Fótboltafréttir

Í fréttum er þetta helst að á sunnudaginn keppti Jóel Kristinn Helgason, 5 ára Íslendingur fyrir hönd Viby í lokamóti sumarsins Jysk-3.
Drengurinn stóð sig með afbrigðum vel, var nokkrum sinnum nálægt því að skora og kom í veg fyrir ótal mörk með efnilegum varnartöktum.
Mótið var haldið í um 35 km fjarlægð frá heimabænum, Viby en öll fjölskyldan var virk í stuðningsliðinu og skemmti sér konunglega. Mikið fjölmenni var á vettvangi en fjölmörg lið tóku þátt og spilaði drengurinn 3 leiki hver öðrum skemmtilegri fyrir áhorfendur og aðra aðdáendur keppenda.
Að móti loknu fengu keppendur verðlaunapening um hálsinn en þá kom reyndar smá babb í bátinn þar sem yngri bróðir leikmannsins umrædda, Fannar Ingi grét fögrum tárum vegna ósanngirni í úthlutun verðlaunapeninga. Þjálfari Viby -liðsins brást skemmtilega við og útvegaði eina medalíu til viðbótar og verðlaunaði litla bróður fyrir besta stuðning dagsins!
Hélt fjölskyldan því heim með tvo verðlaunapeninga og fjögur bros á vör. Þess má geta að veðrið var vægast sagt gott, sól og um 20° hiti sem okkur Íslendingum þykir bara fínt nú í lok september.
Svo fréttaritari haldi áfram að lofa upp í ermina á sér, þá eru framundan myndir frá liðnum vikum svo fylgist spennt með.
Fótboltakveðjur,