Rútína á ný!

Hér gengur lífið sinn vanagang. 

Drengirnir alsælir að vera komnir í skólana sína aftur. Jóel Kristinn verður í því sama og á haustönninni þ.e. springgymnastik og fótboltanum sem er bara fínt. Í skólanum bætist smá við, þar sem að nú kemur dönskukennari inn í bekkinn 1 eða 2 sinnum í viku.  Þetta er kennarinn sem mun taka við bekknum næsta vetur en hér í DK er það oftast þannig að það er sérstakur börnehaveklasselærer og svo tekur dönskukennarinn við umsjóninni í 1. bekk sem er reyndar 2. bekkur á Íslandi.  Fljótlega kemur líka inn stærðfræðikennari sem mun svo halda áfram með bekkinn í stærðfræði næsta skólaár. Jóel fór líka í hefðbundna heimsókn til skólahjúkkunnar í vikunni og staðfesti hún að drengurinn bæði sjái og heyri vel er 120,5 cm og bara í góðu lagi að öllu leyti!

Fannar Ingi harðneitar að halda áfram í Boldspilinu þrátt fyrir að það hafi verið mjög fínt námskeið og við ætlum nú ekki að neyða drenginn til að halda áfram.  Þeir bræður hafa báðir verið að tala um að spila á hljóðfæri og kannski getum við fundið út úr því fyrir næsta vetur, skv. skyndikönnun á netinu eru nú samt engir námsmannaprísar í boði í tónlistarnáminu sem er rándýrt eins og á Íslandi - en þetta kemur bara í ljós. Fannar Ingi mun því láta leikskólann nægja en segist þá ætla í fótboltann þegar hann byrjar aftur fyrir hans aldur í vor.

Helgi fór í próf 3. janúar sl. og gekk bara fínt.  Nú er hann í rólegheitunum að undirbúa sig fyrir næsta próf, ekkert stress ennþá en það á eftir að koma.  

Ég skilaði öllum mínum verkefnum þ.e. 115 bls í 4 eintökum samtals 460 bls. á þriðjudagsmorgun. Nú býð ég bara eftir að fá að vita hvenær ég lendi í prófunum mínum en prófadagarnir eru frá 19. - 30. janúar.  Ég hef verið að nota tímann aðeins síðustu daga til að undirbúa mastersritgerðina mína en ef ég næ öllum prófum á þessari önn þá á ég bara ritgerðina eftir!  Í gærkvöldi áður en ég skrapp í átveislu með nágrannakonum mínum þá skrifaði ég niður þá hugmynd sem ég hef að efni og í dag sendi ég hana til þess kennara sem ég helst vildi fá sem leiðbeinanda og viti menn 5 mínútum seinna svaraði kennarinn mailinu og samþykkti bæði að verða leiðbeinandinn minn og að hugmyndin að efninu væri eitthvað sem vel væri hægt að nota! Þá þarf ég amk ekki að hafa áhyggjur af því!

Í gær héldum við Íslendingarnir í götunni þrettándagleðina okkar, eins og í fyrra söfnuðumst við saman og kveiktum bál, brenndum jólatré og skutum upp afganga af rakettum og börnin fengu stjörnuljós. 

Nú erum við fjölskyldan öll farin að hlakka til að koma til Íslands í vetrarfríinu (6. - 16. febrúar) við verðum nú eins og venjulega að skipuleggja tímann vel til að ná að hitta sem flesta. Jóel Kristinn er búinn að leggja inn pöntun fyrir snjó á Íslandi enda er víst lítið um svoleiðis hér hjá okkur - sáum samt nokkur korn um síðustu helgi og var þeim fagnað gríðarlega í þær klukkustundir sem snjórinn var.

Bestu kveðjur,

Gleðilegt ár!

Við fjölskyldan óskum ykkur öllum gleðilegs árs og hlökkum auðvitað til að hitta ykkur öll á nýju ári.

Við höfum haft það rólegt og gott yfir jólin.  Helgi hefur verið að læra fyrir próf og við strákarnir höfum bara verið að leika og slappa af.  Við fórum á jólaball hjá Íslendingafélaginu þar sem synir tónmenntakennarans fengu loksins að heyra og syngja íslensku jólalögin (tónlistaruppeldið eitthvað slappt á heimilinu um þessar mundir).  Þá skruppum við og kíktum á lífvarðaskipti hjá drottningunni sem var hér í Árósum yfir jólin.  Annars erum við bara búin að vera heima! 

Ég var nú eitthvað að læra og á morgun er það lokahnikkurinn - allt á að klárast um helgina.

Áramótin voru mjög skemmtileg hjá okkur.  Við borðuðum með Þórunni, Jóa og börnunum þeirra og það er sko aldrei leiðinlegt hjá okkur!!! Við vorum með kalkún í matinn - þvílíkt vel heppnað. Borðuðum auðvitað yfir okkur, vorum með ótrúlega góða forrétti og tvo desserta líka og magnið af matnum hefði dugað fyrir a.m.k. eina til tvær fjölskyldur í viðbót!  Við skutum auðvitað upp flugeldum um miðnætti og svo var bara tjúttað fram eftir öllu......... kannski aðeins of lengi miðað við að Helgi er að fara í próf á laugardagsmorgun!!

Nú er bara að koma sér í rútínuna aftur - drengirnir fara aftur í skóla á mánudaginn og þá verður að vera búið að koma svefntímanum í réttan farveg aftur.

Sem sagt allt gott héðan á nýju ári!

Gleðileg jól!

Við fjölskyldan sendum ykkur öllum okkar bestu óskir um gleðileg jól!

Við höfum það mjög gott hér í Danaveldinu.  Jólaundirbúningurinn gekk vel og miðað við það sem við erum vön frá fyrri árum vorum við bara tímanlega með þetta allt saman. Á mánudaginn redduðum við síðustu pökkunum og sóttum hamborgarahrygginn sem var pantaður hjá slátraranum til að fá hann með beini. Á Þorláksmessu var jólagjafarúnturinn farinn. Í stað þess að keyra frá Kópavogi um alla Reykjavík og út á Seltjarnarnes með viðkomu í Mosfellsdal og enda á Selfossi var bara farið á einn stað - til Gedved!

Um kaffileytið á Þorláksmessu, eftir jólagjafarúntinn var komið að því að versla það sem vantaði í matinn.  Við hálf kviðum því að fara með drengina í verslunarleiðangur um kaffileytið á Þorláksmessu, áttum auðvitað von á lööööngum röðum á kassana og troðningi í búðinni en létum okkur nú hafa það og stefndum í Bilka.  Þegar þangað var komið var óvenju mikið úrval af bílastæðum og einstaklega rólegt í búðinni og engin röð á kassana.  Danir eru sem sagt ekki að versla svona á síðustu stundu eftir kaffi á Þorláksmessu!!!!  

Aðfangadagurinn hófst snemma (ca. kl. 06:15) hér á heimilinu eins og allir síðustu 13 dagarnir fyrir jól!  Þrátt fyrir að hafa fengið að vaka lengi við að skreyta jólatréð og svoleiðis skemmtilegheit vöknuðu drengirnir eldsnemma til að kíkja á jólapakkann frá síðasta jólasveininum!  Dagurinn gekk samt ótrúlega vel og voru þeir bræður ótrúlega góðir miðað við að sitja í stofunni með fullt af pökkum undir jólatrénu sem mátti ekki opna fyrr en klukkan sex!  

Við ákváðum að hafa jólamatinn með hefðbundnu sniði, hamborgarahryggur með brúnuðum kartöflum og rauðvínssósu og sveppirnir góðu á sínum stað.  Þrátt fyrir að allir hafi borðað á sig gat......... og rúmlega það...... sá varla högg á vatni, magnið hefði dugað fyrir a.m.k. tvær fjölskyldur í viðbót, en það er bara fínt - við höfum nægan tíma þessi jólin til að vera heima í rólegheitunum og borða afgangana.  

Pakkamaraþonið var mikil skemmtun hér á heimilinu.  Jóel Kristinn las á alla pakkana og þeir bræður voru þvílíkt glaðir með innihaldið.  Það var alveg sama hvort pakkarnir voru mjúkir eða harðir, stórir eða litlir þeir voru alltaf jafn ánægðir með innihaldið.  "Mig hefur alltaf langað í svona" "Mig langaði einmitt í svona vettlinga" .............. o.s.frv.  Gaman að því!  Foreldrar þeirra voru að sjálfsögðu einnig mjög ánægð með allt sitt.  Við þökkum fyrir okkur!

Eftir pakkamaraþonið spiluðum við í smá stund fjölskyldan en svo voru drengirnir orðnir úrvinda af þreytu og vildu komast í rúmið......... í glænýjum náttfötum að sjálfsögðu.

Núna erum við fjölskyldan bara í rólegheitunum á jóladagsmorgni.  Hugsum auðvitað heim í jólaboðin en í staðinn höldum við lítið jólaboð seinni partinn þegar Lilja, Jón Freyr og Benta Vala koma frá Gedved í jólahangikjötið.

Með jólakveðju,

Tilkynning um heimkomu!

Við erum búin að kaupa flugmiða til Íslands!!!!

Komum seinnipartinn föstudaginn 6. febrúar og förum aftur snemma morguns mánudaginn 16. febrúar!

Bestu kveðjur,

...og hratt líður desember...

Fannar Ingi jólaklipptur

Jóel Kristinn með jólaklippinguna sína

Tíminn líður hratt nú á gervihnattaöld, hraðar sérhvern dag, hraðar sérhvert kvöld..... sérstaklega nú þegar nóg er að gera!

Smám saman tekst okkur að undirbúa komu jólanna.  Við höfum auðvitað aldrei áður þurft að hugsa fyrir því að eiga eitthvað í matinn um jólinn þar sem við höfum alltaf verið stanslaust í jólaboðum hjá öðrum og stundum tveimur á dag!  .... en með kokkamenntaðan mann á heimilinu hefst þetta nú.  Ég reyni svo bara að vera dugleg að leggja á borðið! (hehe)

Drengirnir fóru í jólaklippinguna í gær. Nú var sko engin kreppuklipping heldur bara alvöru töffaraklipping á íslensku stofunni niðrí bæ!  Myndir af drengjunum nýklipptum fylgja hér með.

Annars er allt við það sama, búið að fara á julehygge í leikskólanum þar sem dansað var í kringum jólatréð og gengin Lúsíu-ganga.  Þeir eru ekkert að stressa sig á því Danirnir hvort börnin eru með eða ekki í svona viðburðum og nú voru það bara 5 börn sem gengu (þar með yfir 15 sem gengu ekki). Fannar Ingi vildi ekki klæða sig í englabúning og ganga undir fögrum Lúsíusöngnum þar sem hann sagðist ekki kunna það......... þar með var það ákveðið!  

Ritgerðarskrif og lærdómur eru bara á sínum stað.  Við reynum að vera dugleg, gengur misvel svona þegar jólin nálgast en þetta reddast vonandi,

Bestu kveðjur,

Rólegur desember

Hér er allt í rólegheitunum og í raun ekkert að frétta og þar með ekkert merkilegt til að skrifa um!

Við fórum reyndar í jólaföndur í skólann hans Jóels á fimmtudag þar sem við föndruðum músastiga og fléttuðum hjörtu auk þess sem við bjuggum til kertaskreytingar og fengum eplaskífur og jólaglögg. Mjög skemmtilegt.

Annars er ég húsmóðirin rétt að jafna mig eftir heila viku með hita og nokkra daga af stanslausum hósta sem hefur valdið því að ég hef bara verið hálfgerður aumingi. Helgi Kristinn hefur þvert á móti staðið sig með prýði og vann og vann um síðustu helgi. Á föstudaginn frá kl. 18 - 04:15 og svo strax aftur á laugardag frá 12 - 18. Hann var að þjóna í fínum veislum, bera fram mat, dæla bjór og svoleiðis. Kemur sér vel að fá nokkrar danskar krónur svona rétt fyrir jólin.

Það var nú reyndar annað stórafmæli í fjölskyldunni því hann Jóel bróðir eða Jóel frændi (fer eftir því hver talar) varð 25 ára þann 6. desember. Við fjölskyldan sendum honum að sjálfsögðu hamingjuóskir með stórafmælið.

Annars bara það sama verið að læra og læra og drengirnir að leika og leika...

Bestu kveðjur

Til hamingju með afmælið!

Í dag er einn af þessum dögum þar sem það er pínu erfitt að vera ekki heima á Íslandi. Í dag á nefnilega mamman, tengdamamman og amman Anna Þóra 60 ára afmæli sem er sko bara ekkert smá!!
Við fjölskyldan óskum henni innilega til hamingju með afmælið!!!

Einn óvæntur kostur við að búa svona í útlöndum er að þá neyðist maður til að vera snemma í því með jólagjafirnar. Við erum sem sagt búin að afgreiða allar jólagjafir (nema hér inn á heimilið) og senda til Íslands. Lokaskiladagur á jólapökkunum til Íslands með skipinu er í dag sem er frábært fyrir fjölskyldu sem er vön að vera á síðustu stundu, korter í jól!

Nú er bara að setja í fluggírinn í lærdómnum. Helgi þarf að byrja að huga að prófinu sem hann fer í 3. janúar svo hann geti nú tekið sér eitthvað frí yfir jólahátíðina og ég þarf heldur betur að vera dugleg í ritgerðarskrifum. 2. janúar skila ég verkefnamöppu með fjórum verkefnum þar sem ég á eftir að gera eitt verkefnið og lagfæra hin, svo skila ég 40 blaðsíðna projekti um námsmat í stærðfræði (rúmlega hálfnuð með það), Rannsóknarritgerð í International and Comparative Education þar á ég eftir ca. 6 bls og svo að lokum prófverkefni í sama fagi þetta er víst alveg nóg fyrir desembermánuð!

Fannar Ingi og Jóel Kristinn eru alltaf jafn hressir borða nú súkkulaði í morgunmat á hverjum degi (jóladagatalið) og bíða spenntir eftir jólunum. Jóel talar ennþá eins og hann verði heima á Íslandi um jólinn en sættir sig nú samt alveg við að skreppa bara heim í vetrarfríinu í fyrri hluta febrúar. Fannar Ingi er bara alsæll, fagnar nú að hverjum morgni því að mega fara á leikskólann (eftir að hafa verið heima alla síðustu viku).

Bestu kveðjur