.

Við höfum það bara gott áttum góða helgi. Á föstudagskvöld var Kulturnat í Árósum og löbbuðum við og kíktum á barnadagskrá í ráðhúsinu. Hittum þar skólafélaga Helga úr viðskiptafræðinni og löbbuðum með hans fjölskyldu og ætluðum að fá okkur að borða. Það var nú ekkert svo einfalt - allt troðfullt þannig að við enduðum bara á McDonalds.

Á laugardag fórum við með tveimur nágrannafjölskyldum okkar í Den gamle by. Veðrið var alveg frábært, glampandi sól og blíða (eins og alla helgina - og er enn!) og við löbbuðum um og skoðuðum gömlu húsin. Strákarnir fóru líka í leiktæki frá því í eldgamla daga (svona þegar langamma (amma Lóa eða jafnvel amma Stína voru ungar!). Fengum svo þriðju nágrannafjölskyldu okkar í heimsókn þegar við komum heim og borðuðum með þeim. Gaman að eiga svona mikið að góðum nágrönnum!

Á sunnudeginum var sett met í rólegheitum. Slappa af, baka köku, tölvuleikir, úti að leika, inni að leika, allt í rólegheitunum. Ótrúlega notalegt.
Það eru þó fréttir að í kvöldmatinn í gær var lax. Það er í fyrsta sinn síðan við komum hingað 1. ágúst sem við fáum eitthvað sem líkist fiski. Kokkurinn á heimilinu gerði máltíðina auðvitað snilldarlega og kannski verður bara fiskur aftur í matinn hér í DK.

Ingi afi á Selfossi átti afmæli í gær, er bara ungur karlinn - ennþá. Menn sem klífa fjöll og firnindi í hverri viku (og öll hærri en Himmelbjerget) geta nú varla flokkast undir að vera gamlir þó þeir séu á sjötugsaldri (hmmmm sjötugsaldri - getur það verið!!!!!!!!!!!)
Til hamingju með daginn, Ingi afi!!!

Bestu kveðjur,

Fréttamyndir

2007-10-09T22:23:00.000+02:00

Þá eru hér nokkrar myndir, svona til að byrja með. Meira að sjálfsögðu væntanlegt von bráðar. Í næsta myndaholli má t.d. búast við myndum af fyrsta fótboltamótinu hans Jóels Kristins og Kaupmannahafnarferð. En hér kemur svona smá............. það gleymdist reyndar að snúa þessari fyrstu.............. en það er allt í lagi.

Hér eru flottustu bræðurnir - þið verðið bara að halla hausnum til að skoða myndina!!!
Hér er Jóel Kristinn á fyrstu fótboltaæfingunni sinni í ágúst - í Man Utd. búning
Bræðurnir með sykurhúðuð epli á miðaldarfestival í Horsens
Dauðinn og feðgarnir á miðaldarfestivalinu í Horsens
Með nágrönnunum Hildi, Magnúsi (7 ára) og Halldóri á miðaldarfestivalinu

Fréttir frá ömmuheimsókn

2007-10-09T22:08:00.000+02:00

Nú er það helst í fréttum að amma Guðlaug er búin að koma í heimsókn og leggja formlega blessun sína yfir búskapinn og umhverfið hér í Bøgeskovparken.

Þegar fjölskyldan fær góða gesti er er ekkert verið að hanga í aðgerðarleysi. Strax við komuna á laugardagskvöldið var ráðist í “gourmet” eldamennsku “a la” Helgi Kristinn. Þess má geta að Helgi var drifinn í eldhúsið beint af golfmóti þar sem spilað var á fínum velli í ótrúlega góðu veðri! Fyrir áhugasama þá gekk spilamennskan alveg ágætlega þó drivin hafi ekki hrokkið í gang fyrr en á síðustu holunum.

Á sunnudeginum fórum við öll í Randers Regnskov sem er yfirbyggður dýra- og plöntugarður í um 30 – 40 mínútur frá Århus. Þarna er búið að búa til svæði með dýrum og gróðri frá Suður Ameríku, Asíu og Afríku. Það er sko alveg hægt að mæla með þessari skemmtun. Á bakaleiðinni keyrðum við meðfram ströndinni og enduðum á ströndinni “okkar” Moesgård-ströndinni. Þar vildi svo ótrúlega skemmtilega til að tvær aðrar fjölskyldur úr götunni voru mættar á sama tíma (eina fólkið fyrir utan okkur á allri ströndinni). Þórunn og Jói með börnin sín þrjú og Palli og Hjördís með strákana tvo. Þarna fékk amma Guðlaug óvænt tækifæri til að kynnast aðeins 2/5 hluta íslensku nágranna okkar í Beykiskóginum. Nú eins og svo oft áður var góður matur á boðstólnum um kvöldið, svona gestinum ti l heiðurs.

Á mánudeginum fékk amma Guðlaug að sjá leikskóla strákanna og miðbæ Árósa. Til að koma lesendum á óvart þá var haldið heim og eldaður góður matur um kvöldið!!!

Næst eru það svo bara amma og afi á Selfossi sem mæta á svæðið (í lok mánaðarins) en það eru auðvitað allir spenntir að fá fleiri svona afa og ömmur í heimsókn.
Bedste hilsner,